EKSODOS 22 - KA BAIBL

Ka hukum shaphang kaba buria

¹ “Lada u briew un tuh ïa u masi, lane ïa ka langbrot, bad un pynïap ïa ka, lane un die ïa ka; un buria san tylli ki masi dab namar uwei u masi, bad saw tylli ki langbrot namar kawei ka langbrot.

² Haba shem ïa u nongtuh ba u dang prat ïa ka ïing, bad la shoh ïap ïa u ruh, kam dei ban pynhiar kput na ka bynta uta.

³ Lada ka sngi ka la mih ha u, ka dei ban pynhiar kput na ka bynta jong u: ka dei ïa u ban pynburia pat biang; lada um don ei ei ruh em, te yn sa die ïa u na ka bynta kata ka jingtuh jong u.

⁴ Lada la shem shisha ha ka kti jong u ïa kata ka jingtuh ba dang im, la ka long u masi, ne ka kadda, ne ka langbrot; un pynburia ar shah.

⁵ “Lada u briew un pynbam ïa ka lyngkha lane ïa ka brisoh, da kaba buh ïa u mrad la u jong, ban bam ha ka lyngkha jong uwei pat; un sa pynburia pat na ka babha tam ka lyngkha jong u, lane na ka babha tam ka brisoh jong u.

⁶ “Lada ka ding ka la meh, bad ka la kem ïa ki dieng shiah, katba la pyning ïa u Kew ha ka thup, lane ïa u bym pat ot, lane ïa ka lyngkha; uta uba la pynmeh ïa kata ka ding un sa pynburia pat baroh.

⁷ “Haba u briew un ai sumar ha la u paramarjan ïa ki tyngka ne ïa kaei kaei ruh, bad haba la tuh noh ïa kata na ka ïing uta u briew; lada shem ïa u nongtuh, un pynburia ar shah.

⁸ Te lada ym shem ïa uta u nongtuh, ynda kumta, yn wallam ïa u trai kata ka ïing ha ki nongbishar, ban tohkit la u la ktah ne em ïa kaei kaei ruh ka jong u paramarjan jong u.

⁹ “Naba ïa ka kynja ka jingpalat baroh, la ka long na ka bynta u masi, lane ka kadda, lane ka langbrot, lane ka jaiñkup, lane na ka bynta kaei kaei ruh kaba la jah, ïa kaba uwei pat u kam kum la ka jong, ka dei ïa ka daw jong ki baroh ar liang ban poi ha khmat ki nongbishar; te uta ïa uba kita ki nongbishar kin ïa-pynrem, un sa buria ar shah ïa la u paramarjan.

¹⁰ “Lada u briew u ai sumar ha la u paramarjan ïa ka kadda, lane ïa u masi, lane ïa ka langbrot, lane ïa ka mrad kaei kaei ruh; bad haba ka ïap noh, ne ka mynsaw, ne la ñiah noh ïa ka khlem da ïohi mano mano ruh,

¹¹ te ka jingpynsmai U Trai kan da long hapdeng jong ki baroh ar ngut, ba um shym la ktah kti ïa kaei kaei ruh ka jong u paramarjan jong u; bad u trai jong ka un pdiang ïa kata, uta te un ym pynburia satia.

¹² Te lada la tuh ïa ka na u, un sa pynburia kaba biang ha u trai jong ka.

¹³ Lada la bam mrad ïa ka, un wallam ïa ka kum ka jingsakhi; te un ym buria shuh ïa kata kaba la bam mrad.

¹⁴ “Lada u briew un shim kylliang na la u paramarjan, te lada kan mynsaw, lane kan ïap, haba u trai jong ka um don ryngkat bad ka, ka dei ïa u shisha ban pynburia ïa ka.

¹⁵ Te lada u trai jong ka u don ryngkat hangta, un ym pynburia ïa ka: lada ka long kaba wai, na ka bynta kaba wai jong ka, ka la wan.

Ki aiñ kiba ïadei bad ka longbriew manbriew

¹⁶ “Lada u briew un pynshoi ïa ka samla ka bym pat ïatehktien, bad u thiah ruh bad ka, shisha un ai jingai na ka bynta jong ka ba kan long ka tnga jong u.

¹⁷ Lada u kpa jong ka um mon satia ban ai ïa ka ha u, un sa buria katba kum ka bynta ki theisotti.

¹⁸ “Men ym shah ïa ka nongkren byrtong ban im.

¹⁹ “Uno uno ruh uba thiah lem bad ka mrad, ka dei shisha ban pynïap noh ïa u.

²⁰ “Yn pynduh noh ïa uta uba kñia ainguh ha kiwei pat ki blei, nalor jong U Trai hi.

²¹ “Men ym pynshitom lane banbor ïa u nongwei: naba phi hi phi la ju long nongwei ha ka ri Ijipt.

²² Wat banbeiñ ïa kano kano ruh ka riewkynthei, lane ïa ki khunswet.

²³ Lada men lehbeiñ ïa ki ha kano kano ka rukom, bad ba kin shu kyrpad ha nga, nga da shisha ngan sngap ïa ka jingkyrpad jong ki;

²⁴ bad kan sa meh ka jingbitar jong nga, te ngan pynïap ïa phi da ka waitlam; te ki tnga jong phi kin sa long ki riewkynthei, bad ki khun jong phi kin sa long ki khunswet.

²⁵ “Lada men ai kylliang sbai ha uwei u baduk na ki briew jong nga uba hajan jong me, men ym long ha u kum u nongshim than; lymne men ym kheiñ sut ïa u.

²⁶ Lada men shim bynda na la u paramarjan da ka jaiñkup, men ai pat ha u hamar kaba sep ka sngi:

²⁷ naba kata hi ka long ïa ka ban tap ïa u, ka long ka jaiñkup ïa ka snieh jong u: un kup thiah da ei? kan jia te, haba u kyrpad ha nga, ba ngan sngap; naba nga uba isynei.

²⁸ “Men ym krenbeiñ ïa ki nongbishar, lymne men ym tim ïa u rangbah u paidbah jong me.

²⁹ “Men ym pyntud ban ainguh ïa u banyngkong na ki soh ba-ih jong me, bad na ki umsoh jong me. Men ai ha nga ïa u banyngkong na ki khun shynrang jong me.

³⁰ Men sa leh kumjuh ïa la ki masi dab, bad ïa ki langbrot jong me; hynñiew sngi un long lem bad la ka kmie; ha ka baphra sngi men ai ïa u ha nga.

³¹ “Phin long ruh ki briew bakyntang ha nga; lymne wat bam ïa ka doh ba la tar ki mrad ha lum; to phin bred ïa ka ha ki ksew.