EKSODOS 19 - KA BAIBL

Ki khun Israel ki ïawan poi ha Sinai

¹ Ha u bnai u balai ynda ki khun Israel ki la ïamih noh na ka ri Ijipt, ha kata kajuh ka sngi ki la ïawan poi sha ka ri khlaw Sinai.

² Namar ki la ïaleit mih noh na Rephidim, bad ki la ïawan poi sha ka ri khlaw Sinai, bad ki la ïashong dara ruh ha kata ka ri khlaw: te hangta ki Israel ki la shong dara marpyrshah ïa uta u lum.

³ Bad u Moses u la leit kiew sha U Blei, te U Trai u la khot ïa u na uta u lum, u da ong, “Kumne men ong ha ka ïing u Jakob, bad men ïathuh ha ki khun Israel:

⁴ Phi la ïohi ïa kata ïa kaba nga la leh ha ki Ijipt, kumno nga la bah ïa phi halor ki thapniang ki pukni, bad nga la wallam ïa phi ha lade hi.

⁵ Te namar kata, lada shisha phin kohnguh ïa ka ktien jong nga, bad sumar ïa ka jutang jong nga, te phin long ka jingkynshew kaba dei ka jong nga hi nalor ki briew baroh: naba ka pyrthei baroh ka jong nga keiñ:

⁶ phin long ruh ha nga ka hima lyngdoh bad ka jaid bynriew bakyntang. Kine ki ktien ïa kiba men kren ha ki khun Israel.”

⁷ Bad u Moses u la wan bad u la khot ïa ki tymmen basan jong u paidbah, bad u la buh ha khmat jong ki ïa kine ki ktien baroh ïa kiba U Trai u la hukum ïa u.

⁸ Te uta u paidbah baroh ki la ïathuh lang, bad ki la ïa-ong ruh, “Ïa kata baroh ïa kaba U Trai u la kren ngin leh keiñ.” Bad u Moses u la leit ïathuh ïa kita ki ktien jong u paidbah ha U Trai.

⁹ Bad U Trai u la ong ha u Moses, “Ha khmih, ngan wan ha me ha u lyoh ba-dum, ba u paidbah un ïohsngew haba nga kren bad me, bad ba un ngeit ïa me ha la ka rta.” Bad u Moses u la ïathuh ïa kita ki ktien jong u paidbah ha U Trai.

¹⁰ Te U Trai u la ong ha u Moses, “To leit sha u paidbah, to pynkhuid ruh ïa ki mynta bad lashai, bad kin sait de ïa la ki jaiñkup,

¹¹ bad ba kin khreh hamar ka sngi ka balai: namar ha kata ka sngi balai U Trai un sa wan hiar ha khmat u paidbah baroh halor u lum Sinai.

¹² Men buh ruh ïa ki pud ïa u paidbah baroh sawdong, da ong, ‘To sumar ïa lade, ba phin ym kiew sha uta u lum, lane ktah ïa ki rud jong u: uno uno ruh uba ktah ïa uta u lum yn pynïap shisha ïa u;

¹³ wat ai ba ka kti kan ktah ïa u, hynrei, da shisha yn lynthem ïa u, lane siat ïap ïa u, la u long u mrad lane u briew, un ym im shuh:’ Haba ka turoi kan sawa jam slem, kin sa kiew sha uta u lum.”

¹⁴ U Moses u la leit hiar te na uta u lum sha uta u paidbah, bad u la pynkhuid ïa uta u paidbah; bad ki la sait ïa la ki jaiñ.

¹⁵ U la ong ruh ha u paidbah, “To long phi kiba la khreh ha ka sngi ka balai: wat leit phi ha la ki tnga.”

¹⁶ Te ha kata ka sngi balai, mynstep eh, la don ki pyrthat bad ki leilieh, bad u lyoh u barben halor uta u lum, bad ka jingsawa ka turoi bajam eh; katba ki briew baroh ha ka jaka shong dara ki la ïakhynñiuh keiñ.

¹⁷ Bad u Moses u la wallam noh ïa u paidbah na kata ka dara ïa ka ban ïashem bad U Blei; te ki la ïaïeng ha trai uta u lum.

¹⁸ Bad u lum Sinai u la mih tdem baroh uwei, namar U Trai u la hiar halor jong u ha ka ding; bad ka tdem jong u ka la kiew kum ka tdem ka lawar ding, bad uta u lum baroh uwei u la khynñiuh eh.

¹⁹ Te mynba ka jingsawa ka turoi ka la slem eh, bad ka la nang kham jam nang kham jam, u Moses u la kren, bad U Blei u la phai ktien ïa u da ka ktien sawa.

²⁰ U Trai te u la wan hiar halor u lum Sinai, halor ka khlieh uta u lum: te U Trai u la khot ïa u Moses sha khlieh uta u lum; u Moses u la leit kiew ruh.

²¹ Bad U Trai u la ong ha u Moses, “To leit hiar, to hukum skhem ïa ki briew, ba ïoh kin tur lyngba ha U Trai ban khmih shaiñ, bad ba ïoh bun na ki kin ïap noh.

²² Bad to ai ba ki lyngdoh ruh de, kiba ju wan hajan U Trai, kin ïapynkhuid ïa lade, ïoh ba U Trai un kyntur ïa ki.”

²³ Te u Moses u la ong ha U Trai, “U paidbah um lah ban wan kiew sha u lum Sinai: naba me la hukum skhem ïa ngi, da kaba ong, ‘To buh ki pud sawdong ïa u lum, to pynkyntang ruh ïa u.’ ”

²⁴ Bad U Trai u la ong ha u, “To khie, to hiar ruh; bad men wan kiew, ma me, bad u Aaron lem bad me: hynrei, wat ai ba kita ki lyngdoh bad uta u paidbah kin wan tur lyngba sha U Trai, ïoh ba u un kyntur ha ki keiñ.”

²⁵ Kumta, u Moses u la leit hiar sha uta u paidbah, bad u la kren ha ki.