EKSODOS 20 - KA BAIBL

Ki Shiphew Hukum

¹ Bad U Blei u la kren ïa kine ki ktien baroh, u da ong,

² “Ma nga U Trai uba U Blei jong me, uba la wallam noh ïa me na ka ri Ijipt, na ka ïing ka jinglongmraw.

³ “Men ym ïoh kiwei kiwei ki blei nalor jong nga.

⁴ “Men ym thaw bleithaw ïa lade, lymne ïa ka dur jong kaei kaei ruh kaba don ha bneng sha jrong, lymne ha ka khyndew shapoh, lymne ha ka um hapoh ka khyndew:

⁵ men ym dem ïa ki, lymne shakri ïa ki: naba nga U Trai uba U Blei jong me nga long U Blei u bathut shen, uba pynwan ïa ka jingpalat ki kpa ha ki khun, haduh ka balai bad ka basaw pateng bynriew jong kiba isih ïa nga;

⁶ bad uba leh isynei ïa ki hajar, kiba ieit ïa nga bad kiba sumar ruh ïa ki hukum jong nga.

⁷ “Men ym ong thala ïa ka kyrteng U Trai U Blei jong me; naba U Trai un ym pynksan ïa uba ong thala ïa ka kyrteng jong u.

⁸ “Kynmaw ïa ka sngi Sabbaton, ban rakhe khuid ïa ka.

⁹ Hynriew sngi men trei, bad men leh ïa ka kam jong me baroh:

¹⁰ hynrei, ka sngi ka bahynñiew ka long ka Sabbaton ïa U Trai U Blei jong me: ha kata men ym leh kaei kaei ruh ka kam, ma me, lymne u khun jong me, lymne ka khun jong me, lymne u mraw jong me, lymne ka mraw jong me, lymne ka jingri jong me, lymne u nongwei uba hapoh ka phalor jong me:

¹¹ naba ha ki hynriew sngi, U Trai u la thaw ïa ka bneng bad ïa ka khyndew, ïa ka duriaw ruh, bad ïa baroh katba don ha ki, u la shong sngi ruh ha kata ka sngi ka bahynñiew: namar kata, U Trai u la kyrkhu ïa ka sngi Sabbaton, bad u la pynkyntang khuid ïa ka ruh.

¹² “To burom ïa la u kpa bad ïa la ka kmie: ba yn pynslem ïa ka rta jong me ha ka khyndew ïa kaba U Trai U Blei jong me u ai ha me.

¹³ “Men ym pynïap.

¹⁴ “Men ym klim.

¹⁵ “Men ym tuh.

¹⁶ “Men ym sakhi lamler ïa u paramarjan jong me.

¹⁷ “Men ym ikwah ïa ka ïing u paramarjan jong me, men ym ikwah ïa ka tnga u paramarjan jong me, lymne ïa u mraw jong u, lymne ïa ka mraw jong u, lymne ïa u masi jong u, lymne ïa u kadda jong u, lymne ïa kaei kaei ruh kaba dei ka jong u paramarjan jong me.”

Ki khun Israel ki ïasheptieng

¹⁸ Uta u paidbah baroh te u la ïohi ïa kita ki pyrthat, bad ïa kita ki leilieh, bad ïa kata ka jingsawa ka turoi, bad ïa uta u lum u da mih tdem: te haba uta u paidbah u la ïohi, u la kynriah noh, bad u la ïeng noh na sha jngai.

¹⁹ Ki la ïa-ong ruh ha u Moses, “To kren ma me ha ngi, te ngin sngap: hynrei, wat ai ba U Blei un kren ha ngi, ïoh ngi ïap.”

²⁰ Te u Moses u la ong ha uta u paidbah, “Wat sheptieng: namar ïa ka ban tynjuh ïa phi U Blei u la wan, bad ba ka jingsheptieng ïa u kan long ha khmat jong phi, ba phin ym leh pop.”

²¹ Uta u paidbah te u la ïaïeng na sha jngai, bad u Moses u la nang jan sha kata ka jingdum ha kaba U Blei u la don.

Kaba adong ïa kaba mane ïa ki bleithaw

²² Te U Trai u la ong ha u Moses, “Kumne men ong ha ki khun Israel, ‘Phi la ïohi ba nga la kren ha phi na bneng.

²³ Nalor jong nga wat thaw ïa ki blei da ka rupa, lymne wat thaw ha phi ïa ki blei da ka ksiar.

²⁴ Men thaw ïa nga ka duwan da ka khyndew, bad men kñia ïa ki jingainguh thang, bad ïa ki jingkñia bapynïasuk jong me halor jong ka, ïa ki langbrot jong me, bad ïa ki masi dab jong me: ha ki jaka baroh ha kiba nga buh ïa ka jingpynkynmaw ïa ka kyrteng jong nga, ngan wan sha me, bad ngan kyrkhu ruh ïa me.

²⁵ Hynrei, lada men thaw ïa nga ka duwan da u maw, wat tei ïa ka da ki maw ba la shtah: namar lada me rah da la ka atiar halor jong ka, me la pyntngit ïa ka.

²⁶ Lymne wat kiew da ki kyrdan ha ka duwan jong nga, ïoh ba kan paw ka jinglyngkhuit jong me ha ka.’ ”