EKSODOS 16 - KA BAIBL

Ka manna na bneng

¹ Te ki la nang ïaid na Elim, bad u paidbah ki khun Israel baroh ki la ïawan poi sha ka ri khlaw Sin, kaba hapdeng ka Elim bad Sinai, ha ka sngi ka bakhatsan jong u bnai u ba-ar hadien ba ki la mih noh na ka ri Ijipt.

² Bad uta u paidbah ki khun Israel baroh ki la ïakhñium ïa u Moses bad ïa u Aaron ha kata ka ri khlaw;

³ bad ki khun Israel ki la ïa-ong ha ki, “A ban da ngi, ngi la ïap da ka kti U Trai ha ka ri Ijipt, mynba ngi la ïashong hajan ki khiew doh, mynba ngi la ïabam ïa u kpu ha ban da kdang; naba phi la wallam noh ïa ngi ha kane ka ri khlaw, ban pynïap ïa une u paidbah baroh da ka jingthngan.”

⁴ U Trai te u la ong ha u Moses, “Ha khmih, ngan pynhap ïa u kpu ha phi na bneng; bad u paidbah un mih noh ban lum kaba biang shi sngi shi sngi, ba ngan ïoh tynjuh ïa ki, la kin ïaid ha ki hukum jong nga ne em.

⁵ Te ha ka sngi ka bahynriew, kin ïa-pynkhreh ïa kaba ki wallam hapoh ïing, kata ruh kan long ar shah ïa kaba ki ju lum ha la ka sngi.”

⁶ Kumta, u Moses bad u Aaron ki la ïathuh ha ki khun Israel baroh, “Ynda la janmiet, phin sa tip ba U Trai u wallam noh ïa phi na ka ri Ijipt.

⁷ Bad ha kaba mynstep, phin ïohi ïa ka burom U Trai; naba u la ïohsngew ïa ka jingkhñium jong phi ïa U Trai: ma ngi te ngi long aïu, ba phin da khñium ïa ngi?”

⁸ Te u Moses u la ong, “Kane kan long, haba U Trai un da ai ha phi la janmiet ïa ka doh ban bam, bad mynstep ïa u kpu haduh ban da kdang ruh; namar ba U Trai u la ïohsngew ïa ki jingkhñium jong phi ïa kiba phi khñium ïa u: ngi long aïu ma ngi? ki jingkhñium jong phi kim long ïa ngi, hynrei, ïa U Trai keiñ.”

⁹ Bad u Moses u la kren ha u Aaron, “To ong ha u paidbah baroh ki khun Israel, ‘To da wan hajan ha khmat U Trai: naba u la ïohsngew ïa ki jingkhñium jong phi.’ ”

¹⁰ Ka la jia te, mynba u Aaron u dang kren ha uta u paidbah ki khun Israel, ba ki la ïakhmih shaphang kata ka ri khlaw, ha khmih ruh, ka burom U Trai ka la mihpaw ha uta u lyoh.

¹¹ Bad U Trai u la kren ha u Moses, u da ong,

¹² “Nga la ïohsngew ïa ki jingkhñium ki khun Israel: to kren ha ki, da kaba ong, ‘Ynda la janmiet phin ïoh bam ïa ka doh, bad mynstep ruh yn pynkdang ïa phi da u kpu; bad phin ïoh tip ba nga long ma nga U Trai U Blei jong phi.’ ”

¹³ Ka la jia te, haba la janmiet, ba ki 'iar khlaw ki la ïawan kiew, bad la ïatap lup ïa ka jaka shong dara jong ki: bad mynstep ka umjer ka la don baroh sawdong kata ka jaka shong dara.

¹⁴ Te mynba kata ka umjer kaba la don ka la rngad noh, ha khmih, la don halor kata ka ri khlaw kaei re kaei kaba pyllun, kaba rit kum u thah halor ka khyndew.

¹⁵ Te haba ki khun Israel ki la ïohi ïa ka, ki la ïa-ong paralok hi, “Ka manna?” naba kim tip kaei ka long. Te u Moses u la ong ha ki, “Une uta u kpu ïa uba U Trai u la ai ha phi ba phin bam.

¹⁶ Kane ka long kata ïa kaba U Trai u la hukum, ‘To lum phi uwei uwei baroh na ka katba u donkam ban bam; shi omer ïa uwei uwei u briew, katba kum ka jingkheiñ ki briew jong phi, to phin shim, uwei uwei na ka bynta kita kiba don ha ki ïingjaiñ jong u.’ ”

¹⁷ Te ki khun Israel ki la leh kumta, don kiba la lum kham bun, don ruh kiba kham duna.

¹⁸ Te haba ki la ïathew ïa ka ha ka omer, uta uba la lum kham bun um shym la don kaba tam, uta ruh uba la lum kham khyndiat um shym la duna; ki la lum uwei uwei baroh katba u donkam keiñ.

¹⁹ U Moses u la ong te, “To mano mano ruh wat pynsah satia na ka haduh lashai.”

²⁰ Pynban, kim shym la sngap ïa u Moses; hynrei, don kiba la pynsah na ka haduh mynstep, te ka la man ksaiñ, bad ka la iwtung ruh: te u Moses u la bitar ïa ki.

²¹ Ki la ju lum ruh ïa ka man ka step, uwei uwei baroh katba u donkam keiñ: te haba ka sngi ka la shit, ka la um noh.

²² Te ha ka sngi ka bahynriew ki la lum ar shah u kpu, ar omer ïa uwei uwei u briew: te ki rangbah baroh jong u paidbah ki la ïawan ïathuh ha u Moses.

²³ U ruh u la ong ha ki, “Kane ka long kata ïa kaba U Trai u la ong, ‘Lashai ka long ka jingshongthait jong ka Sabbaton bakhuid ha U Trai: to syang ïa kaba phin sa syang mynta, to shet ruh ïa kaba phin sa shet; bad kata kaba sah tam to buh noh ïa phi haduh lashai.’ ”

²⁴ Te la buh noh ïa ka haduh lashai, kumba u Moses u la hukum: te kam shym la iwtung, lymne ym shym la don ksaiñ ha ka.

²⁵ Bad u Moses u la ong, “To bam ïa kata mynta; naba mynta ka long ka Sabbaton ïa U Trai: phim lah ban shem ïa kane mynta ha ka lyngkha.

²⁶ Hynriew sngi phin lum ïa ka; hynrei, ha ka bahynñiew ka long ka Sabbaton, ha kata phin ym shem ei ei ruh em.”

²⁷ Pynban, la don na uta u paidbah kiba la mih noh ha ka sngi ka bahynñiew ïa ka ban lum, te kim shym la shem ei ei ruh em.

²⁸ Te U Trai u la ong ha u Moses, “Slem haduh katno phin ym kohnguh ban sumar ïa ki hukum bad ki adong jong nga?

²⁹ Phi ïohi ba U Trai u la ai ha phi ïa ka Sabbaton, namar kata, u la ai ha phi ha ka sngi ka bahynriew ïa kaba ar sngi u kpu; to shong uwei uwei u briew ha la ka jaka, ha ka sngi ka bahynñiew, to wat ai ban mih mano mano ruh na la ka jaka.”

³⁰ Kumta, uta u paidbah u la shongthait ha kata ka sngi ka bahynñiew.

³¹ Bad ka ïing Israel ki la khot ka kyrteng jong ka, “ka Manna”: te ka la long kum u symbai koriander, balieh; bad haba mad ïa ka ruh ka long kum u kpu uba da ka ngap.

³² U Moses u la ong ruh, “Kane ka long kata ïa kaba U Trai u la hukum, ‘To pyndap shi omer ha ka, ïa ka ban sumar ïa ki pateng la pateng bynriew jong phi; ba ki lah ban ïohi ïa uta u kpu da uba nga la bsa ïa phi ha kata ka ri khlaw, mynba nga la wallam noh ïa phi, na ka ri Ijipt.’ ”

³³ U Moses te u la ong ha u Aaron, “To shim ïa u khiew, bad to thep ha u shi omer ba-dap da ka manna to buh ruh ïa u ha khmat U Trai ïa ka ban sumar ïa ki pateng la pateng bynriew jong phi.”

³⁴ Kumba U Trai u la hukum ïa u Moses, kumta u Aaron u la buh ïa u ha khmat ka jingphla, ïa ka ban sumar.

³⁵ Ki khun Israel te ki la ïabam ïa ka manna sawphew snem, tad ynda ki la ïawan poi sha ka ri kaba shong briew; ki la ïabam keiñ ïa ka manna tad ynda ki la ïawan poi sha ki rud ka ri Kanaan.

³⁶ Te ka omer ka long kaba shiphew na ka ephah.