EKSODOS 27 - KA BAIBL

Ka duwan ka jingkñia ainguh thang

¹ “Men thaw ruh ïa ka duwan da u dieng Shittim, san pruh ka lynter, bad san pruh ka pyngkiang; kata ka duwan kan long sawdong; bad ka jingjrong jong ka, lai pruh.

² Bad men thaw ïa ki reng jong ka ha ki saw ki dong jong ka: ki reng jong ka kin long na kajuh: bad men suit ïa ka ruh da ka tama.

³ Bad men thaw de ïa ki pliang jong ka ban pdiang ïa ka dpei jong ka, bad ïa ki siang jong ka, bad ïa ki pliang jong ka, bad ïa ki proh jong ka, bad ïa ki pliang ding jong ka ruh: ïa ki jingbuh jong ka baroh men thaw da ka tama.

⁴ Bad men thaw ïa ka jaka sliew ding ïa kaba la thain kriah da ka tama; bad halor kata ka kriah ha ki saw ki dong jong ka, men thaw saw tylli ki kyrwoh tama.

⁵ Bad men buh ïa ka hapoh ka thliew jong kata ka duwan na shapoh, ba kata ka kriah kan kot haduh pdeng kata ka duwan.

⁶ Men thaw ruh ïa ki dieng jingbah ïa kata ka duwan, ïa ki dieng jingbah da u dieng Shittim keiñ, da suit da ka tama ïa ki ruh;

⁷ bad ïa kita ki dieng jingbah men pynphrung ha kita ki kyrwoh, bad kita ki dieng jingbah kin long ha ki baroh ar liang kata ka duwan, ïa ka ban bah ïa ka.

⁸ Men thaw ïa ka, kaba thliew da ki lyntang kumba la pyni ïa me ha uta u lum, kumta hi keiñ, men thaw ïa ka.

Ka phyllaw ka Tabernakl

⁹ “To men thaw ruh ïa ka phyllaw Ka Tabernakl; ha ka liang kaba shaphang shathie, ki pyrda kata ka phyllaw kin long da ka jaiñ linen bani ba la jyrthiaw, shispah pruh, ka lynter ïa kawei ka liang;

¹⁰ bad kita arphew tylli ki rishot jong ka, bad kita arphew tylli ki thliew tnaw jong ki, kin long da ka tama; ki bnoh jong kita ki rishot bad ki shrong jong ki, kin long da ka rupa.

¹¹ Kumjuh ruh, ha ka liang kaba shaphang shatei, ka lynter ki pyrda kan long shispah pruh, bad arphew tylli ki rishot jong ki, bad arphew tylli ki thliew tnaw jong ki da ka tama; ki bnoh jong kita ki rishot bad ki shrong jong ki da ka rupa.

¹² Bad ïa ka pyngkiang ka phyllaw shaphang sepngi kin long ki pyrda, sanphew pruh; ki rishot jong ki shiphew, bad ki thliew tnaw jong ki shiphew.

¹³ Bad ka pyngkiang ka phyllaw ha ka liang shaphang mihngi kan long sanphew pruh.

¹⁴ Ki pyrda jong kawei ka liang kin long khatsan pruh: ki rishot jong ki, lai, bad ki thliew tnaw jong ki, lai.

¹⁵ Bad ha kawei pat ka liang ruh kin long ki pyrda, khatsan pruh; ki rishot jong ki, lai tylli, bad ki thliew tnaw jong ki, lai tylli.

¹⁶ Ïa ka khyrdop ka phyllaw te kan long ka pyrda, arphew pruh, da ka babyrïong, bad ka basaw bthuh, bad ka basaw syng-iang, bad ka linen bani ba la jyrthiaw, ba la suh ruh; ki rishot jong ki, saw tylli, bad ki thliew tnaw jong ki, saw tylli.

¹⁷ Bad ïa ki rishot baroh sawdong jong ka phyllaw yn thaw shrong da ka rupa; ki bnoh jong ki yn long da ka rupa, bad ki thliew tnaw jong ki da ka tama.

¹⁸ Ka lynter kata ka phyllaw kan long shispah pruh, bad ka pyngkiang jong ka, sanphew sanphew, ka jingjrong ruh, san pruh, da ka linen bani ba la jyrthiaw, bad ki thliew tnaw jong ki da ka tama.

¹⁹ Baroh ki pliang jong Ka Tabernakl ha ka jingleh kam jong ka baroh, bad ki prek jong ka baroh ruh, bad ki snar baroh jong ka phyllaw, kin long da ka tama.

Ka umphniang ïa ka sharak

²⁰ “Bad men hukum ïa ki khun Israel, ba kin wallam ha me ka umphniang Olib ba la tylliat, ka bakhuid ïa ka jingshai, ïa ka ban pynmeh ïa kata ka sharak khlem da pud.

²¹ Ha Ka Tabernakl ka jingïaseng, shabar kata ka jingkah kaba ha khmat ka jingphla, u Aaron bad ki khun shynrang jong u kin ïasumar ïa ka naduh mynmiet haduh mynstep ha khmat U Trai; kane kan long ka hukum ha la ka rta ha ki pateng la pateng bynriew jong ki na ka bynta ki khun Israel.