EKSODOS 35 - KA BAIBL

Ka hukum shaphang ka Sabbaton

¹ U Moses u la ïalum ruh ïa u paidlang baroh ki khun Israel, bad u la ong ha ki, “Kine ki long kita ki ktien ba U Trai u la hukum ïa phi ban leh.

² Hynriew sngi ka dei ban trei jingtrei, hynrei, ha ka sngi ka bahynñiew kan long ïa phi ka sngi bakhuid, ka Sabbaton keiñ ka jingshongthait ïa U Trai: jar uba trei jingtrei ha ka, yn pynïap noh ïa u.

³ Phi wat sliew ding ha ki ïing jong phi baroh ha kata ka sngi Sabbaton.”

Ka jingainguh ha U Trai

⁴ Bad u Moses u la kren ha u paidlang ki khun Israel baroh, u da ong, “Kane ka long ïa kaba U Trai u la hukum, u da ong,

⁵ To phin shim napdeng jong phi ïa ka jingainguh ha U Trai: jar uba la sngewkloi ha la ka dohnud, to ai un wallam ïa ka, ban long ka jingainguh ha U Trai; ïa ka ksiar, bad ïa ka rupa, bad ïa ka tama;

⁶ bad ïa ka babyrïong bad ïa ka basaw bthuh, bad ïa ka basaw syng-iang, bad ïa ka linen bani, bad ïa u 'ñiuh blang;

⁷ bad ïa ki snieh langbrot shynrang ba la suit rong saw, bad ïa ki snieh takash, bad ïa ki dieng Shittim;

⁸ bad ïa ka umphniang ïa ka jingshai, bad ïa ki musla ïa ka umphniang bapynsleh, bad ïa ka jingiwbih thang baiwbih;

⁹ bad ïa ki maw Oniks, bad ïa ki maw ban thep ha ka ephod, bad ha ka jingdeng shadem.

Ki jingbuh jingsat ha ka Tabernakl

¹⁰ “Bad uwei uwei baroh u bastad buit hapdeng jong phi un sa wan, bad un thaw ruh ïa kita baroh ïa kiba U Trai u la hukum;

¹¹ ïa kata Ka Tabernakl, bad ïa ka ïingjaiñ jong ka, bad ïa ka jingsop jong ka, bad ïa ki jingpyndait jong ka, bad ïa ki lyntang jong ka, bad ïa ki dieng khap jong ka, ïa ki rishot jong ka, bad ïa ki thliew tnaw jong ka;

¹² ïa ka synduk, bad ïa ki dieng jingbah jong ka, lem bad kata ka jingtap-isynei bad ïa ka jingkah ïa ka ban kah ïa ka;

¹³ ïa ka miej, bad ïa ki dieng jingbah jong ka, bad ïa ki pliang jong ka baroh, bad ïa u 'pu pyni;

¹⁴ ïa ka dieng pynïeng sharak ruh ban pynshai, bad ïa ki jingbuh jong ka, bad ïa ki sharak jong ka, lem bad ka umphniang ïa ka jingshai;

¹⁵ ïa ka duwan ka jingiwbih thang, bad ïa ki dieng jingbah jong ka, bad ïa ka umphniang bapynsleh, bad ïa ka jingiwbih thang baiwbih, bad ïa ka pyrda ïa ka jingkhang, ha ka jaka rung shapoh Ka Tabernakl;

¹⁶ ïa ka duwan ka jingainguh thang, lem bad ka jingsliew ding tama jong ka, ïa ki dieng jingbah jong ka ruh, bad ïa ki pliang jong ka baroh, bad ïa ka dabor bad ïa ka sla'jat jong ka;

¹⁷ ïa ki pyrda jong ka phyllaw, ïa ki rishot jong ka, bad ïa ki thliew tnaw jong ki, bad ïa ka pyrda ruh ïa ka jingkhang jong ka phyllaw;

¹⁸ ïa ki prek jong Ka Tabernakl, bad ïa ki snar jong ka phyllaw, lem bad ki tyllai jong ki;

¹⁹ ïa ki jaiñ ban leh ka kam, ïa ka ban leh ka kam keiñ ha ka jaka bakyntang, ïa ki jaiñkup bakyntang ïa u Aaron u lyngdoh, bad ïa ki jaiñkup ïa ki khun shynrang jong u ruh, ïa ka ban kam ha ka kam lyngdoh.”

U paidbah u wallam ïa la ki jingainguh

²⁰ Ynda kumta, uta u paidlang ki khun Israel baroh ki la leit noh na khmat u Moses.

²¹ Ki la ïawan te, uwei uwei baroh kat uba ka dohnud jong u ka la kyntu eh ïa u, bad uwei uwei baroh kat kiba la ïamon na la ka mynsiem, ki la ïawallam ruh ïa ka jingainguh ïa U Trai, na ka bynta kata ka kam Ka Tabernakl ka jingïaseng, bad na ka bynta ka jingshakri jong ka baroh, bad na ka bynta kita ki jaiñkup bakyntang.

²² Ki la ïawan te, ki shynrang bad ki kynthei ruh, kat kiba la mon hi ha la ka dohnud, bad ki la wallam ïa ki khadu, bad ïa ki sohshkor, bad ïa ki 'sah'ti, bad ïa ki kynjri, ïa ki kynja baroh ki jingdeng ksiar; u briew baroh keiñ uba la ainguh, u la ainguh da ka ksiar ha U Trai.

²³ Bad u briew baroh, ha uba la shem ïa ka babyrïong, bad ïa ka basaw bthuh, bad ïa ka basaw syng-iang, bad ïa ka linen bani, bad ïa u 'ñiuh blang, bad ïa ki snieh langbrot shynrang ba la suit rong saw, bad ïa ki snieh takash, ki la ïawallam ïa ki.

²⁴ U briew baroh uba la ainguh ïa ka jingainguh da ka rupa bad ka tama, u la wallam ïa ka jingainguh keiñ ha U Trai: bad u briew baroh ha uba la shem ïa ki dieng Shittim ïa kano kano ruh ka kam jong ka jingshakri, u la wallam ïa ki.

²⁵ Ki kynthei baroh ruh ki bastad jingmut ki la thir da la ki kti, ki la wallam ruh ïa kaba ki la lah thir, na ka babyrïong, bad na ka basaw bthuh, bad na ka basaw syng-iang, bad ïa ka linen bani.

²⁶ Kita ki kynthei baroh ruh ïa kiba la kyntu eh ha la ka dohnud ha ka jingstad ki la ïathir ïa u 'ñiuh blang.

²⁷ Ki nongsynshar te ki la ïawallam ïa ki maw Oniks, bad ïa ki maw ban thep ha ka ephod, bad ha ka jingdeng shadem;

²⁸ bad ïa ki musla, bad ïa ka umphniang ïa ka jingshai, bad ïa ka umphniang bapynsleh, bad ïa ka jingiwbih thang baiwbih.

²⁹ Ki khun Israel ki la ïawallam ïa ka jingainguh da la ka mon sngewbha hi ha U Trai; ki shynrang bad ki kynthei baroh, kiba la sngewmon hi, ki la ïawallam na ka bynta kita ki kam baroh, ïa kiba U Trai u la lah hukum ban leh da ka kti u Moses.

Kaba khot ïa u Besalil bad ïa u Aholiab

³⁰ U Moses te u la kren ha ki khun Israel, “Ha khmih, U Trai u la khot da ka kyrteng ïa u Besalil u khun u Uri, u khun u Hur, na ka jaid Judah;

³¹ bad u la pyndap ïa u da U Mynsiem U Blei, ha ka jingstad, ha ka jingshemphang, bad ha ka jingsngewthuh, bad ha ka kynja jingtrei baroh;

³² ïa ka ban pyrkhat ïa ki kam baphylla, ïa ka ban trei keiñ ha ka ksiar, ha ka rupa, bad ha ka tama,

³³ ha kaba shna ïa ki mawlynnai ban thep ïa ki, bad ha kaba mutdur ha ki dieng, ïa ka ban trei ïa ki jingtrei bastad baroh.

³⁴ Bad u la ai buit ha ka dohnud jong u ïa ka ban hikai ïa kiwei, ma u keiñ, bad u Aholiab, u khun u Ahisamakh, na ka jaid Dan.

³⁵ Ïa ki, u la pyndap da ka jingstad ka dohnud, ïa ka ban trei ïa ki kynja jingtrei baroh, ka jong uba mutdur, bad jong uba trei stad buit, bad jong uba suh pynpur, ha ka babyrïong, bad ha ka basaw bthuh, bad ha ka basaw syng-iang, bad ha ka linen bani ruh, bad ha kaba thain, da kaba leh keiñ ïa kano kano ruh ka kam, bad da kaba pyrkhat ïa ki jingtrei bastad buit.