EKSODOS 21 - KA BAIBL

Ka hukum shaphang ki mraw

¹ “Te kine ki long ki jingbishar ïa kiba men buh ha khmat jong ki.

² Lada men thied ïa u mraw Hebru, un shakri hynriew snem: te ha ka bahynñiew un ïohlait noh khlem siew.

³ Lada u la wan weibriew hi, un leit noh weibriew hi: lada u la shongkurim, te ka tnga jong u kan leit noh lem bad u.

⁴ Lada u kynrad jong u, u la ai ka tnga ïa u, bad ka la kha ki khun ha u ki shynrang ne kynthei; kata ka tnga bad kita ki khun jong ka kin long ki jong u kynrad jong ka, u te un leit noh marwei hi.

⁵ Te lada uta u mraw un ong skhem, ‘Nga ieit ïa la u kynrad, ïa la ka tnga, bad ïa la ki khun de; ngam sngewbha ban lait noh ei’,

⁶ ynda kumta, u kynrad jong u, un wallam ïa u sha ki nongbishar, un wallam ruh ïa u sha ka jingkhang, lane sha ka shawkad; bad u kynrad jong u te un sa sam lyngba ïa ka shkor jong u da ka jingsam; te un shakri ïa u ha la ka rta.

⁷ “Te lada u briew un die ïa la ka khun ban long ka mraw, kan ym ïoh leit noh kumba leit ki mraw shynrang.

⁸ Lada u kynrad jong ka um ibit shuh ïa ka, uba la ïatehktien ïa ka ha lade, te ka dei ïa u ban shah ban sait ram ïa ka: ban die noh ïa ka ha ki nongwei un ym lah ynda u la leh shukor ïa ka.

⁹ Te lada u la pynïatehktien ïa ka ha la u khun, un leh bad ka katba kum ka rukom ki khun kynthei.

¹⁰ Lada u la shim te da kawei pat; un ym pynduna ïa ka jingbam jong ka, ïa ka jaiñkup jaiñsem, bad ïa ka ïing jong ka.

¹¹ Te lada um leh ïa ka, ïa kine lai tylli, kan ïohlait noh khlem siew sbai.

Ka hukum shaphang ka jingpynïap briew

¹² “Uta uba shoh ïa u briew, katba un ïap, yn pynïap shisha ïa u.

¹³ Te lada u briew um shym la ap thap, hynrei, U Blei u la aiti ïa u ha ka kti jong u; te ngan buh ïa me ka jaka sha kaba un phet ïap noh.

¹⁴ Hynrei, lada u briew un da wan da ka bamut sniew lypa ïa la u paramarjan, khnang ban pynïap ïa u da ka jingshukor; to shim ïa u ïa ka ban pynïap noh, wat na ka duwan jong nga ruh.

¹⁵ “Uta te uba shoh ïa la u kpa, lane ïa la ka kmie, ka dei shisha ban pynïap ïa u.

¹⁶ “Uta uba tuh briew, bad uba die ïa u, lane lada shem ïa u ha ka kti jong u, ka dei shisha ban pynïap ïa u.

¹⁷ “Bad uta uba tim ïa la u kpa, lane ïa la ka kmie, ka dei shisha ban pynïap ïa u.”

¹⁸ “Lada ki briew te ki da ïakajia paralok, bad ba uwei u da shoh ïa uwei pat da u maw, lane u da kham ïa la ka kti, te ba um pat ïap noh, hynrei, ba la pynthiah ïa u:

¹⁹ lada un da khie pat, bad ba u da ïaid kai da la u diengduh, te uta u nongshoh un ïohlait: tangba, un buria ïa ka por ba u la duh, bad ba un pynkhiah bha pat ïa u ruh.

²⁰ “Te lada u briew un shoh ïa la u shakri, lane ïa la ka shakri, da u dieng, ba u ïap shen ha ka kti jong u; ka dei shisha ban pynhiar kput ïa u.

²¹ Hynrei, lada un im shi sngi ne ar sngi, yn ym pynhiar kput ïa u: naba u long ka dor ki sbai jong u.

²² “Lada ki briew ki da ïakajia, bad ki pynmynsaw ïa ka kynthei ba la punkhun, katba kan liat khun, hynrei, kam shym ïap: ka dei shisha ban pynshitom ïa uta, katba u tnga jong kata ka briew un dawa; un sa siew ruh katba rai ki nongbishar.

²³ Lada kan jia ïa ka, ban ïap; te men ai ïa ka jingim namar ka jingim,

²⁴ ka khmat namar ka khmat, ka bniat namar ka bniat, ka kti namar ka kti, ka kjat namar ka kjat,

²⁵ kaba ing namar kaba ing, ka jingmong namar ka jingmong, ka jingjngem snam namar ka jingjngem snam.

²⁶ “Te lada u briew un shoh ïa ka khmat u mraw jong u, lane ïa ka khmat ka mraw jong u, ba ka la sep; un pyllait noh ïa u na ka bynta kata ka khmat jong u.

²⁷ Te lada un lop ïa ka bniat u mraw, lane ïa ka bniat ka mraw jong u; un pyllait noh ïa u na ka bynta kata ka bniat jong u.

Ka hukum shaphang ka jingkitkhlieh ki trai jingri

²⁸ “Lada u masi u tur briew, ïa u shynrang lane ïa ka kynthei, ba kumta ki ïap, te ka dei shisha ban lynthem ïa uta u masi, bad ban ym bam ïa ka doh jong u ruh; hynrei, u trai uta u masi un lait keiñ.

²⁹ Hynrei, lada uta u masi u la ju tur da la ka reng mynshuwa, bad ïa kata ruh la lah pyntip da ki sakhi ha u trai jong u, bad ba u ruh um shym la set noh ïa u, hynrei, ba u da pynïap ïa u shynrang lane ïa ka kynthei; ïa uta u masi ka dei ban lynthem, bad ïa u trai jong u ruh ka dei ban pynïap.

³⁰ Lada la daiñ kuna ïa u, ka dei ïa u ban ai ka dor na ka bynta ka jingim jong u katba la rai ïa u.

³¹ Lada u la tur ïa u khynnah, lane ïa ka khynnah, yn leh ïa u kat kane ka jingbishar.

³² Lada uta u masi un tur ïa u mraw, lane ïa ka mraw; un da ai ha u kynrad jong ki laiphew shekel rupa, ïa uta u masi ruh ka dei ban lynthem.

³³ “Bad lada u briew un plie ïa ka pukri, lane lada u briew un tih ïa ka pukri bad um tap ïa ka, bad u masi ne u kadda un da hap hangta,

³⁴ u trai jong kata ka pukri un buria; bad un ai da ki tyngka ha uta u trai jong ki; te ïa uta u mrad ba la ïap un ïoh sha u keiñ.

³⁵ “Lada u masi jong uwei u briew u tur ïa u jong uwei pat, ba un ïap ruh; te kin die ïa uta u masi ba-im, bad kin ïasam ïa ka dor jong u; bad ïa uta u baïap ruh kin ïasam.

³⁶ Lane lada la lah tip ba uta u masi u la ju tur mynshuwa, bad u trai jong u um shym la set noh ïa u; shisha un da buria masi kylliang, bad ïa uta u baïap un ïoh sha u keiñ.