EKSODOS 31 - KA BAIBL

Kaba khot ïa u Besalil bad ïa u Aholiab

¹ Bad U Trai u la kren ha u Moses, u da ong,

² “Ha khmih, nga la khot da ka kyrteng ïa u Besalil u khun u Uri, u khun u Hur, na ka jaid Judah;

³ bad nga la pyndap ïa u da U Mynsiem U Blei, ha ka jingstad, bad ha ka jingshemphang, bad ha ka jingtip, bad ha ki kynja jingtrei baroh,

⁴ ïa ka ban pyrkhat ïa ki kam bastad, ïa ka ban trei ha ka ksiar, bad ha ka rupa ruh, bad ha ka tama de,

⁵ bad ha ka buit stad ban shtah ïa ki maw ban thep ïa ki, bad ha kaba mut ha ki dieng ïa ka ban trei ha ka kynja jingtrei baroh.

⁶ Ha khmih te, ma nga, nga la ai lem bad u ïa u Aholiab, u khun u Ahisamakh, na ka jaid Dan; bad ha ka dohnud jong kita ki bastad dohnud baroh nga la buh ïa ka jingstad, ïa ka ban thaw ïa kita baroh ïa kiba nga la hukum ïa me:

⁷ ïa Ka Tabernakl ka jingïaseng, bad ïa ka synduk ka jingphla, bad ïa ka jingtap-isynei kaba halor jong ka, bad ïa ki jingbuh Ka Tabernakl baroh,

⁸ bad ïa ka miej ruh bad ïa ki jingbuh jong ka, bad ïa ka dieng pynïeng sharak bakhuid lem bad ki jingbuh jong ka baroh, bad ïa ka duwan ka jingiwbih thang ruh,

⁹ bad ïa ka duwan ka jingainguh thang lem bad ki jingbuh jong ka baroh, bad ïa ka dabor bad ïa ka sla'jat jong ka,

¹⁰ bad ïa ki jaiñ ïa ka kam, bad ïa ki jaiñkup bakyntang ïa u Aaron lyngdoh, bad ïa ki jaiñkup ki khun shynrang jong u, ïa ka ban kam ha ka kam lyngdoh;

¹¹ bad ïa ka umphniang bapynsleh, bad ïa ka jingiwbih thang baiwbih ïa ka jaka kyntang: kin leh ïa kita baroh keiñ kat kumba nga la hukum ïa me.”

Ka Sabbaton kum ka dak

¹² Bad U Trai u la kren ha u Moses, u da ong,

¹³ “To kren ruh ha ki khun Israel, da kaba ong, ‘Shisha phin rakhe ïa ki Sabbaton jong nga: naba ka long ka dak hapdeng jong nga bad phi ha ki pateng la pateng bynriew jong phi baroh; ïa ka ban ïoh tip ba long ma nga U Trai uba pynkyntang ïa phi.

¹⁴ Namar kata, to sumar ïa ka Sabbaton; naba ka long ka bakhuid ïa phi: jar uba pyntngit ïa ka, ka dei shisha ban pynïap noh ïa u; naba uno uno ruh uba trei jingtrei ha ka, ïa kata ka mynsiem yn ot noh keiñ napdeng u paidlang jong u.

¹⁵ Hynriew sngi ka dei ban trei jingtrei; hynrei, ha ka sngi ka bahynñiew ka long ka Sabbaton ka jingshongthait, ka bakhuid ïa U Trai: jar uba trei jingtrei ha ka sngi Sabbaton, yn pynïap noh shisha ïa u.

¹⁶ Namar kata, ki khun Israel kin ïasumar ïa ka Sabbaton, da kaba rakhe ïa ka Sabbaton ha ki pateng la pateng bynriew jong ki, kum ka jutang ha la ka rta.

¹⁷ Hapdeng jong nga bad ki khun Israel, kane ka long ka dak ha la ka rta: ba ha ka bahynriew sngi, U Trai u la thaw ïa ka bneng bad ïa ka khyndew, bad ha ka sngi ka bahynñiew u la shong sngi, bad u la shong pyngngad.’ ”

U khun masi ksiar

¹⁸ Ynda U la wai noh ban kren ha u Moses ha u lum Sinai, U la ai ha u ar tylli ki maw lyngkniap jong ka jingphla, ki maw lyngkniap ba la thoh keiñ da ka shynriah'ti U Blei.