EKSODOS 33 - KA BAIBL

Ka hukum ban mih noh

¹ Te U Trai u la ong ha u Moses, “To ïeng, to leit noh nangne, ma me bad uta u paidlang ïa uba me la wallam artet na ka ri Ijipt, sha kata ka ri ïa kaba nga la smai ha u Abraham, ha u Isaak, bad ha u Jakob, da kaba ong, ‘Ha u symbai jong me ngan ai ïa ka.’

² Bad ngan phah ïa u angel jong nga ha shuwa jong me; bad ngan beh noh ma nga ïa ki Kanaan, ïa ki Amor, bad ïa ki Hit, bad ïa ki Peris, ïa ki Hib, bad ïa ki Jebus:

³ sha ka ri kaba tuid da ka dud bad ka ngap; namar nga, ngan ym leit kiew ryngkat hapdeng jong me; naba me u paidlang ba-eh ryndang; ba ïoh ngan pynduh noh khoit ïa me ha kata ka lynti.”

⁴ Te haba uta u paidlang u la ïohsngew ïa kine ki khubor basniew, ki la leh sngewsih: bad ym don shuh mano mano ruh ba deng ïa la ki jingdeng.

⁵ Bad U Trai u la ong ha u Moses, “To ïathuh ha ki khun Israel, ‘Phi long u paidlang ba-eh ryndang; lada ngan wan kiew keiñ hapdeng jong me, shisyndon ngan pynduh noh khoit ïa me: namar kata, to law noh bak ïa la ki jingdeng na me, ba ngan ïoh tip aïu ngan sa leh ha me.’ ”

⁶ Te ki khun Israel ki la ïalaw noh na lade ïa la ki jingdeng naduh u lum Horeb.

Ka Tabernakl ka jingïaseng

⁷ Te u Moses u la ju rah noh ïa Ka Tabernakl u da pynïeng ïa ka shabar ka jaka shong dara, kham sha jngai na kata ka jaka shong dara; bad u la khot ïa ka, “Ka Tabernakl ka jingïaseng.” Te ka la jia, ba uno uno ruh uba wad ïa U Trai u la mih shabar sha kata Ka Tabernakl ka jingïaseng, kaba don shabar ka jaka shong dara.

⁸ Te ka la jia, mynba u Moses u la leit ha kata Ka Tabernakl, ba baroh uta u paidbah u la ïakhie buk, bad ki la ïaïeng ruh, uwei uwei baroh ha la ka jong ka jong ka jingkhang jong ka ïingjaiñ, bad ki la ïakhmih ïa u Moses, haduh ba u la leit hapoh kata Ka Tabernakl.

⁹ Te haba u Moses u la leit bsut ha kata Ka Tabernakl, uta u rishot lyoh u la hiar bad u la ïeng hajan ka jingkhang kata Ka Tabernakl: bad U Trai u la kren ha u Moses.

¹⁰ Bad uta u paidbah baroh u la ïohi ïa uta u rishot lyoh ba u ïeng ha ka jingkhang Ka Tabernakl; bad uta u paidbah u la ïakhie buk bad ki la ïamane uwei pa uwei keiñ, ha ka jingkhang la ka ïingjaiñ.

¹¹ Te U Trai u la ïakren markhmat bad u Moses, kumba u briew u ju kren bad la u lok. Te u la leit phai noh pat sha kata ka dara; hynrei, u shakri jong u, u Joshua, u khun u Nun, u samla, um shym la kynriah shuh na kata Ka Tabernakl.

Ka jingkular ïa ka jingdon ryngkat U Blei

¹² Te u Moses u la ong ha U Trai, “Ha khmih, me la ong ha nga, ‘To ïalam artet ïa une u paidbah:’ bad mem shym la pyntip ïa nga ïano men phah ryngkat bad nga. Pynban me la ong, ‘Nga ithuh ïa me da ka kyrteng, bad me la shem ruh ka jingsngewbha ha khmat jong nga.’

¹³ Mynta, namar kata, nga kyrpad ïa me, lada nga la shem ïa ka jingsngewbha ha khmat jong me, to pyni ha nga ïa ka lynti jong me, ba ngan ïoh ithuh ïa me, bad ba ngan ïoh shem ïa ka jingsngewbha ha khmat jong me: to khmih ruh ba kane ka jaid bynriew ka long u paidlang jong me.”

¹⁴ U te u la ong, “Ka khmat jong nga kan leit lem bad me bad ngan ai ka jingshongthait ruh ïa me.”

¹⁵ Ynda kumta, u la ong ha u, “Lymda leit ka khmat jong me lem bad ngi, te wat ïalam shuh ïa ngi nangne.

¹⁶ Naba da kumno yn tip hangne ba ma nga bad u paidlang jong me, ngi la shem ïa ka jingsngewbha ha khmat jong me? ym dei da kaba leit ma me ryngkat bad ngi, ba kumta, ma nga bad u paidlang jong me ngin sa long kiba la kyrpang na ki briew baroh kiba ha ka khmat ka pyrthei.”

¹⁷ Te U Trai u la ong ha u Moses, “Ngan leh ïa kane ruh ïa kaba me la kren: naba me la ïoh shem ka jingsngewbha ha khmat jong nga, bad nga ithuh ïa me da ka kyrteng.”

¹⁸ U te u la ong, “Nga kyrpad ïa me, to pyni ha nga ïa ka burom jong me.”

¹⁹ Te u la ong, “Ïa ka jingbha jong nga baroh ngan pynïaid ha shuwa jong me, bad ngan pynbna ïa ka kyrteng jong U Trai ha shuwa jong me; bad ngan ai ei ha uba ngan ai ei, bad ngan isynei ïa uba ngan isynei.”

²⁰ U la ong ruh, “Mem lah ban ïohi ïa ka khmat jong nga: naba u briew um lah keiñ ban ïohi ïa nga bad ba un im.”

²¹ Te U Trai u la ong ruh, “Ha khmih, don ka jaka hajan jong nga, ha kaba men ïeng halor u mawsiang;

²² te kan jia, katba ka burom jong nga ka ïaid lait, ba ngan buh ïa me hapoh ka krem jong uta u mawsiang, bad ngan tap ïa me da ka kti jong nga, katba nga dang ïaid lait;

²³ ynda kumta, ngan weng noh ïa ka kti jong nga, te men ïohi ïa ka ingdong jong nga: hynrei, ïa ka khmat jong nga, yn ym ïohi keiñ.”