EKSODOS 28 - KA BAIBL

Ka jaiñphong na ka bynta ki lyngdoh

¹ “Bad to shim ha me ïa u Aaron u hynmen jong me, bad ïa ki khun shynrang jong u lem bad u, napdeng ki khun Israel, ïa ka ban kam ïa ka kam lyngdoh ïa nga, ïa u Aaron keiñ, ïa u Nadab, bad ïa u Abihu, ïa u Eleasar bad ïa u Ithamar, ki khun shynrang jong u Aaron.

² Men thaw ruh ïa ki jaiñkup bakyntang ïa u Aaron u hynmen jong me, na ka bynta ka burom bad na ka bynta ka jingitynnad.

³ Men kren ruh ha kita baroh kat ki bastad ka dohnud, ïa kiba nga la pyndap da ka mynsiem ka jingstad, ba kin ïathain ïa ki jaiñkup ïa u Aaron ïa ka ban pynkyntang ïa u, ban kam ïa ka kam lyngdoh ïa nga.

⁴ Te kine ki long kita ki jaiñkup ba kin ïathain; ïa ka jingdeng shadem, bad ïa ka ephod, bad ïa ka barandi, bad ïa ka sopti ba la pynpur, ïa ka meitr, bad ïa ka jingpanpoh ruh: kumta keiñ, kin ïathaw ïa ki jaiñkup bakyntang ïa u Aaron u hynmen jong me, bad ïa ki khun shynrang jong u, ïa ka ban kam ïa ka kam lyngdoh ïa nga.

⁵ “Kin shim te ïa ka ksiar, bad ka babyrïong, bad ka basaw bthuh, bad ka basaw syng-iang, bad ka linen bani.

⁶ Te kin thaw ïa ka ephod da ka ksiar, da ka babyrïong, bad ka basaw bthuh, bad ka basaw syng-iang, bad ka linen bani ba la thir da ka jingtrei bastad.

⁷ Kan don ar tylli ki tyrpeng ba la pynïasoh ha ki baroh ar ki rmiang jong ka; kumta te, yn pynïasoh lang ïa ka.

⁸ Te kata ka jingpanpoh ba la pynpur jong ka ephod kaba halor jong ka, kan long da kajuh, ba la thaw da kajuh hi keiñ; da ka ksiar keiñ, ka babyrïong, bad ka basaw bthuh, bad ka basaw syng-iang, bad ka linen bani ba la thir.

⁹ To men shim ruh ar tylli ki mawlynnai Oniks, bad to pruid halor jong ki ruh ïa ki kyrteng ki khun Israel;

¹⁰ hynriew na ki kyrteng jong ki ha uwei u maw bad hynriew ki kyrteng jong kiwei pat ha uwei pat u maw, katba kum ka jingkha jong ki.

¹¹ Da ka jingtrei u nongpruid ha u maw, kum ki jingpruid ka mohor keiñ, men pruid ha kita ki ar tylli ki maw ïa ki kyrteng ki khun Israel: men thaw ïa ki ban buh ha ki shrong ka ksiar.

¹² Men buh ruh ïa kita ki ar tylli ki maw ha ki tyrpeng ka ephod, kum ka jingpynkynmaw ïa ki khun Israel: bad u Aaron un bah ïa ki kyrteng jong ki ha khmat U Trai halor baroh ar ki tyrpeng jong u kum ka jingpynkynmaw.

¹³ To men thaw ruh ïa ki shrong ksiar,

¹⁴ bad ar tylli ki kynjri ha ki tduh jong ki da ka ksiar banylla; na kaba la thain men thaw ïa ki; bad to pynïasoh ruh ïa kita ki kynjri ba la thain ha kita ki shrong.

¹⁵ “To men thaw ruh ïa ka jingdeng shadem ka jingbishar, da ka jingtrei bastad; kum ka rukom jong ka ephod men thaw ïa ka, da ka ksiar, ka babyrïong, bad ka basaw bthuh, bad ka basaw syng-iang, bad ka linen bani ba la thir, men thaw ïa ka keiñ.

¹⁶ Kan long kaba sawdong bad kaba ar syrtap; ka lynter jong ka, shi tda; bad ka pyngkiang jong ka, shi tda.

¹⁷ Bad men thep ha ka ïa ki mawlynnai, saw kyrdan ki maw keiñ: ka kyrdan kaba da u Sardios, u Topas, bad u Karbunkl, kan long ka kyrdan ka banyngkong.

¹⁸ Bad ka kyrdan ka ba-ar, da u Emerald, u Sapphir, bad u Diamond.

¹⁹ Bad ka kyrdan ka balai, u Ligur, u Agate, bad u Amethyst.

²⁰ Bad ka kyrdan ka basaw, u Beryl, bad u Oniks, bad u Jasper; yn thep ïa ki ha ka ksiar ha ki jaka ker jong ki.

²¹ Bad ha kita ki maw kin don ki kyrteng ki khun Israel, khat-ar keiñ, kat kum ki kyrteng jong ki; kum kaba pruid jong ka mohor, uwei pa uwei baroh bad la ka kyrteng kyrteng, kat kum ki khat-ar ki jaid.

²² Bad halor kata ka jingdeng shadem, men thaw ïa ki kynjri ba la thain, da ka ksiar banylla.

²³ To men thaw ruh halor kata ka jingdeng shadem, ar tylli ki kyrwoh da ka ksiar; bad to pynïasoh ruh ïa kita ki kyrwoh ha ki ar dong jong kata ka jingdeng shadem.

²⁴ Bad men woh ïa kita ki ar tylli ki kynjri ksiar ba la thain ha kita ki ar tylli ki kyrwoh kiba ha ki dong kata ka jingdeng shadem.

²⁵ Bad ïa kita kiwei ki ar tylli ki tduh jong kita ar tylli ki kynjri ba la thain, men pynsnoh ha kita ar tylli ki shrong, bad men buh ïa ki halor ki tyrpeng jong ka ephod na khmat.

²⁶ Men thaw ruh ar tylli ki kyrwoh da ka ksiar, bad men buh ruh ïa ki ha ki ar dong ka jingdeng shadem, ha ka rmiang jong ka, kaba ha kata ka liang jong ka ephod kaba shapoh.

²⁷ Bad men thaw sa ar tylli ki kyrwoh da ka ksiar, bad men buh ïa ki ha ki ar liang kata ka ephod na sharum, shaphang khmat jong ka, ha marpyrshah ïa kawei ka syrtap jong ka, shaneng kata ka jingpanpoh ba la pynpur jong ka ephod.

²⁸ Bad da u ksai babyrïong, kin teh ïa kata ka jingdeng shadem na ki kyrwoh jong ka ha ki kyrwoh jong kata ka ephod, ba kan ïoh long shaneng kata ka jingpanpoh ba la pynpur jong kata ka ephod, bad ba kata ka jingdeng shadem kan ym lait shuh na ka ephod.

²⁹ U Aaron ruh un bah ha kata ka jingdeng shadem ka jingbishar, ïa ki kyrteng ki khun Israel halor la ka shyllipnud, haba u leit bsut shapoh kata ka jaka kyntang, kum ka jingpynkynmaw ha khmat U Trai ha la ka sngi.

³⁰ Men buh ruh ha kata ka jingdeng shadem ka jingbishar, ïa kita ki Urim bad ïa kita ki Thummim; bad kin ïalong halor ka shyllipnud u Aaron, haba u leit bsut shapoh ha khmat U Trai; bad u Aaron un bah ïa ka jingbishar ki khun Israel halor la ka shyllipnud ha khmat U Trai ha la ka sngi.

³¹ “Men thaw ruh ïa ka barandi jong kata ka ephod baroh da ka babyrïong.

³² Bad men pong ryndang ïa ka, na marpdeng jong ka: to kyntang baroh sawdong ka thliew jong ka, kum ka thliew jong ka jymphong kieng, ba kan ym kad keiñ.

³³ Bad ha ka rmiang jong ka men thaw ïa ki soh Pong da ka babyrïong, bad ka basaw bthuh, bad ka basaw syng-iang, baroh sawdong na ka rmiang jong ka; bad ïa ki shakuriaw da ka ksiar hapdeng jong ki baroh sawdong,

³⁴ ka shakuriaw ksiar bad u soh Pong, bad ka shakuriaw ksiar bad u syntiew soh Pong, ha ka rmiang kata ka barandi baroh sawdong.

³⁵ Bad u Aaron un phong ïa ka haba u shakri: bad ba yn ïohsngew ïa ka jingsawa jong u haba u leit bsut sha kata ka jaka kyntang ha khmat U Trai, bad haba u mih noh, ba um ïap noh.

³⁶ “Men thaw ruh ïa ka sla da ka ksiar banylla, bad men pruid ha ka, kum ki jingpruid jong ka mohor, ‘Ka jingkhuid ha U Trai.’

³⁷ Bad men teh ïa ka da u ksai babyrïong, ba kan long halor kata ka meitr, sha khmat kata ka meitr kan long keiñ.

³⁸ Kan long te ha ka shyllangmat u Aaron, ba u Aaron un bah ïa ka pop jong kita kiei kiei ruh ki bakhuid, ïa kiba ki khun Israel kin pynkyntang ha ki jingai bakyntang jong ki baroh; bad kan long ha la ka sngi ha ka shyllangmat jong u, ba yn ïoh pdiang ïa ki ha khmat U Trai.

³⁹ “To men pynpur ïa ka sopti da ka linen bani, bad to men thaw ïa ka meitr ruh da ka linen bani, bad ïa ka jingpanpoh ruh to men thaw da kaba suh.

⁴⁰ “Ïa ki khun shynrang u Aaron ruh men thaw ïa ki sopti, ïa ki jingpanpoh ruh men thaw ïa ki, bad ïa ki tupia men thaw ïa ki, na ka bynta ka burom bad ka jingitynnad.

⁴¹ To men pynphong ruh ïa ki ha u Aaron u hynmen jong me, bad ha ki khun shynrang jong u lem bad u; bad men pynsleh ïa ki, bad men pynkyntang ïa ki, bad men pynkhuid ïa ki de, ba kin ïoh kam ha nga ha ka kam lyngdoh.

⁴² Men thaw ïa ki, ïa ki patlun linen ban tap ïa ka jinglyngkhuit jong ki; kin kot ruh naduh ka syngkai haduh ki lbong;

⁴³ bad u Aaron un phong ïa ki, bad ki khun shynrang jong u kin phong ïa ki, haba ki leit bsut hapoh Ka Tabernakl ka jingïaseng, lane haba ki wan hajan ka duwan ïa ka ban shakri ha kata ka jaka kyntang ba kin ym kit pop bad ïap noh: kane kan long ka hukum ïa u bad ïa u symbai jong u hadien jong u ha la ka rta.