EKSODOS 34 - KA BAIBL

Kaba thaw biang ïa ki maw lyngkniap

¹ Te U Trai u la ong ha u Moses, “To men shtah ar tylli ki maw lyngkniap kum kita ki banyngkong: bad ngan sa thoh halor kine ki maw lyngkniap ïa kita ki ktien kiba la don ha kita ki maw lyngkniap ki banyngkong, ïa kiba me la pynpait.

² To khreh te hamar kaba mynstep, bad to wan kiew dang step sha u lum Sinai, bad to wan ha nga hangta ha kliar uta u lum.

³ Wat ai ba uno uno u briew ruh un wan kiew ryngkat bad me, lymne wat shah ba yn ïohi ïa uno uno u briew halor uta u lum baroh; lymne wat shah ïa ki kynhun langbrot lymne ïa ki jingri ban bam phlang ha khmat uta u lum.”

⁴ Te u la shtah ar tylli ki maw lyngkniap kum kita ki banyngkong; kumta, u Moses u la khie la dang step, bad u la leit kiew sha u lum Sinai, kumba U Trai u la lah hukum ïa u, bad u la leit lam ha la ka kti ïa kita ar tylli ki maw lyngkniap.

⁵ Bad U Trai u la wan hiar ha u lyoh, bad u la ïeng hajan jong u hangta, bad u la pynbna ïa ka kyrteng U Trai.

⁶ Te U Trai u la ïaid lait ha shuwa jong u, bad u la pynbna, “U Trai, U Trai, U Blei uba isynei bad ba aiei, uba ïaishah slem, bad uba kynrei ha ka jingbha bad ka jingshisha;

⁷ uba bat ka jingisynei ïa ki hajar, uba map ïa ka jingpalat, bad ïa ka jingryngkang, bad ïa ka pop: bad un ym pynksan da lei lei ïa u bymman; uba pynwan ïa ka jingpalat jong ki kpa ha ki khun, bad ha ki khun jong ki khun, haduh ka balai bad ka basaw pateng bynriew.”

⁸ Te u Moses, da kaba leh kyrkieh, u la dem ngon haduh ka khyndew, bad u la mane dem.

⁹ Bad u la ong, “Lada nga la shem mynta ïa ka jingsngewbha ha khmat jong me, A Trai, nga kyrpad ïa me, to ai ba U Trai jong nga un leit ryngkat bad ngi; namar u long u paidlang ba-eh ryndang; to map ruh ïa ka jingpalat jong ngi, bad ïa ka pop jong ngi, bad to shim ïa ngi kum ka bynta jong me.”

Kaba pynthymmai ïa ka Jutang

¹⁰ U la ong te, “Ha khmih, nga thaw ïa ka jutang: ha khmat u paidlang jong me baroh ngan leh ïa ki jingkhyllah, kat kiba ym shym la leh ha ka pyrthei baroh, lymne ha kano kano ka jaid bynriew: bad uta u paidbah baroh ruh hapdeng kiba me don kin ïohi ïa ka kam U Trai, namar kata, ïa kaba ngan leh ïa me ka long kaba shyrkhei keiñ.

¹¹ “To men sumar ïa kata kaba nga hukum ïa me ha kane ka sngi: ha khmih, ngan beh noh na khmat jong me, ïa ki Amor, bad ïa ki Kanaan, bad ïa ki Hit, bad ïa ki Peris, bad ïa ki Hib, bad ïa ki Jebus.

¹² To sumar ïa lade, ba men ym thaw ïa ka jutang bad ki trai-shnong jong kata ka ri sha kaba me leit, ïoh ba kan long ka jingriam hapdeng jong me.

¹³ Hynrei, phin pynjot noh ïa ki duwan jong ki, bad phin pynpait ïa ki bleithaw jong ki, bad phin khet noh ïa ki 'law kyntang jong ki:

¹⁴ Namar men ym mane ïa uwei pat u blei; naba U Trai, uba ka kyrteng jong u, ‘U Bathut shen’, u long U Blei u bathut shen keiñ:

¹⁵ ïoh ba men thaw ïa ka jutang bad ki trai-shnong jong kata ka ri, bad ki ïaleit klim bad ki blei jong ki, bad ki ïakñia ïa ki blei jong ki, bad khot lem ïa me ruh, bad ba me ruh men bam na ka jingkñia jong ki,

¹⁶ bad men shim ruh na ki khun kynthei jong ki ha ki khun shynrang jong me, bad ki khun kynthei jong ki kin ïaleit klim bad ki blei jong ki, bad kin pynklim ruh ïa ki khun shynrang jong me bad ki blei jong ki.

¹⁷ “Wat thaw ïa me ïa ki dur bleithaw ba la saiñ.

¹⁸ “To men rakhe ïa Ka Niam U Kpu Bakhlem Thiat. Hynñiew sngi men bam ïa u kpu bakhlem thiat, kumba nga la hukum ïa me, ha la ka aïom ha u bnai Abib; namar ha uta u bnai Abib hi, me la mih noh na ka ri Ijipt.

¹⁹ Baroh ïa kaba la kha nyngkong na ka kpoh ka long ka jong nga; bad u shynrang baroh ïa uba la kha nyngkong hapdeng ki jingri jong me, la u long u masi ne u blang.

²⁰ Hynrei, ïa u banyngkong jong ka kadda men siewspah da u khun langbrot: te lada men ym siewspah ïa u, te men kdiah ïa ka ryndang jong u. To men siewspah ruh ïa kiba la kha nyngkong baroh na ki khun shynrang jong me. Wat ai ïano ïano ruh ban paw suda ha khmat jong nga.

²¹ “Hynriew sngi men trei jingtrei, hynrei, ha ka sngi ka bahynñiew men shongthait: ha ka aïom bet bad ha ka aïom ot men shong sngi.

²² To men rakhe ruh ïa Ka 'Niam Ki Taïew, jong ki soh nyngkong ka aïom ot Kew, bad ïa Ka Jingkhawai Niam Ka Jinglum ha ka bakut ka snem.

²³ Lai sien shi snem, ki shynrang jong phi baroh kin ïapaw ha khmat U Trai U Blei, U Blei jong ki Israel keiñ.

²⁴ Namar ngan beh noh ïa kita ki jaid bynriew na khmat jong me, bad ngan pynïar ruh ïa ki pud jong me: lymne yn ym don mano mano ruh ban ikwah ïa ka ri jong me, haba men leit kiew ban paw ha khmat U Trai U Blei jong me, lai sien shi snem.

²⁵ “Wat ainguh ïa ka snam ka jingkñia jong nga lem bad u thiat: lymne wat ai ban pynsah haduh mynstep ïa ka jingkñia Ka Jingkhawai Niam Ka Jinglait.

²⁶ To men wallam sha ïing U Trai U Blei jong me ïa u babha tam eh na ki soh nyngkong ka ri jong me. Wat shet ïa u khun blang ha ka dud ka kmie jong u.”

²⁷ Bad U Trai u la ong ha u Moses, “To men thoh ïa kine ki ktien: namar katba kum kine ki ktien, nga la pynlong ïa ka jutang bad me bad u Israel ruh.”

²⁸ Te u la don hangta lem bad U Trai sawphew sngi bad sawphew miet; um shym la bam ïa u kpu, lymne dih ïa ka um. Te u la thoh halor kita ki maw lyngkniap ïa ki ktien kata ka jutang, ïa kita ki shiphew hukum keiñ.

U Moses u wan hiar na u lum

²⁹ Te mynba u Moses u la wan hiar na u lum Sinai bad kita ki ar tylli ki maw lyngkniap ka jingphla ha ka kti u Moses, mynba u la wan hiar na uta u lum, u Moses um tip ba ka snieh khmat jong u ka la tyngshaiñ ber katba u la kren bad U.

³⁰ Te haba u Aaron bad ki khun Israel baroh ki la ïohi ïa u Moses, ha khmih, ka snieh khmat jong u ka la tyngshaiñ ber; bad ki la ïasheptieng ban wan hajan jong u.

³¹ Hynrei, u Moses u la khot ïa ki; te u Aaron ruh bad ki rangbah u paidlang baroh ki la ïawan phai pat ha u: bad u Moses u la ïakren bad ki.

³² Te ynda kumta, ki khun Israel baroh ki la ïawan hajan: bad u la hukum ïa ki ïa kita baroh kiba U Trai u la lah kren ha u ha u lum Sinai.

³³ Te katba u Moses u la dang kren bad ki, u la buh ïa ka jingkah halor ka khmat jong u.

³⁴ Hynrei, haba u Moses u la leit bsut ha khmat U Trai ban kren bad U, u la weng noh ïa kata ka jingkah, haduh ba un da mih noh; te haba u la mih noh, u la kren ha ki khun Israel ïa kata ïa kaba la hukum ïa u,

³⁵ bad ki khun Israel ki la ïohi ïa ka khmat u Moses, ba ka snieh khmat u Moses ka la tyngshaiñ ber: te u Moses u la buh pat ïa kata ka jingkah halor la ka khmat, haduh ha un da leit hapoh ban kren bad U.