EKSODOS 14 - KA BAIBL

Kaba ïaid lyngba ïa ka Duriaw Basaw

¹ U Trai te u la kren ha u Moses, u da ong,

² “To kren ha ki khun Israel ba kin ïaphai bad kin ïashong dara ruh ha khmat Pihahiroth, hapdeng ka Migdol bad ka duriaw, marpyrshah ïa ka Baal-sephon: ha khmat jong ka phin ïashong dara harud ka duriaw.

³ Naba u Pharaoh un ong shaphang ki khun Israel, ‘La riam ïa ki ha kata ka ri, kata ka ri khlaw keiñ ka la set kut ïa ki.’

⁴ Bad nga ngan pyneh ïa ka dohnud u Pharaoh, ba un beh nadien jong ki; kumta, ngan ïoh burom halor u Pharaoh, bad halor ki paidïapom jong u baroh; ba ki Ijipt kin ïoh tip ba nga, nga long U Trai.” Te ki la leh kumta.

⁵ Te la ïathuh ha u syiem ka ri Ijipt ba uta u paidbah u da ïaphet noh: te ka dohnud u Pharaoh bad ka jong ki shakri jong u ka la kylla pyrshah ïa uta u paidbah, ki la ïa-ong ruh, “Balei ngi la leh ïa kane, ba ngi la pyllait noh ïa ki khun Israel na kaba shakri ïa ngi?”

⁶ Te u la pynkhreh ïa la ki kali, bad u la shim ïa la ki paidbah ryngkat bad u:

⁷ u la shim ruh hynriewspah ki kali kiba la kynsai, bad ïa ki kali ka ri Ijipt baroh ruh, bad ïa ki nongïapom ha ki baroh kawei pa kawei.

⁸ Bad U Trai u la pyneh ïa ka dohnud u Pharaoh u syiem ka ri Ijipt, te u la beh nadien ki khun Israel: hynrei, ki khun Israel ki la ïamih noh da ka kti badonbor.

⁹ Te ki Ijipt ki la ïabeh nadien jong ki, baroh ki kulai bad ki kali ïapom u Pharaoh, bad ki nongshong kulai jong u ruh, bad ki paidïapom jong u de, bad ki la lap ïa ki ba ki da ïashong dara harud ka duriaw, hajan Pihahiroth, ha khmat ka Baal-sephon.

¹⁰ Te mynba u Pharaoh u la nang jan, ki khun Israel ki la khmied ïa la ki khmat, ha khmih te, ki Ijipt ki ïabeh nadien jong ki; bad ki la khaw-eit shikatdei eh: bad ki khun Israel ki la ïalynñiar ha U Trai.

¹¹ Ki la ïa-ong ruh ha u Moses, “Namar bymdon ki jingtep ha ka ri Ijipt, ba me la ïalam noh ïa ngi ban ïap ha kane ka ri khlaw? balei ba me la leh kumne bad ngi ban ïalam noh ïa ngi na ka ri Ijipt?

¹² Kane kam long kata ka ktien ba ngi la ïathuh ha me ha ka ri Ijipt, da kaba ong, ‘To iehnoh ïa ngi, ba ngin ïoh shakri ïa kine ki Ijipt?’ Naba ka la kham bha ïa ngi ban shakri ïa ki Ijipt, ban ïa ka ban ïap ha kane ka ri khlaw.”

¹³ Te u Moses u la ong ha uta u paidbah, “Wat sheptieng phi, to sangeh, to khmih ruh ïa ka jingpynim jong U Trai ïa kaba un sa pyni ha phi ha kane ka sngi: namar kita ki Ijipt ïa kiba phi la ïohi ha kane ka sngi, phin ym ïohi shuh ïa ki lano lano ruh.

¹⁴ U Trai un ïaleh na ka bynta jong phi, namar kata, to da sngap jar phi.”

¹⁵ Bad U Trai u la ong ha u Moses, “Balei ba me lynñiar ha nga? to kren ha ki khun Israel, ba kin nang ïaid noh.

¹⁶ Bad to rah ma me ïa la u diengduh, bad to kner ruh ïa la ka kti halor ka duriaw, to pynïakhlad ruh ïa ka: te ki khun Israel kin ïoh ïaid ryngkew lyngba ïa ka duriaw.

¹⁷ Bad ha khmih, ma nga hi, ngan pyneh ïa ka dohnud ki Ijipt, bad kin bud nadien jong ki: te ngan ïoh burom halor u Pharaoh, bad halor u paidïapom jong u baroh, bad halor ki kali ïapom jong u, bad halor ki nongshong kulai jong u ruh.

¹⁸ Ki Ijipt te kin sa tip ba ma nga, nga long U Trai, ynda nga la ïoh burom halor u Pharaoh, bad halor ki kali ïapom jong u, bad halor ki nongshong kulai jong u ruh.”

¹⁹ Te u angel U Blei uba la ju ïaid ha shuwa ka dara ki Israel, u la kynriah bad u la ïaid noh shadien jong ki; bad uta u rishot lyoh u la kynriah na khmat jong ki, bad u la ïeng shadien jong ki,

²⁰ bad u la wan ïeng hapdeng u paidbah ki Ijipt bad u paidbah ki Israel; bad u la long u lyoh bad ka jingdum, pynban u pynshai mynmiet: kumta, uwei ruh um shym ïajan ïa uta uwei baroh shi miet.

²¹ Te u Moses u la kner ïa la ka kti halor kata ka duriaw, bad U Trai u la pynphai pat ïa kata ka duriaw da ka lyer mihngi kaba jur ha kata baroh shi miet, bad u la pynrngad ïa ka duriaw, ïa kita ki um ruh la pynïakhlad.

²² Bad ki khun Israel ki la ïaid ryngkew shapdeng ka duriaw: kita ki um ruh ki la long kum ka kynroh ïa ki sha kamon, bad sha kadiang jong ki de.

²³ Te ki Ijipt ki la ïabeh, bad ki la ïabud nadien jong ki shapdeng kata ka duriaw, ki kulai u Pharaoh baroh, bad ki kali ïapom jong u, bad ki nongshong kulai jong u ruh.

²⁴ Ka la jia ruh ha ka jingap mynstep, ba U Trai u la khmih ha u paidïapom ki Ijipt lyngba uta u rishot ding bad lyoh, te u la pynkhihwin ruh ïa u paidïapom ki Ijipt.

²⁵ Te haba u la weng noh ïa ki shalyntem ki kali jong ki, u la pynïaid khia ïa ki: katba ki Ijipt ki la ïa-ong, “Ïa, ngin ïaphet ïap noh na khmat ki Israel; naba U Trai u ïaleh na ka bynta jong ki pyrshah ïa ki Ijipt.”

²⁶ Te U Trai u la ong ha u Moses, “To kner noh ïa la ka kti halor ka duriaw, ba kita ki um kin tyllep pat halor ki Ijipt, halor ki kali ïapom jong ki, bad halor ki nongshong kulai jong ki.”

²⁷ Te haba u Moses u la kner noh ïa la ka kti halor ka duriaw, te kata ka duriaw ka la wan phai pat ha la ka bor hamar kaba mynstep; te ki Ijipt ki la phet ïap pyrshah ïa ka; bad U Trai u la kynther noh ïa kita ki Ijipt hapdeng ka duriaw

²⁸ Kita ki um te ki la ïawan phai pat, bad ki la ïatyllep noh lin ïa kita ki kali ïapom, bad ïa kita ki nongshong kulai, bad ïa uta u paidïapom u Pharaoh baroh kiba la beh nadien jong ki hapdeng ka duriaw; ym shym la sah shuh tang uwei ruh na ki.

²⁹ Hynrei, ki khun Israel ki la ïaid ryngkew hapdeng kata ka duriaw, kita ki um ruh ki la long kum ka kynroh ïa ki sha kamon, bad sha kadiang jong ki de.

³⁰ Kumta, U Trai u la pyllait noh ïa ki Israel ha kata ka sngi na ka kti ki Ijipt; bad ki Israel ki la ïohi ïa kita ki Ijipt ba ki la ïap harud ka duriaw.

³¹ Te ki Israel ki la ïohi ïa kata ka kambah ka bakhraw kaba U Trai u la leh halor kita ki Ijipt, bad uta u paidbah u la sheptieng ïa U Trai: bad ki la ngeit ruh ha U Trai bad ha u Moses u shakri jong u.