EKSODOS 29 - KA BAIBL

Ka jingpynkyntang ïa u Aaron bad ïa ki khun shynrang jong u

¹ “Kumne te men leh ïa ki, ïa ka ban pynkyntang ïa ki, ïa ka ban kam ha nga ha ka kam lyngdoh: To shim uwei u masi lyngraw bad ar tylli ki langbrot shynrang bajanai,

² lem bad u kpu bakhlem thiat, bad ki 'pu stang ruh bakhlem thiat ba la ïakhleh da ka umphniang, bad ki 'putharo bakhlem thiat ba la kyllan da ka umphniang; da u 'pu Kew keiñ men thaw ïa ki.

³ Men thep ïa ki ruh ha kawei ka shang, bad to wallam ïa ki ha kata ka shang, lem bad uta u masi lyngraw bad kita ki ar tylli ki langbrot shynrang.

⁴ To ïalam ruh ïa u Aaron bad ïa ki khun shynrang jong u ha ka jingkhang Ka Tabernakl ka jingïaseng, bad to men sait ïa ki da ka um.

⁵ Bad men shim ïa kita ki jaiñkup, bad pynphong ha u Aaron ïa kata ka sopti, bad ïa kata ka barandi jong ka ephod, bad ïa kata ka ephod, bad ïa kata ka jingdeng shadem, bad to pynpanpoh ïa u da ka jingpanpoh ba la pynpur jong ka ephod;

⁶ bad men pynphong ïa kata ka meitr ha ka khlieh jong u, bad to buh ruh ïa kata ka pansngiat bakhuid halor kata ka meitr.

⁷ Ynda kumta, men shim ïa ka umphniang bapynsleh, bad to theh ïa ka ruh halor ka khlieh jong u, bad pynsleh ïa u.

⁸ Bad men wallam ïa ki khun shynrang jong u, bad men pynphong ki sopti ïa ki.

⁹ Bad men pynpanpoh ïa ki da ki jingpanpoh, ïa u Aaron keiñ bad ïa ki khun shynrang jong u, bad men pynphong ïa ki da kita ki tupia: bad kata ka kam lyngdoh ruh kan ïailong ka jong ki da ka hukum pateng la pateng: bad men pynkyntang ruh ïa u Aaron bad ïa ki khun shynrang jong u.

¹⁰ “Bad men phah lam ïa uta u masi lyngraw ha khmat Ka Tabernakl ka jingïaseng: bad u Aaron bad ki khun shynrang jong u kin ïabuh ïa la ki kti halor ka khlieh jong uta u masi lyngraw.

¹¹ To men pynïap te ïa uta u masi lyngraw ha khmat U Trai, hajan ka jingkhang Ka Tabernakl ka jingïaseng.

¹² To men shim de na ka snam uta u masi lyngraw, bad to buh ïa ka ha ki reng jong ka duwan da ka shynriah'ti jong me; bad to theh ïa kata ka snam baroh ha syndah ka trai kata ka duwan.

¹³ Bad men shim ïa ka khleiñ baroh de kaba tap ïa ki snier, bad ïa ka sbiar kaba haneng u dohnud, bad ïa ki khyllai baroh ar, bad ïa ka khleiñ kaba halor jong ki, bad to thang ïa ki halor kata ka duwan.

¹⁴ Hynrei, ïa ka doh uta u masi lyngraw, bad ïa ka snieh jong u de, bad ïa ka eit jong u, men thang ha ka ding shabar ka dara: ka long ka jingkñia namar ka pop.

¹⁵ “To men shim ruh ïa uwei u langbrot; bad u Aaron bad ki khun shynrang jong u kin ïabuh ïa la ki kti halor ka khlieh uta u langbrot,

¹⁶ bad men pynïap ïa uta u langbrot, bad men shim ruh ïa ka snam jong u, bad to synreit ïa ka halor kata ka duwan baroh sawdong.

¹⁷ Bad men ot lyngkhot lyngkhot ïa uta u langbrot, to sait ruh ïa ki snier jong u, bad ïa ki kjat jong u, bad to buh ïa ki ruh lem bad kita ki dkhot jong u, bad ka khlieh jong u.

¹⁸ Men thang ruh ïa uta u langbrot baroh halor kata ka duwan: ka long ka jingainguh thang ïa U Trai: ka long ka jingiw baiwbih, ka jingainguh keiñ kaba da ka ding ha U Trai.

¹⁹ “Men shim ruh ïa uta uwei pat u langbrot; bad u Aaron bad ki khun shynrang jong u kin ïabuh ïa la ki kti halor ka khlieh uta u langbrot;

²⁰ hadien kata, men pynïap ïa uta u langbrot, bad men shim na ka snam jong u, bad tah halor ka sohlah shkor kamon jong u Aaron, bad halor ka sohlah shkor kamon ki khun shynrang jong u, bad halor ka 'ti kmie ka kti kamon jong ki, bad halor ka 'jat kmie ka sla'jat kamon jong ki, bad to synreit ïa ka snam baroh sawdong halor kata ka duwan.

²¹ Bad men shim na kata ka snam kaba halor kata ka duwan, bad na kata ka umphniang bapynsleh, bad to synreit halor u Aaron, bad halor ki jaiñkup jong u, bad halor ki khun shynrang jong u, bad halor ki jaiñkup ki khun shynrang jong u lem bad u; kumta keiñ, yn pynkyntang khuid ïa u, bad ïa ki jaiñkup jong u, bad ïa ki khun shynrang jong u, bad ïa ki jaiñkup ki khun shynrang jong u lem bad u.

²² “Bad na uta u langbrot ruh men shim ïa ka khleiñ, bad ïa ka dongnai, bad ïa ka khleiñ kaba tap ïa ki snier ruh, bad ïa ka sbiar kaba haneng u dohnud, bad ïa ki khyllai baroh ar, bad ïa ka khleiñ ruh kaba halor jong ki, bad ïa ka kti kamon de; namar u long u langbrot ka jingpynkyntang keiñ,

²³ bad ïa uwei u kpu, bad ïa uwei u 'pu stang ba la khleh umphniang, bad ïa uwei u 'putharo na kata ka shi shang u kpu bakhlem thiat uba ha khmat U Trai,

²⁴ te men buh ïa kita baroh ha ki kti u Aaron, bad ha ki kti ki khun shynrang jong u; bad men pynkaweh ïa ki ban long ka jingainguh kaweh ha khmat U Trai.

²⁵ Bad men shim ïa ki na ki kti jong ki, bad to thang ïa ki halor kata ka duwan ïa ka ban long ka jingainguh thang, ka jingiw baiwbih keiñ ha khmat U Trai: ka long keiñ ka jingainguh kaba da ka ding ha U Trai.

²⁶ “Bad men shim ïa ka shadem uta u langbrot ka jingpynkyntang jong u Aaron, bad to kaweh ïa ka, ïa ka ban long ka jingainguh kaweh ha khmat U Trai: bad kata kan long ka bynta jong me.

²⁷ Men pynkyntang ruh ïa kata ka shadem jong ka jingainguh kaweh, bad ïa kata ka kti jong kata ka jingainguh bakyntiew, ïa kaba la kaweh, bad ïa kaba la pynkyntiew, na ka jong uta u langbrot ka jingpynkyntang, na kata keiñ kaba na ka bynta u Aaron, bad na kata kaba na ka bynta ki khun shynrang jong u.

²⁸ Kan long ruh ka jong u Aaron bad ka jong ki khun shynrang jong u da ka hukum ha la ka rta na ki khun Israel: naba ka long ka jingainguh bakyntiew; bad kan long ruh ka jingainguh bakyntiew na ki khun Israel kaba na ki jingkñia ki jingainguh bapynïasuk jong ki, kata ka long ka jingainguh bakyntiew jong ki ha U Trai.

²⁹ “Bad kita ki jaiñ bakyntang jong u Aaron kin long ki jong ki khun shynrang jong u hadien jong u, ha kita yn pynsleh ïa ki, bad ha kita yn pynkyntang ruh ïa ki.

³⁰ Bad uta u khun jong u uba long u lyngdoh ha ka jaka jong u un phong ïa kita hynñiew sngi, haba u wan ha Ka Tabernakl ka jingïaseng ïa ka ban shakri ha kata ka jaka bakyntang.

³¹ “Men shim ruh ïa uta u langbrot ka jingpynkyntang, bad to shet ïa ka doh jong u ha kata ka jaka bakyntang.

³² Bad u Aaron bad ki khun shynrang jong u kin ïabam ïa ka doh jong uta u langbrot, bad ïa uta u kpu uba ha kata ka shang, hajan ka jingkhang Ka Tabernakl ka jingïaseng.

³³ Bad kin ïabam ïa kita kiei kiei ruh da kiba la pynlong ïa ka kuna, ïa ka ban pynkyntang bad ban pynkhuid ïa ki: hynrei, u nongwei un ym ïoh bam na kita, naba ki long ki bakyntang khuid.

³⁴ Te lada don kaei kaei ruh na ka doh jong kita ki jingpynkyntang, lane na uta u kpu, kiba sah haduh mynstep, men thang ïa kata kaba sah ha ka ding: yn ym bam ïa ka, naba ka long ka bakyntang khuid.

³⁵ “Kumne te, to leh ha u Aaron, bad ha ki khun shynrang jong u, kat kiei kiei baroh ïa kiba nga la hukum ïa me: hynñiew sngi men pynkyntang ïa ki.

³⁶ Bad men kñia ha la ka sngi ïa uwei u masi lyngraw ïa ka ban long ka kuna namar ka pop ïa ka ban pynïasuk: bad men pynkhuid ruh ïa kata ka duwan, ynda me la pynlong ïa ka kuna na ka bynta jong ka; bad to pynsleh ïa ka, ïa ka ban pynkyntang ïa ka.

³⁷ Hynñiew sngi men pynlong ïa ka kuna na ka bynta kata ka duwan, bad men pynkyntang ïa ka: te kan long ka duwan ba la kyntang tam eh: kaei kaei baroh ba pyndei ïa kata ka duwan kan long bakyntang.

Ka jingpynkyntang kaba ha la ka sngi

³⁸ “Te ïa kane to men ainguh halor kata ka duwan; ïa ar tylli ki khun langbrot kiba shi snem man la ka sngi khlem da pud.

³⁹ Ïa uwei u khun langbrot men ainguh mynstep, bad ïa uwei pat men ainguh la janmiet:

⁴⁰ lem bad uwei u khun langbrot ruh men ïakhleh shi bynta na kaba shiphew ephah u 'purew, lem bad shi pawa hin ka umphniang ba la tylliat; bad shi pawa hin ka Waiñ ruh ban long ka jingainguh dih.

⁴¹ Bad ïa uta uwei pat u khun langbrot men ainguh la janmiet, men leh ha u ruh kumba ha kata ka jingainguh bam kaba mynstep, bad katba kum ka jingainguh dih jong ka, ïa ka ban long ka jingiw baiwbih, ka jingainguh kaba da ka ding keiñ ha U Trai.

⁴² Kane kan long ka jingainguh thang ha la ka sngi ha ki pateng la pateng bynriew jong phi baroh hajan ka jingkhang Ka Tabernakl ka jingïaseng ha khmat U Trai: ha kaba ngan ïashem bad phi, ïa ka ban kren hangta ha me.

⁴³ Hangta ruh, ngan ïashem bad ki khun Israel; ïa Ka Tabernakl de yn pynkyntang khuid da ka burom jong nga.

⁴⁴ Ngan pynkyntang ruh ïa Ka Tabernakl ka jingïaseng, bad ïa kata ka duwan: bad ngan pynkyntang ïa u Aaron bad ïa ki khun shynrang jong u, ba kin kam ha nga ha ka kam lyngdoh.

⁴⁵ Ngan shong duh ruh hapdeng ki khun Israel, bad ngan long U Blei jong ki.

⁴⁶ Kin sa tip ruh ba nga long ma nga, U Trai U Blei jong ki, uba la wallam noh ïa ki na ka ri Ijipt, ba ngan ïoh shong duh hapdeng jong ki; nga long ma nga keiñ, U Trai U Blei jong ki.