EKSODOS 23 - KA BAIBL

Shaphang ka hok bad ka jinglehsbun

¹ “Wat pynmih ïa ka jingbna balamler: wat ïasoh lem bad ki bymman ban long u nongsakhi bymhok.

² Men ym bud ïa u paidbah ïa ka ban leh sniew; lymne wat phai ktien ha ka jingïakajia, da kaba bud ïa kiba bun ban pynsniew ïa ka jingbishar;

³ lymne wat ïashah ïa u baduk ha ka jingïakajia jong u.

⁴ “Lada men shem ïa u masi dab lane ïa ka kadda u nongshun jong me ba ïaid sakma, da shisha men da wallam ïa u ha u pat.

⁵ Lada me ïohi ïa ka kadda jong uba shun ïa me ba ka la kyllon hapoh la ka jingkit, te men ym ïarap ïa u? Da shisha men da ïarap lem bad u.

⁶ “Ha ka jingïakajia jong u, men ym pynsniew ïa ka jingbishar u baduk jong me.

⁷ To men kiar jngai na ka kam ka bashukor; lymne wat pynïap ïa uba lui lui bad u bahok: naba nga ngan ym pynksan ïa u bymman.

⁸ Wat bamsap: naba kaba bamsap ka pynmatlah ïa ki bastad, bad ka pynbakla ruh ïa ki ktien jong ki bahok.

⁹ “Wat banbor ïa u nongwei: naba phi sngewthuh ïa ka dohnud u nongwei, naba phi hi ruh phi la ju long ki nongwei ha ka ri Ijipt.

Shaphang ka snem ka jingshongthait bad ka Sabbaton

¹⁰ “Hynriew snem ruh men bet ïa ka khyndew jong me, bad men lum ïa ki soh jong ka;

¹¹ hynrei, ha ka snem ka bahynñiew men iehnoh ïa ka, ba kan long shrah ba ki baduk ki jong me kin ïoh bam: bad kata ïa kaba ki ïa-iehnoh kin bam ki mrad khlaw. Kumjuh ruh men leh bad la ka brisoh, bad la ki dieng Olib de.

¹² “Hynriew sngi men leh ïa ka kam jong me, bad ha ka sngi ka bahynñiew men shong sngi: ba u masi jong me, bad ka kadda jong me kin ïoh shongthait, bad ba u khun ka mraw jong me, bad u nongwei, kin shong pyngngad ruh.

¹³ Bad ha kiei kiei baroh ba nga la ong ha phi phin sumar biang: wat kynmaw ïa ka kyrteng kiwei ki blei, lymne wat ai ban ïohsngew ïa ka na ka shyntur jong me.

Ki lai tylli Ki Jingkhawai Niam

¹⁴ “Lai sien shi snem men rakhe ïa Ka Jingkhawai Niam ïa nga.

¹⁵ Men rakhe ïa Ka Jingkhawai Niam U Kpu Bakhlem Thiat: hynñiew sngi men bam ïa u kpu bakhlem thiat, kumba nga la hukum ïa me ha ka por ba la buh ha u bnai Abib (naba ha uta me la mih na ka ri Ijipt); bad wat ai ban mihpaw suda uwei ruh ha khmat jong nga:

¹⁶ bad Ka Jingkhawai Niam Ka Aïom Ot, ki soh nyngkong ki jingtrei jong me, ïa kiba me la bet ha ka lyngkha: bad Ka Jingkhawai Niam Ka Jingïalum ruh, ha ka bakut ka snem, haba me la lum ïa ki jingtrei jong me na ka lyngkha.

¹⁷ Lai sien shi snem ki shynrang jong me baroh kin ïa-mihpaw ha khmat U Trai U Blei jong me.

¹⁸ “Men ym kñia ïa ka snam ka jingkñia jong nga lem bad u kpu ba dei thiat; lymne wat ai ban sah ka khleiñ ka jingkñia jong nga haduh mynstep.

¹⁹ “Men wallam ïa u banyngkong na ki soh nyngkong ka khyndew jong me ha ka ïing U Trai U Blei jong me. Wat shet ïa u khun blang ha ka dud ka kmie jong u.

U angel ba la phah da U Blei ban ïalam ïa u paidbah

²⁰ “Ha khmih, nga phah ïa u angel ha shuwa jong me, ban sumar ïa me ha lynti, bad ban wallam ïa me sha kata ka jaka ïa kaba nga la khreh.

²¹ To burom ïa u, bad to kohnguh ïa ka ktien jong u; wat pynbitar ïa u: namar un ym map ïa ki jingpalat jong phi; naba ka kyrteng jong nga ka don ha u.

²² “Hynrei, lada shisha men kohnguh ïa ka ktien jong u, bad men leh ïa kaba nga kren baroh; te ngan long u nongshun ïa ki nongshun jong me, bad u nongïaleh ïa ki nongïaleh jong me.

²³ “Naba u angel jong nga un ïaid ha shuwa jong me, bad un ïalam ïa me shapoh sha ki Amor, bad ki Hit, bad ki Peris, bad ki Kanaan, bad ki Hib, bad ki Jebus de: bad ngan pynjot noh ïa ki.

²⁴ Men ym dem ha ki blei jong ki, lymne shakri ïa ki, lymne leh katba kum ki kam jong ki: hynrei, men pynduh khoit ïa ki, bad lympat ïa ki durblei jong ki lyngkhot lyngkhai.

²⁵ Phin shakri te ïa U Trai U Blei jong phi, te un kyrkhu ïa u kpu jong me, bad ïa ka um jong me; bad ngan shim noh ïa ka jingpang napdeng jong me.

²⁶ Kin ym don ei ei ruh em, ha ka ri jong me, kiba liat khun, lane ki balyngki: ngan sa pyndap biang ïa ka jingkheiñ ki sngi jong me.

²⁷ Ngan phah ïa ka jingsheptieng jong nga ha shuwa jong me, bad ngan pynjot noh ïa ki briew baroh sha kiba men wan, bad ngan pynphai dien ïa ki nongshun jong me baroh na me.

²⁸ Bad ngan phah ïa ki kyieng ha shuwa jong me, ki ban beh noh ïa ki Hib, bad ïa ki Kanaan, bad ïa ki Hit, na khmat jong me.

²⁹ Ngan ym beh ïa ki na khmat jong me ha kaba shi snem; ïoh ba kata ka ri kan long kynjah, bad u mrad khlaw un man bun pyrshah ïa me.

³⁰ Mian pa mian keiñ ngan beh noh ïa ki na khmat jong me, tad ynda me la roi, bad me la ïoh pateng ïa kata ka ri ruh.

³¹ Ïa ki pud jong me te ngan buh, naduh ka Duriaw Basaw haduh ka duriaw ki Philistia, bad naduh ka ri khlaw haduh kata ka wah: namar ngan aiti ïa ki trai-shnong jong kata ka ri ha ka kti jong phi; te men beh noh ïa ki na khmat jong phi.

³² Men ym pynlong ïa ka jutang bad ki, lymne bad ki blei jong ki.

³³ Wat shah ba kin ïashong sah ha ka ri jong me, ïoh ba kin ïalam ïa me ban leh pop ïa nga: namar lada men shakri ïa ki blei jong ki, da shisha kata kan long ka jingriam ïa me.”