EKSODOS 26 - KA BAIBL

Ka Tabernakl

¹ “Ïa Ka Tabernakl ruh men thaw da ki shiphew ki jingkah; da ki jaiñ linen bani ba la jyrthiaw, bad ka babyrïong, bad basaw bthuh, bad basaw syng-iang, men thaw ïa ki, kiba don Kherub da ka jingtrei stad.

² Ka lynter jong kawei ka jingkah kan long arphew phra pruh, bad ka pyngkiang kawei ka jingkah, saw pruh: bad kita ki jingkah baroh te kin ïoh kajuh ka jingthew.

³ San tylli ki jingkah yn pynïasoh lang paralok; bad san tylli kiwei pat ki jingkah yn pynïasoh lang paralok.

⁴ Men thaw ruh ïa ki kyrwoh da ka babyrïong ha ka rmiang kawei ka jingkah na ka rmiang ha ka jingpynïasoh; kumjuh ruh men thaw ha ka rmiang eh jong ka jingkah kaba kham harud, ha ka jingpynïasoh ka ba-ar.

⁵ Sanphew tylli ki kyrwoh men thaw ha kawei ka jingkah, bad sanphew ki kyrwoh men thaw ha kata ka jingkah kaba don ha ka jingpynïasoh ka ba-ar; ba kita ki kyrwoh kin ïasoh lang baroh.

⁶ Men thaw ruh sanphew tylli ki jingpyndait da ka ksiar, bad men pynïasoh lang ïa kita ki jingkah da kita ki jingpyndait, ba kan long kawei Ka Tabernakl.

⁷ “Men thaw ruh ïa ki jingkah da u 'ñiuh blang, ïa ka ban long ka jingsop ïa Ka Tabernakl: men thaw khatwei tylli ki jingkah.

⁸ Ka lynter jong kawei kan long laiphew pruh bad ka pyngkiang jong kawei ka jingkah, saw pruh; bad kita ki khatwei tylli ki jingkah kin long kajuh ka jingthew.

⁹ Bad men pynïasoh san tylli ki jingkah kyrpang, bad hynriew tylli ki jingkah kyrpang, te ïa kata ka jingkah ka bahynriew men pynlong ar syrtap ha khmat jong Ka Tabernakl.

¹⁰ Bad men thaw sanphew tylli ki kyrwoh ha ka rmiang jong kata ka jingkah, kaba harud eh ha ka jingpynïasoh, bad sanphew tylli ki kyrwoh ha ka rmiang jong kata kawei pat ka jingkah ha ka jingpynïasoh ka ba-ar.

¹¹ “To thaw ruh sanphew tylli ki jingpyndait da ka tama, to buh ruh ïa kita ki jingpyndait ha kita ki kyrwoh, bad to pynïasoh lang ruh ïa kata ka jingtap, ba kan long kawei keiñ.

¹² Hynrei, kata kaba tam kaba sah na kita ki jingkah ka jingsop, kata ka shiteng ka jingkah keiñ kaba sah tam, kan noh sha kyrpong Ka Tabernakl.

¹³ Bad shi pruh ha kawei ka liang, bad shi pruh ha kawei pat ka liang, na kata kaba sah tam ha ka lynter kata ka jingsop, kan noh halor kita ki liang jong Ka Tabernakl, ha kane ka liang bad ha katai ka liang, ïa ka ban tap ïa ka.

¹⁴ Bad men thaw ruh ïa ka jingtap halor kata ka jingsop da ki snieh langbrot shynrang ba la suit rong saw, bad ïa ka jingtap halor kata ruh da ki snieh takash.

¹⁵ “To shna ki lyntang ïa Ka Tabernakl na u dieng Shittim ïa ka ban ker pynïeng.

¹⁶ Shiphew pruh, ka lynter jong kawei ka lyntang, bad shi pruh shiteng, ka pyngkiang jong kawei ka lyntang.

¹⁷ Ar tylli ki tnaw kin long ha kawei ka lyntang, ba la buh ter ter marpyrshah: kumne keiñ men thaw ïa ki lyntang Ka Tabernakl baroh,

¹⁸ Bad men shna ïa ki lyntang ïa Ka Tabernakl, arphew tylli ki lyntang ha ka liang kaba shaphang shathie.

¹⁹ Bad men thaw sawphew tylli ki thliew tnaw rupa, hapoh kita ki arphew tylli ki lyntang; ar tylli ki thliew tnaw hapoh kawei ka lyntang ïa kita ki ar tylli ki tnaw jong ka, bad ar tylli ki thliew tnaw hapoh kawei pat ka lyntang ïa kita ki ar tylli ki tnaw jong ka;

²⁰ ïa ka liang ka ba-ar jong Ka Tabernakl kaba shaphang shatei, kin long arphew tylli ki lyntang;

²¹ bad sawphew tylli ki thliew tnaw rupa jong ki; ar tylli ki thliew tnaw hapoh kawei ka lyntang, bad ar tylli ki thliew tnaw hapoh kawei pat ka lyntang.

²² Men shna ruh hynriew tylli ki lyntang ïa ka liang jong Ka Tabernakl kaba shaphang sepngi.

²³ Bad ar tylli ki lyntang men shna ïa ki dong jong Ka Tabernakl baroh ar liang.

²⁴ Bad yn pynïasoh lang ïa ki shapoh, bad yn pynïasoh lang na khlieh jong ka da kawei ka kyrwoh: kumne keiñ kan long ïa ki baroh ar; kin long ïa kita ar tylli ki dong.

²⁵ Kin long ruh phra tylli ki lyntang, bad ki thliew tnaw rupa jong ki, khathynriew ki thliew tnaw; ar tylli ki thliew tnaw hapoh kawei ka lyntang, bad ar tylli ki thliew tnaw hapoh kawei pat ka lyntang.

²⁶ “Men shna ruh ïa ki dieng khap da u dieng Shittim; san tylli ïa ki lyntang jong kawei ka liang Ka Tabernakl,

²⁷ bad ïa san tylli ki dieng khap ïa ki lyntang jong kawei pat ka liang Ka Tabernakl, bad san tylli ki dieng khap ïa ki lyntang jong kawei ka liang Ka Tabernakl, ïa kita baroh ar ki liang kiba shaphang sepngi.

²⁸ Te uta u dieng khap pdeng, uba hapdeng kita ki lyntang un da kot baroh shilynter.

²⁹ Bad men suit ksiar ïa kita ki lyntang, bad men thaw ïa ki kyrwoh jong ki da ka ksiar ban long ki jaka ïa kita ki dieng khap: bad to men suit ksiar ïa kita ki dieng khap ruh.

³⁰ Bad men pynïeng ïa Ka Tabernakl katba kum kata ka dur jong ka, ïa kaba la pyni ha me ha uta u lum.

³¹ “Men thaw ruh ïa ka jingkah pdeng da ka babyrïong, bad ka basaw bthuh, bad ka basaw syng-iang, bad da ka linen bani ba la jyrthiaw: yn thaw ïa ka, kaba don ki Kherub da ka jingtrei bastad;

³² bad men woh ïa ka halor ki saw tylli ki rishot dieng Shittim ba la suit ksiar, ki bnoh jong ki da ka ksiar, ha ki saw tylli ki thliew tnaw rupa.

³³ Bad men woh ïa kata ka jingkah pdeng ha kita ki jingpyndait, ba me lah ban wallam hapoh hangta shapoh kata ka jingkah keiñ ïa ka synduk ka jingphla: bad kata ka jingkah pdeng kan pynïakhlad ha phi hapdeng ka jaka kyntang bad ka bakyntang tam eh.

³⁴ To men buh ïa ka jingtap-isynei halor kata ka synduk ka jingphla ha kata ka bakyntang tam eh.

³⁵ Bad men buh ïa kata ka miej habar kata ka jingkah, bad ïa kata ka dieng pynïeng sharak de marpyrshah kata ka miej ha ka liang Ka Tabernakl kaba shaphang shathie: bad kata ka miej men buh shaphang shatei.

³⁶ “To men thaw ïa ka pyrda ruh ïa ka jingkhang jong kata ka ïingjaiñ da ka babyrïong, bad ka basaw bthuh, bad ka basaw syng-iang, bad ka linen bani ba la jyrthiaw, ba la suh ruh.

³⁷ Bad men thaw ïa kata ka pyrda san tylli ki rishot da u dieng Shittim, men da suit ksiar ïa ki ruh; ki bnoh jong ki da ka ksiar; bad ïa kita men saiñdur san tylli ki thliew tnaw tama.