EKSODOS 18 - KA BAIBL

U Jethro u wan jngoh ïa u Moses

¹ Ynda u Jethro, u lyngdoh ka ri Midian, u kthaw kurim u Moses, u la ïohsngew ïa kata baroh ba U Blei u la lah leh ïa u Moses, bad ïa ki Israel u paidbah jong u, bad ba U Trai u la lah wallam noh ïa ki Israel na ka ri Ijipt;

² ynda kumta, u Jethro, u kthaw kurim u Moses, u la shim ïa ka Sipporah, ka tnga u Moses, ynda u la lah phah noh ïa ka,

³ bad ïa ar ngut ki khun shynrang jong ka: ka kyrteng jong uwei na ki ka la long “u Gershom”: naba u la ong, “Nga la long u nongwanwir ha ri nongwei”;

⁴ te ka kyrteng jong uta uwei pat “ ‘u Elieser’: naba U Blei u kpa jong nga,” u la ong, “U la long ka jingïarap ïa nga, bad u la pyllait noh ïa nga na ka waitlam u Pharaoh.”

⁵ Te u Jethro, u kthaw kurim u Moses, u la wanlam ha u Moses ïa ki khun shynrang bad ïa ka tnga jong u ha kata ka ri khlaw ha kaba u la shong dara, hajan uta u lum U Blei:

⁶ bad u la ong ha u Moses, “Ma nga u Jethro, u kthaw kurim jong me nga la wan ha me, ryngkat bad ka tnga jong me, bad ar ngut ki khun shynrang jong ka lem bad ka.”

⁷ Te u Moses u la mih ban leit tan ïa la u kthaw kurim, bad u la nguh ïa u, bad u la doh ïa u; te haba ki la ïakylli shaphang ka bakoit bakhiah, ki la ïawan sha ka ïingjaiñ.

⁸ Te u Moses u la ïathuh naduh haduh ha la u kthaw kurim ïa kaba U Trai u la leh ha u Pharaoh bad ha ki Ijipt na ka bynta ki Israel, bad ïa ka jingjynjar baroh kaba la jia ha kata ka lynti, bad kumno ba U Trai u la pyllait noh ïa ki.

⁹ Te u Jethro u la kmen namar ka jinglehbha baroh kaba U Trai u la lah leh ïa ki Israel, ïa kiba u la lah pyllait noh na ka kti ki Ijipt.

¹⁰ U Jethro u la ong ruh, “Long ba la kyrkhu ïa U Trai, uba la pyllait noh ïa phi na ka kti ki Ijipt, bad na ka kti u Pharaoh; uba la pyllait noh ïa une u paidbah napoh ka kti ki Ijipt.

¹¹ Mynta nga tip keiñ, ba U Trai u long uba kham khraw ïa ki blei baroh: wat ha kata hi keiñ, ha kaba ki la ïaleh sarong eh halor jong ki.”

¹² Te u Jethro, u kthaw kurim u Moses, u la shim ïa ka jingainguh thang bad ïa ki jingkñia ainguh ïa U Blei: bad u Aaron u la wan lem bad ki tymmen basan ki Israel baroh, ïa ka ban bam kpu lem bad u kthaw kurim u Moses ha khmat U Blei.

Kaba thung ïa ki nongsynshar

¹³ Te ha kaba lashai, u Moses u la shong ban bishar ïa u paidbah: bad uta u paidbah u la ïaïeng hajan u Moses naduh mynstep haduh ba la ïongreiñ.

¹⁴ Te haba u kthaw kurim u Moses u la ïohi ïa kata baroh ba u la leh ïa uta u paidbah, u la ong, “Kaei kane ba me leh ïa u paidbah? balei me shong marwei, bad ba ki briew baroh ki ïaïeng hajan jong me naduh mynstep haduh ba la ïongreiñ?”

¹⁵ Te u Moses u la ïathuh ha la u kthaw kurim, “Namar ba ki briew ki ju ïawan ha nga ban ïakylli na U Blei;

¹⁶ haba ki ïadon kano kano ka kam, ki ïawan sha nga; bad nga bishar keiñ hapdeng ki paralok, bad nga ju pyntip ruh ha ki ïa ki hukum U Blei, bad ïa ki aiñ jong u.”

¹⁷ Te u kthaw kurim u Moses u la ong ha u, “Kane kaba me leh kam long ka babha.

¹⁸ Shisha men sa duh bor noh, ma me hi, bad une u paidbah ruh uba don lem bad me: naba kane ka kam ka kham khia ïa me; mem don bor ban leh ïa kane weibriew.

¹⁹ To sngap mynta ïa ka ktien jong nga, ngan ai ka jingsneng ïa me, bad U Blei un long ryngkat bad me: To long ma me na ka bynta ki briew ha khmat U Blei, ba men ïoh wallam ïa ki kam jong ki sha U Blei:

²⁰ men hikai ruh ha ki, ïa ki rukom bad ki hukum, bad men pyni ha ki, ïa ka lynti ha kaba ki dei ban ïaid, bad ïa ki kam ïa kiba ki dei ban leh.

²¹ Ruh putet, men jied na uta u paidbah baroh ïa ki briew kiba nang basian, ki basheptieng ïa U Blei, ïa ki briew keiñ ki bahok, kiba isih ïa ka jinglalot; men thung ruh kum kine halor jong ki, ba kin long ki nongsynshar ïa ki hajar, bad ki nongsynshar ïa ki spah, bad ki nongsynshar ïa ki sanphew, bad ki nongsynshar ïa ki phew.

²² To ai ruh ba kine kin ïabishar ïa ki briew ha la ka sngi: te ïa ki kam kiba jur baroh kin ïawallam ha me, hynrei, ïa ki kam ki barit kin ïabishar hi: kumta kan long kham suk ïa me hi, ma ki ruh kin ïakit lem bad me ïa ka jingkit.

²³ Lada men leh ïa kane, bad U Blei ruh un hukum ïa me kumta, te men long uba lah ban shah, bad une u paidbah baroh ruh un leit sha la ka jaka ha kaba suk.”

²⁴ Kumta, u Moses u la sngap ïa ka ktien u kthaw kurim jong u, u la leh ruh ïa kita baroh ïa kiba u la ong.

²⁵ Te u Moses u la jied na ki Israel baroh ïa ki briew kiba nang basian, bad u la thung ïa ki, ki rangbah halor uta u paidbah, ki nongsynshar ïa ki hajar, ki nongsynshar ïa ki spah, ki nongsynshar ïa ki sanphew, bad ki nongsynshar ïa ki phew.

²⁶ Bad kita ki la ïabishar ruh ïa u paidbah ha la ka sngi: te ïa kita ki kam kiba jur ki la ïawallam ha u Moses, hynrei, ïa ki kam ki barit baroh ki la ïabishar hi.

²⁷ U Moses te u la pyllait noh ïa la u kthaw kurim; u ruh u la leit noh sha la ka ri.