EKSODOS 15 - KA BAIBL

Ka jingrwai u Moses

¹ Ynda kumta, u Moses bad ki khun Israel ki la ïarwai ïa kane ka jingrwai ha U Trai, bad ki la kren, da kaba ong, “Ngan rwai ha U Trai, naba u la jop da ka burom bakhraw: ïa u kulai bad la u nongshong kulai u la bred sha ka duriaw.

² U Trai u long ka bor bad ka jingrwai jong nga, bad u la wan long ka jingpynim ïa nga: U long ma U, U Blei jong nga, bad ngan pyndonburom ïa U; U Blei u kpa jong nga, bad ngan ïaroh burom ïa U.

³ U Trai u long u nongïaleh thma: ‘U Trai’ long ka kyrteng jong u.

⁴ “Ki kali ïapom u Pharaoh bad ki paidïapom jong u, U la phyrnep sha ka duriaw: ïa ki rangbah ïapom jong u ba la donnam ruh la pynngam jyllop ha ka Duriaw Basaw.

⁵ Ki jingjylliew ki la tyllep ïa ki: ki la ngam haduh ka trai kum u maw.

⁶ Ka kti kamon jong me, A Trai, ka long kaba donburom ha ka bor, ka kti kamon jong me, A Trai, ka la lympat lyngkhot lyngkhai ïa ki nongshun.

⁷ Bad da ka jingkhraw ka burom jong me, me la pynkyllon ïa kita kiba la ïeng ïaleh ïa me: me la phah noh ïa la ka jingbitar, kaba la bam duh ïa ki kum ïa u jyntang kba.

⁸ Bad da ka jingpyrsad ki thliew khmut jong me la pynïalang lem ïa ki um, ki jingshlei ki la ïeng sha jrong kum ka kynton; ki jingjylliew ki la ïalang hapdeng ka duriaw.

⁹ Uta u nongshun u la ong, ‘Ngan sa beh, ngan sa lap, ngan sa pynïabynta ïa ka jinglute: yn sa pynhun ïa ka jingkwah jong nga halor jong ki; ngan sei ïa la ka waitlam, ka kti jong nga kan sa pynjot ïa ki.’

¹⁰ Me la pyrsad da ka lyer jong me, ka duriaw ka la tyllep ïa ki: ki la ïangam kum ka sisa ha kita ki um bajylliew bah.

¹¹ “Uei uba kat ma me, A Trai, hapdeng ki blei? uei uba kat ma me uba tyngshaiñ ha ka jingkhuid, uba itieng ha ki jingïaroh, uba leh ïa ki kam phylla?

¹² Me la kner noh ïa la ka la kti kamon, ka khyndew ka la nguid tylli ïa ki.

¹³ “Da la ka jingisynei me la ïalam noh ïa uta u paidbah ïa uba me la siewspah: me la btin ïa ki ha ka bor jong me sha ka jaka shongneh ka jingkhuid jong me.

¹⁴ Ki briew kin ïohsngew, bad kin ïasheptieng, ki jingkhuslai kin ngat ha ki nongshong ka ri Philistia.

¹⁵ Te ki syiem Edom kin kyndit; ki briew bakhraw batri ka Moab, ka jingkhynñiuh kan kem ïa ki: ki Kanaan baroh kin sa um noh.

¹⁶ Ka jingsheptieng bad ka jingshyrkhei kin ngat ha ki; da ka jingkhraw ka ksang'ti jong me kin ïasngap jar kum u maw; tad ynda kita ki briew jong me kin ïalait shiliang, A Trai, tad ynda ki ïalait shiliang uta u paidbah ïa uba me la siewspah.

¹⁷ Men wallam ïa ki shapoh, bad men thung ruh ïa ki ha u lum ka bynta skhem jong me, kata ka jaka, A Trai, ïa kaba me la khreh ïa lade ban shong duh ha ka, kata ka jaka kyntang keiñ, A Trai, ïa kaba ki kti jong me keiñ ki la pynskhem.

¹⁸ U Trai un synshar ha la ka rta.”

¹⁹ Naba ki kulai jong u Pharaoh lem bad ki kali ïapom jong u bad ki nongshong kulai jong u ruh ki la ïangam sha kata ka duriaw; bad U Trai u la pynphai ïa ki um ka duriaw halor jong ki; hynrei, ki khun Israel ki la ïaid ryngkew hapdeng ka duriaw.

²⁰ Te ka Miriam ka nongïathuhlypa, ka hynmen u Aaron, ka la shim ka kanjari ha la ka kti; ki kynthei baroh ruh ki la ïamih noh hadien jong ka da ki kanjari bad ki jingshad.

²¹ Ka Miriam ka la ong ruh ha ki, “To rwai phi ïa U Trai, naba U la jop da ka burom; ïa u kulai bad ïa u nongshong kulai U la phyrnep sha ka duriaw.”

Ki um bakthang ka Marah

²² Kumta, u Moses u la ïalam ïa ki Israel na ka Duriaw Basaw, ki la ïaleit ruh sha ka ri khlaw jong ka Shur; te ki la ïaid lai sngi lynti ha kata ka ri khlaw, bad kim shym la shem um.

²³ Te mynba ki la ïapoi sha Marah, kim lah ban dih ïa ki um jong ka Marah, naba ki la kthang: namar kata, la khot kyrteng “Ka Marah” ïa ka.

²⁴ Uta u paidbah te u la khñium ïa u Moses, ki da ïa-ong, “Ngin sa dih aïu?”

²⁵ Te u la duwai ha U Trai; te U Trai u la pyni ïa u dieng ïa u, ïa uba haba u la bred ha kita ki um, kita ki um keiñ ki la bang. Hangta u la buh ïa ka hukum bad ka rukom ïa ki, bad hangta u la tynjuh ïa ki;

²⁶ bad u la ong, “Lada men sngap biang biang ruh ïa ka ktien jong U Trai U Blei jong me, bad lada men leh ruh ïa kata kaba dei ha khmat jong u, bad men shahshkor ruh ïa ki hukum jong u, da kaba rakhe ïa ki niam ki rukom jong u baroh, ngan ym da buh ha me kawei ruh keiñ na kita ki jingpang ïa kiba nga la wallam halor ki Ijipt: naba ma nga, nga long U Trai uba pynim ïa me.”

²⁷ Te ki la ïawan poi sha Elim, ha kaba la don khat-ar tylli ki umpohliew, bad hynñiewphew tylli ki dieng Tlai: bad ki la ïashong dara hangta harud kita ki um.