EKSODOS 17 - KA BAIBL

Ka um dih na u mawsiang

¹ Te u paidlang ki khun Israel baroh ki la ïamih na ka ri khlaw Sin, ha la ki jingleit, katba kum ka hukum U Trai, bad ki la shong dara ha Rephidim: hynrei, ym shym la don um ban dih u paidbah.

² Namar kata, ki paidbah ki la khñium eh ïa u Moses, ki da ïa-ong ruh, “To ai um ïa ngi ba ngin dih.” Bad u Moses u la ong ha ki, “Balei phi ïakhñium eh ïa nga? Balei phi tynjuh ïa U Trai?”

³ Ki paidbah te ki la ïasliang um eh hangta; bad ki paidbah ki la khñium ïa u Moses, ki da ïa-ong ruh, “Balei me la wallam noh ïa ngi na ka ri Ijipt, ban pynïap ïa ngi bad ïa ki khun jong ngi bad ïa ki jingri jong ngi de da kaba sliang?”

⁴ Te u Moses u la kyrpad jam ha U Trai, u da ong, “Ngan leh aïu ïa une u paidbah? Sa khyndiat kin sa lynthem ïa nga.”

⁵ U Trai te u la ong ha u Moses, “To ïaid ha shuwa uta u paidbah, bad to shim lem bad me na ki tymmen basan jong ki Israel; to shim ruh ïa u diengduh jong me ha la ka kti, da uba me la shoh ïa kata ka wah, to leit ruh.

⁶ Ha khmih, ngan ïeng ha khmat jong me hangta halor u mawsiang ha Horeb; bad men shoh ïa uta u mawsiang, te ka um kan sa mih noh na u, ba uta u paidbah un ïoh dih.” Te u Moses u la leh kumta ha khmat kita ki tymmen basan jong ki Israel.

⁷ Te u la khot ïa ka kyrteng jong kata ka jaka “Massah”, bad “Meribah”, namar ka jingïapyneh ki khun Israel, bad namar ba ki la tynjuh ïa U Trai, da kaba ong, “U Trai u don hapdeng jong ngi ne em?”

Ka thma bad ki Amalek

⁸ Ynda kumta, la wan ki Amalek, bad ki la ïaleh thma ïa ki Israel ha Rephidim.

⁹ Te u Moses u la ong ha u Joshua, “To jied ha ngi ïa ki rangbah, bad to mih noh ban ïaleh thma ïa ki Amalek: lashai ngan ïeng ha khlieh uta u lum bad u diengduh jong U Blei ha ka kti jong nga.”

¹⁰ Kumta, u Joshua u la leh kumba u Moses u la ong ha u, bad u la ïaleh thma ïa ki Amalek: te u Moses, u Aaron, bad u Hur ki la leit kiew ha khlieh uta u lum.

¹¹ Te katba u Moses u la dang rah sha jrong ïa la ki kti, ki lah ki Israel: te haba u la pynhiar ïa la ki kti, ki lah ki Amalek keiñ.

¹² Hynrei, ki kti u Moses ki la sakhrai: te ki la shim da u maw, ki la buh ruh hapoh jong u, bad u la shong halor jong u: u Aaron de bad u Hur ki la ïakyrshan ïa ki kti jong u, uwei sha kawei ka liang, bad uwei sha kawei pat; kumta, ki kti jong u ki la neh skhem, haduh ban da la sep ka sngi.

¹³ Te u Joshua u la jop thiaw ïa ki Amalek bad u paidbah jong u da ka syrti waitlam.

¹⁴ U Trai u la ong ruh ha u Moses, “To thoh ïa kane ha ka kitab ban long ka jingpynkynmaw, bad to ïathuh ruh ha u Joshua: namar ngan pyndam noh khoit ïa ka jingkynmaw ïa ki Amalek napoh ka bneng.”

¹⁵ Bad u Moses u la tei ïa ka duwan, bad u la khot ïa ka kyrteng jong ka “Jehobah-nissi”,

¹⁶ naba u la ong, “Namar U Trai u la smai: U Trai un ïoh kaba ïaleh thma ïa ki Amalek pateng la pateng.”