EKSODOS 36 - KA BAIBL

¹ “Ynda kumta, ki la ïatrei u Besalil bad u Aholiab, bad u briew baroh u bastad ka dohnud, ha kiba U Trai u la buh ka jingstad bad ka jingshemphang ban nang ban trei ïa ki kynja jingtrei baroh jong ki kam ka jaka kyntang, katba kum ïa kita baroh ba U Trai u la lah hukum.”

Ka jingai kylluid mynsiem u paidbah

² Te u Moses u la khot ïa u Besalil bad ïa u Aholiab, bad ïa u briew u bastad ka dohnud baroh, ha kiba U Trai u la lah buh ka jingstad, uwei uwei baroh keiñ uba ka dohnud jong u ka la kyntu eh ïa u ban wan trei ïa kata ka kam;

³ bad ki la shim na u Moses ïa kita ki jingainguh baroh, ïa kiba la lah wallam ki khun Israel ïa ka ban trei ïa ka kam ka jaka kyntang, ban thaw ïa ka. Ki la ïa nang wallam shuh ha u ïa ki jingainguh basngewmon bha hi man ka step,

⁴ te kita ki riewstad baroh kiba la trei ïa ka kam jong ka jaka kyntang, ki la wan noh uwei uwei baroh na la ka kam ïa kaba ki dang ïathaw;

⁵ bad ki la kren ha u Moses, ki da ong, “Kita ki briew ki ïawallam shibun nalor kaba biang ïa ka jingtrei jong kata ka kam, ïa kaba U Trai u la hukum ban thaw keiñ.”

⁶ Te u Moses u la ai hukum, bad ki la ïa-pynbna ïa ka ha ka jaka shong dara baroh, da kaba ong, “Wat ai ba u shynrang lymne ka kynthei ban khreh ei ei ruh na ka bynta ka jingainguh ïa ka jaka kyntang.” Kumta keiñ, la khang noh ïa uta u paidbah ba kin ym wallam shuh,

⁷ namar ki la don kiei kiei ruh kiba biang eh, bad la tam ruh, ban thaw ïa ka kam baroh.

Ka jingtrei ïa ka kam Ka Tabernakl

⁸ Bad u briew baroh u bastad hapdeng kita kiba trei ïa ka kam Ka Tabernakl u la thaw shiphew tylli ki jingkah da ka linen bani ba la thir; bad ka babyrïong, bad ka basaw bthuh, bad ka basaw syng-iang, lem bad ki Kherub da ka kam bastad ki la thaw ïa ki.

⁹ Arphew phra pruh ka lynter kawei ka jingkah, bad saw pruh ka pyngkiang kawei ka jingkah: ki jingkah baroh ki la don kajuh ka jingthew keiñ.

¹⁰ Bad u la pynïasoh lang san tylli ki jingkah: ïa kita ki san tylli kiwei pat ruh u la pynïasoh lang.

¹¹ Bad u la thaw ïa ki kyrwoh da ka babyrïong ba ka rmiang kawei ka jingkah, ha ka bakut eh ha kata ka jingpynïasoh: kumjuh u la thaw ha ka rmiang kaba harud eh kawei pat ka jingkah, ha kata ka jingpynïasoh ka ba-ar;

¹² sanphew tylli ki kyrwoh u la thaw ha kawei ka jingkah, bad sanphew tylli ki kyrwoh u la thaw ha ka rmiang jong ka jingkah kaba ha kata ka jingpynïasoh jong ka ba-ar: kawei ka kyrwoh ka ïapyrshah bad kawei pat ka kyrwoh.

¹³ Bad u la thaw sanphew tylli ki jingpyndait ksiar, bad u la pynïasoh lang ruh ïa kita ki jingkah da kita ki jingpyndait: kumta keiñ, ka la long kawei Ka Tabernakl.

¹⁴ Bad u la thaw ïa ki jingkah da u 'ñiuh blang, ïa ka ban long ka jingsop ïa Ka Tabernakl: khatwei tylli ki jingkah u la thaw ïa ki.

¹⁵ Laiphew pruh, ka lynter kawei ka jingkah, bad saw pruh, ka pyngkiang kawei ka jingkah: kita ki khatwei tylli ki jingkah ki la don kajuh ka jingthew.

¹⁶ Bad u la pynïasoh san tylli ki jingkah kyrpang, bad hynriew tylli ki jingkah kyrpang.

¹⁷ Bad u la thaw sanphew tylli ki kyrwoh ha ka rmiang eh jong ka jingkah ha ka jingpynïasoh, bad sanphew tylli ki kyrwoh u la thaw ha ka rmiang kata ka jingkah ka bapynïasoh ïa ka ba-ar.

¹⁸ U la thaw ruh sanphew tylli ki jingpyndait tama ïa ka ban pynïasoh lang ïa ka jingsop, ba kan long kawei.

¹⁹ Bad u la thaw ïa ka jingtap ïa kata ka jingsop da ki snieh langbrot shynrang ba la suit rong saw, bad ïa ka jingtap da ki snieh takash halor kata.

²⁰ Bad u la thaw ïa ki lyntang ïa kata Ka Tabernakl da u dieng Shittim, da kaba pynïeng ïa ki.

²¹ Ka lynter kawei ka lyntang, shiphew pruh, bad ka pyngkiang kawei ka lyntang, shi pruh shiteng.

²² Kawei ka lyntang ka don ar tylli ki tnaw, ba la pyndait uwei ha uwei: kumne u la leh ïa ki lyntang Ka Tabernakl baroh.

²³ Bad u la thaw ruh ïa ki lyntang ïa kata Ka Tabernakl; ïa arphew tylli ki lyntang ïa ka liang kaba shaphang shathie;

²⁴ bad ïa sawphew tylli ki thliew tnaw rupa u la thaw hapoh kita ki arphew tylli ki lyntang; ar tylli ki thliew tnaw hapoh kawei ka lyntang ïa ki baroh ar ki tnaw jong ka, bad ar tylli ki thliew tnaw hapoh kawei pat ka lyntang ïa ki baroh ar ki tnaw jong ka.

²⁵ Bad ïa kawei pat ka liang jong Ka Tabernakl, kaba shaphang shatei, u la thaw arphew tylli ki lyntang,

²⁶ lem bad ki sawphew tylli ki thliew tnaw rupa jong ki; ar tylli ki thliew tnaw hapoh kawei ka lyntang, bad ar tylli ki thliew tnaw hapoh kawei pat ka lyntang.

²⁷ Bad ïa kata ka liang kaba shaphang sepngi jong Ka Tabernakl u la thaw hynriew tylli ki lyntang.

²⁸ Bad ar tylli ki lyntang u la thaw, ïa ki dong jong Ka Tabernakl ha kata ka liang.

²⁹ Bad la pynïasoh ïa ki shapoh, bad la pynïasoh lang ïa ki na shaneng ruh ha kawei ka kyrwoh: kumne keiñ, u la leh ïa ki baroh ar ha kita ki baroh ar ki dong.

³⁰ Bad la don phra tylli ki lyntang, bad ki thliew tnaw jong ki, ki la long khathynriew ki thliew tnaw rupa; ar ar tylli ki thliew tnaw keiñ hapoh kawei kawei ka lyntang.

³¹ Bad u la thaw ïa ki dieng khap da u dieng Shittim; san tylli ïa ki lyntang jong kawei ka liang jong Ka Tabernakl,

³² bad san tylli ki dieng khap ïa ki lyntang kawei pat ka liang Ka Tabernakl, bad san tylli ki dieng khap ïa ki lyntang Ka Tabernakl ha kata ka liang kaba shaphang sepngi.

³³ Bad u la thaw ïa uta u dieng khap uba hapdeng ban kot baroh shilynter jong kita ki lyntang.

³⁴ Bad u la suit ksiar ïa kita ki lyntang, bad u la thaw ïa ki kyrwoh ksiar jong ki, ki kyrwoh ïa kita ki dieng khap keiñ, bad u la suit ksiar ruh ïa kita ki dieng khap.

³⁵ Bad u la thaw ïa ka jingkah pdeng da ka babyrïong, bad ka basaw bthuh, bad ka basaw syng-iang, bad ka linen bani ba la thir: bad ki Kherub u la thaw ïa ka da ka jingtrei bastad.

³⁶ Bad u la thaw ïa ka, saw tylli ki rishot da u dieng Shittim, bad u la suit da ka ksiar ïa ki: ki kyrwoh jong ki ruh ki long da ka ksiar; bad u la saiñ ïa ki saw tylli ki thliew tnaw rupa.

³⁷ U la thaw ruh ïa ka pyrda ïa ka jingkhang kata Ka Tabernakl, da ka babyrïong, bad ka basaw bthuh, bad ka basaw syng-iang, bad ka linen bani ba la thir, da kaba suh pynpur;

³⁸ bad ïa kita ki san tylli ki rishot jong ka lem bad ki kyrwoh jong ki: bad u la suit da ka ksiar ïa ki khlieh jong ki, bad ïa ki shrong jong ki: hynrei, ki san tylli ki thliew tnaw jong ki, ki la long da ka tama.