EKSODOS 32 - KA BAIBL

¹ Te haba uta u paidlang u la ïohi ba u Moses u tud ban wan hiar na uta u lum, uta u paidlang u la ïalum lang ha u Aaron, bad u la ong ha u, “To ïeng, to thaw blei ïa ngi, ban leit sha shuwa jong ngi; naba une u Moses, uta u briew keiñ uba la wallam artet ïa ngi na ka ri Ijipt, ngim tip shuh la jia aïu ïa u.”

² Te u Aaron u la ong ha ki, “To law noh ïa ki jingdeng ksiar kiba ha ki shkor ki tnga jong phi, bad ïa ki jong ki khun shynrang jong phi, bad ïa ki jong ki khun kynthei jong phi, bad to wallam ïa ki ha nga.”

³ Te uta u paidlang baroh u la ïalaw noh ïa kita ki jingdeng ksiar kiba ha ki shkor jong ki, bad ki la ïawallam ha u Aaron.

⁴ Haba u la pdiang te ïa ki na ki kti jong ki, u la pynlong dur da ka atiar, bad u la thaw khun masi da kaba shu saiñ: ki la ïa-ong te, “Une u long u blei jong me, A Israel, uba la wallam artet ïa me na ka ri Ijipt.”

⁵ Te haba u Aaron u la ïohi ïa kane, u la tei ïa ka duwan ha khmat jong u: bad u Aaron u la pynbna, u da ong, “Lashai kan long ka jingkhawai ha U Trai.”

⁶ Te la dang step ki la ïakhie, bad ki la kñia ïa ki jingkñia thang, bad ki la ïawallam ïa ki jingkñia bapynïasuk; ynda kumta, kita ki paidlang ki la ïashong ban bam bad ban dih, bad ki la ïaïeng joit ban ïalehkai.

⁷ Te U Trai u la ong ha u Moses, “To khie leit da hiar noh; naba uta u paidbah jong me, ïa uba me la wallam noh artet na ka ri Ijipt, u la pynsniew ïa lade;

⁸ ki la ïaid sakma noh kloi na kata ka lynti ïa kaba nga la hukum ïa ki: ki la ïathaw dur khun masi ba la shu saiñ ha ki, bad ki la ïamane ïa u, ki la ai jingkñia ruh ha uta, bad ki la ïa-ong, ‘Une u blei jong me, A Israel, uba la wallam noh artet ïa me na ka ri Ijipt.’ ”

⁹ Bad U Trai u la ong ruh ha u Moses, “Nga la ïohi ïa une u paidlang, bad ha khmih, u long u paidlang uba eh ryndang;

¹⁰ Namar kata, to iehnoh ïa nga mynta, ba ka jingbitar jong nga kan ïoh meh buk pyrshah ïa ki, bad ba ngan ïoh pynduh noh khoit ïa ki: bad ngan pynlong ïa me ïa ka jaid bynriew bakhraw.”

¹¹ Te u Moses u la kyrpad ha khmat U Trai U Blei jong u, u da ong, “A Trai, balei ba ka jingbitar jong me kan meh buk pyrshah ïa u paidlang jong me, ïa uba me la wallam noh na ka ri Ijipt da ka borbah bad da ka kti badonbor?

¹² Balei ba kita ki Ijipt kin ïoh kren, da kaba ong, ‘Khnang ïa ka ban tyllep u la ïalam noh ïa ki, ban pynïap ïa ki ha ki lum, bad ban pynjot noh khoit keiñ ïa ki na khmat ka pyrthei?’ To phai noh na ka jingbitar ba-itieng jong me, to kylla noh ruh na kane ka basniew pyrshah ïa u paidlang jong me.

¹³ To kynmaw ïa la ki shakri, ïa u Abraham, ïa u Isaak, bad ïa u Israel, ha kiba me la smai da lade hi, bad me la ong ha ki, ‘Ngan pynroi ïa u symbai jong phi kat ki khlur ka bneng, bad ïa kane ka ri baroh shaphang kaba nga la kren, ngan ai ha u symbai jong phi, bad kin ïaïoh pateng ïa ka ha la ka rta.’ ”

¹⁴ Ynda kumta, U Trai u la kylla noh na kata ka basniew ïa kaba u la thmu ban leh ha u paidlang jong u.

¹⁵ Te u Moses u la phai, bad u la leit hiar arsut na uta u lum, bad kita ki ar tylli ki maw lyngkniap jong ka jingphla ha ka kti jong u; kine ki maw lyngkniap ïa kiba la thoh halor baroh ar liang jong ki; halor baroh ar liang keiñ, la thoh ïa ki.

¹⁶ Bad kita ki maw lyngkniap ki la long ka jingthaw jong U Blei, bad ka jingthoh ruh ka la long ka jingthoh jong U Blei, ïa kaba la mut halor kita ki maw lyngkniap.

¹⁷ Te haba u Joshua u la ïohsngew ïa ka jingsawa uta u paidbah katba ki ïarisa kynha, u la ong ha u Moses, “Don ka jingsawa kum ka thma ha kata ka dara.”

¹⁸ U te u la ong, “Kata kam long ka jingsawa kiba ïarisa na ka bynta kaba jop, lymne kam long ka jinglynñiar kiba ïashah jop; hynrei, ïa ka jingsawa kiba ïarwai ba nga ïohsngew keiñ.”

¹⁹ Ka la jia te, katba u la wan hajan ka jaka shong dara, u la ïohi ïa uta u khun masi bad ïa kata ka jingshad; te ka jingbitar u Moses ka la khie buk, bad u la bred noh dak ïa kita ki maw lyngkniap na ka kti jong u, bad u la lympat ïa ki ha trai uta u lum.

²⁰ Bad u Moses u la shim ïa uta u khun masi ïa uba ki la thaw, bad u la saiñ ïa u ha ka ding, bad u la pynlwet jin ïa u, bad u la ber ïa ka ruh halor ka um, bad u la pyndih ïa ki khun Israel na ka.

²¹ Te u Moses u la kylli ïa u Aaron, “U la leh aïu une u paidbah ïa me, ba me la wallam ïa ka pop bakhraw kat kane halor jong ki?”

²² Te u Aaron u la ïathuh, “Wat ai ba kan meh buk ka jingbitar u kynrad jong nga: me ithuh ïa une u paidlang, ba u dap keiñ da ka basniew.

²³ Namar ki la ïa-ong ha nga, ‘To thaw blei ïa ngi, ba un leit ha shuwa jong ngi: naba une u Moses, uta u briew uba la wallam noh artet ïa ngi na ka ri Ijipt, ngim tip shuh la jia aïu ïa u.’

²⁴ Te nga la ong ha ki, ‘Jar uba don ka ksiar, to law noh;’ kumta keiñ ki la ïa-ai ha nga: bad nga la bred te ïa ka ha ka ding, te la mih noh da une u khun masi.”

²⁵ Te haba u Moses u la ïohi ïa uta u paidbah ba ki lyngkhuit, naba u Aaron u la lah pynlyngkhuit ïa ki, ïa ka ban pynjahburom ïa ki hapdeng ki nongshun jong ki,

²⁶ kumta, u Moses u la ïeng ha ka khyrdop ka jaka shong dara, bad u la ong, “Jar uba ha ka liang U Trai, to un wan ha nga.” Te ki khun shynrang jong u Lebi baroh ki la ïalum lang ha u.

²⁷ Te u la ong ha ki, “Kumne u ong U Trai, U Blei jong u Israel, ‘To kieng u shynrang baroh ïa la ka waitlam ha la ka syngkai, bad to khie ruh shapoh bad shabar na kawei ka khyrdop sha kawei pat ka khyrdop jong kata ka dara, bad to pynïap noh ruh man u briew ïa la u para, bad man u briew ïa la u lok, bad man u briew ïa la u paramarjan.’ ”

²⁸ Te ki khun shynrang u Lebi ki la leh kumba u la ong u Moses: te ha kata ka sngi la kyllon ïap na uta u paidbah kumba lai hajar ki rangbah.

²⁹ Bad u Moses u la ong, “To pynkyntang ïa lade ha kane ka sngi ha U Trai, u briew baroh keiñ pyrshah ïa la u khun, bad pyrshah ïa la u para; ba ha kane ka sngi un ïoh ai ka jingkyrkhu halor jong phi.”

³⁰ Te ha kaba lashai, u Moses u la ong ha uta u paidbah, “Phi la leh ïa ka pop kaba khraw eh: mynta te ngan sa leit kiew sha U Trai; lehse nga lah ban pynlong ïa ka jingpynïasuk namar ka pop jong phi.”

³¹ Kumta, u Moses u la leit phai sha U Trai, bad u la ong, “A, une u paidlang u la leh ïa ka pop ka bakhraw eh, bad ki la ïathaw blei da ka ksiar ha ki.

³² Hynrei mynta, lada men map ïa ka pop jong ki — te lada da kumwei, to pyndam noh ïa nga, nga kyrpad ïa me, na kata ka kitab jong me ïa kaba me la thoh.”

³³ Te U Trai u la ong ha u Moses, “Jar uba la leh pop pyrshah ïa nga, ïa uta keiñ ngan pyndam noh na ka kitab jong nga.

³⁴ Namar kata, to khie leit mynta, to ïalam ma me ïa uta u paidbah sha kata ka jaka ïa kaba nga la ong ha me; ha khmih, u angel jong nga un ïaid ha shuwa jong me: hynrei, ha kata ka sngi ba ngan da wan khmih, ngan pynwan keiñ ïa ka pop jong ki halor jong ki hi.”

³⁵ Te U Trai u la pynïapthem ïa uta u paidbah, namar ba ki la ïathaw ïa uta u khun masi, ïa uba u Aaron u la thaw.