EKSODOS 24 - KA BAIBL

La pynthymmai ïa ka kular

¹ Te u la ong ha u Moses, “To wan kiew sha U Trai, ma me, bad u Aaron, bad u Nadab, bad u Abihu, bad ki hynñiewphew ki tymmen basan jong ki Israel; bad to mane phi na sha jngai.

² Te tang u Moses hi un wan hajan ïa U Trai; hynrei, ki, kin ym wan hajan, lymne uta u paidbah un ym leit lem bad u.”

³ U Moses te u la wan ïathuh ha uta u paidbah ïa ki ktien U Trai baroh, bad ïa ki jingbishar baroh: te uta u paidbah baroh u la ïathuh da kawei ka ktien, u da ong ruh, “Ïa ki ktien baroh kiba U Trai u la ong; ngin leh keiñ.”

⁴ Te u Moses u la thoh ïa ki ktien U Trai baroh, bad u la khie ruh dang step, bad u la tei ïa ka duwan ha trai uta u lum, bad ïa ki khat-ar ki païa, katba kum ki khat-ar jaid Israel.

⁵ Te u la phah ïa ki samla na ki khun Israel, kiba la kñia ïa ki jingainguh thang, bad ki la kñia da ki masi lyngraw ïa ka jingkñia bapynïasuk ha U Trai.

⁶ Bad u Moses u la shim shiteng na ka snam, bad u la buh ïa ka ha ka pliang; bad shiteng na kata ka snam u la synreit halor kata ka duwan.

⁷ Haba u la shim te ïa ka kitab ka jutang, u la pule ha kaba ïohsngew uta u paidbah; ki te ki la ong, “Ïa kata baroh kaba U Trai u la kren, ngin leh, bad ngin kohnguh.”

⁸ Bad u Moses u la shim ïa kata ka snam, bad u la synreit ïa ka halor uta u paidbah, bad u la ong, “Ha khmih, ka snam jong kata ka jutang ïa kaba U Trai u la pynlong bad phi shaphang kine ki ktien baroh.”

⁹ Ynda kumta, u Moses u la leit kiew, bad u Aaron, u Nadab, bad u Abihu, bad hynñiewphew ngut ki tymmen basan ki Israel,

¹⁰ bad ki la ïohi ïa U Blei ki Israel; te la don hapoh ki sla'jat jong u kumba la siang da u maw Sapphir, bad kum ka met jong ki bneng ha ka jingphyrnai.

¹¹ Te halor kita ki bakhraw batri jong ki khun Israel um shym la buh ïa la ka kti: hynrei, ki la ïohi keiñ ïa U Blei, te ki la ïabam ki la ïadih.

U Moses halor u lum Sinai

¹² Bad U Trai u la ong ha u Moses, “To wan kiew sha nga ha une u lum, to sah hangta ruh: bad ngan ai ha me ïa ki maw lyngkniap, bad ïa ki hukum bad ïa ki adong ïa kiba nga la thoh, ba men ïoh hikai ïa ki.”

¹³ Te u Moses u la ïeng, bad u Joshua u shakri jong u; bad u Moses u la leit kiew sha uta u lum jong U Blei.

¹⁴ Ynda kumta, u la ong ha kita ki tymmen basan, “To nang ap ïa ngi hangne, tad ynda ngin da wan pat sha phi; te ha khmih, u Aaron bad u Hur ki ïadon lem bad phi: lada uno uno ruh u don kano kano ruh ka kam, ai ba un leit ha ki.”

¹⁵ Bad u Moses u la leit kiew sha uta u lum, bad u lyoh u la tap ïa uta u lum.

¹⁶ Bad ka burom U Trai ka la neh halor u lum Sinai, uta u lyoh te u la tap ïa u, hynriew sngi: te ha ka sngi ka bahynñiew, u la khot ïa u Moses napdeng uta u lyoh.

¹⁷ Ka jingkhmih ka burom U Trai te ka la long kum ka ding kaba bam duh ha khlieh uta u lum ha khmat ki khun Israel.

¹⁸ Te u Moses u la leit shapdeng uta u lyoh, bad u la kiew noh sha uta u lum: bad u Moses u la sah ruh ha uta u lum sawphew sngi bad sawphew miet.