EKSODOS 30 - KA BAIBL

Ka Duwan ka jingiwbih

¹ “To men thaw ïa ka duwan ïa ka ban thang ïa ka jingiwbih thang: da u dieng Shittim keiñ men thaw ïa ka.

² Shi pruh, kan long ka lynter jong ka, bad shi pruh, ka pyngkiang jong ka; kaba sawdong kan long: ka jingjrong jong ka, ar pruh: ki reng jong ka na ujuh.

³ Bad men suit ïa ka da ka ksiar banylla, ïa ka neng jong ka, bad ïa ki krung jong ka baroh sawdong, bad ïa ki reng jong ka ruh; bad men thaw ïa ka pansngiat ksiar ïa ka baroh sawdong.

⁴ Men thaw ruh ar tylli ki kyrwoh ksiar ïa ka hapoh kata ka pansngiat jong ka, ha ki ar tylli ki dong jong ka, ha baroh ar ki krung jong ka men thaw keiñ ïa ki; te kin long ki jaka ïa ki dieng jingbah ïa ka ban bah ïa ka da ki.

⁵ Bad men thaw ruh ïa kita ki dieng jingbah da u dieng Shittim, bad men suit ïa ki da ka ksiar.

⁶ Bad men buh ïa ka ha khmat kata ka jingkah kaba hajan ka synduk ka jingphla, ha khmat kata ka jingtap-isynei kaba halor kata ka jingphla, ha kaba ngan ïashem bad me.

⁷ Bad u Aaron un thang halor jong ka, ïa ka jingiwbih thang da ki musla man ka step: haba u shna ïa ki sharak, un thang ïa ka jingiwbih thang halor jong ka,

⁸ bad haba u Aaron u tbeh ïa kita ki sharak la janmiet ruh, un thang ïa ka jingiwbih thang halor jong ka, ka jingiwbih thang keiñ kaba ha la ka sngi ha khmat U Trai ha ki pateng la pateng bynriew jong phi.

⁹ Wat thang halor jong ka, ïa ka jingiwbih thang bapher, lymne ïa ka jingkñia thang, lymne ïa ka jingainguh bam; lymne wat theh phi halor jong ka, ïa ka jingainguh dih.

¹⁰ Bad u Aaron un pynlong ïa ka jingkñia bapynïasuk halor ki reng jong ka, shi sien shi snem: da ka snam kata ka jingkñia sait pop bapynïasuk, shi sien shi snem keiñ, un pynlong ïa ka kuna halor jong ka ha ki pateng la pateng bynriew jong phi: ka long ka bakyntang tam ïa U Trai.”

Ka kuna na ka bynta ki mynsiem

¹¹ Bad U Trai u la kren ha u Moses, u ong,

¹² “Haba me ñiew ïa kita kiba dei ban ñiew na ki khun Israel, te kin sa ai uwei baroh na ka bynta la ka mynsiem ïa ka kuna ha U Trai, haba me ñiew keiñ ïa ki; ba kan ym long ka jingïapthem hapdeng jong ki, haba me ñiew ïa ki.

¹³ Ïa kane kin sa ai, uwei uwei baroh hapdeng jong kita ba la hap ñiew, shiteng shekel katba kum ka shekel ka jaka kyntang: (ka shekel ka long arphew gerah) ka shiteng shekel kan long kata ka jingainguh ïa U Trai.

¹⁴ Uwei uwei baroh uba la hap ñiew hapdeng jong ki, naduh uba arphew snem ka rta bad ba tam, un ai ïa ka jingainguh ïa U Trai.

¹⁵ U bariewspah un ym ai tam, bad u baduk un ym ai duna ïa kata ka shiteng shekel, haba ki ai ka jingainguh ïa U Trai, ïa ka ban pynlong ïa ka kuna na ka bynta ki mynsiem jong phi.

¹⁶ Bad men shim ïa kita ki sbai kuna na ki khun Israel, bad men buh ïa ki na ka bynta ka kam Ka Tabernakl jong ka jingïaseng; khnang ba kan long ka jingpynkynmaw ïa ki khun Israel ha khmat U Trai, ïa ka ban pynlong ïa ka kuna na ka bynta ki mynsiem jong phi.”

Ka dabor tama

¹⁷ Bad U Trai u la kren ha u Moses, u da ong,

¹⁸ “To men thaw ruh ïa ka dabor tama, bad ïa ka sla'jat jong ka ruh da ka tama, ïa ka ban sait ha ka: bad men buh ïa ka hapdeng Ka Tabernakl ka jingïaseng bad kata ka duwan, bad men theh um ruh ha ka,

¹⁹ bad u Aaron bad ki khun shynrang jong u kin thet ïa la ki kti bad sait ïa la ki sla'jat ha ka.

²⁰ Haba kin sa leit rung hapoh Ka Tabernakl ka jingïaseng, kin sait da ka um, ba kin ym ïap; lane haba ki wan hajan ka duwan ïa ka ban kam, ban thang ïa ka jingkñia thang ha U Trai.

²¹ Kumta kin thet keiñ ïa la ki kti bad sait ïa la ki sla'jat, ba kin ym ïap noh: kane te kan long ka hukum ha la ka rta ïa ki; ïa u keiñ bad ïa u symbai jong u ha ki pateng la pateng bynriew jong ki.”

Ka umphniang ban pynsleh bad ka jingiwbih

²² U Trai u la kren pat ha u Moses, u da ong,

²³ “To shim ruh ha me ïa ki jingiwbih bakordor, na ka mirr basngur, sanspah shekel; bad na ka sisia bathiang, shiteng na kata, arspah sanphew shekel keiñ; bad na ka kalamis bathiang, arspah sanphew shekel;

²⁴ bad na ka kassia, sanspah shekel; katba kum ka shekel ka jaka kyntang, bad na ka umphniang Olib, shi hin;

²⁵ bad men thaw da ki, ïa ka umphniang bapynsleh bakhuid, ïa ka umphniang ba la ïakhleh keiñ kum ka rukom u apothekari: kan long ka umphniang bakhuid ïa ka ban pynsleh.

²⁶ Men pynsleh ruh da ka, ïa Ka Tabernakl ka jingïaseng, bad ïa ka synduk ka jingphla,

²⁷ ïa ka miej ruh bad ïa ki pliang jong ka baroh, bad ïa ka dieng pynïeng sharak bad ïa ki pliang jong ka baroh, bad ïa ka duwan ka jingiwbih thang de,

²⁸ bad ïa kata ka duwan ka jingainguh thang ruh lem bad ki pliang jong ka baroh, bad ïa ka dabor bad ïa ka sla'jat jong ka;

²⁹ to men pynkyntang ïa ki de, ba kin ïoh long ki bakyntang tam: baroh kat kaba pyndei ïa ki, kan long ka bakyntang keiñ.

³⁰ Bad men pynsleh ruh ïa u Aaron bad ïa ki khun shynrang jong u, bad men pynkyntang ïa ki, ba kin ïoh kam ha nga ha ka kam lyngdoh.

³¹ Men kren te ha ki khun Israel, da kaba ong, ‘Kane kan long ha nga ka umphniang bakhuid ïa ka ban pynsleh ha ki pateng la pateng bynriew jong phi.

³² Wat pynsleh da ka, ïa ka met u briew, lymne ha ka rukom jingkhleh jong ka wat thaw da kawei pat kaba syriem ïa ka: ka long ka bakyntang, bad kan long ka bakyntang keiñ ha phi.

³³ Jar uba khleh ïa kaba kum kane, lane jar uba buh na ka ha u nongwei, yn ot noh keiñ ïa uta napdeng u paidlang jong u.’ ”

³⁴ U Trai u la kren ruh ha u Moses, “To shim ha me ïa ki jingiwbih bathiang, ïa ka stakte, bad ïa ka onikha bad ïa ka galbanam; ïa kine ki musla bathiang lem bad ka luban: na kawei kawei men shim kumjuh.

³⁵ Bad men thaw da ki, ïa ka jingiwbih thang, ka jingiwbih keiñ kum ka rukom u apothekari, ïa kaba la ïakhleh mluh, ka bakhuid bad ka bakyntang;

³⁶ bad men shoh lwet eh khyndiat na ka, bad men buh ïa ka ha khmat ka jingphla ha Ka Tabernakl ka jingïaseng, ha kaba ngan ïashem bad me: kan long ha phi ka bakyntang tam eh.

³⁷ Te kata ka jingiwbih thang ïa kaba phin thaw, wat thaw ïa lade keiñ kum kata ka rukom jong ka; kan long ïa phi ka bakyntang ïa U Trai.

³⁸ Jar u ban thaw ïa kum kata, ïa ka ban iw ïa ka, yn ot noh ïa uta napdeng u paidlang jong u.”