EKSODOS 13 - KA BAIBL

Kaba pynkyntang khuid ha U Blei ïa uba la kha nyngkong

¹ Te U Trai u la kren ha u Moses, u da ong:

² “To pynkyntang ha nga ïa uba la kha nyngkong baroh, ïa kaei kaei baroh keiñ ïa kaba la kha nyngkong hapdeng ki khun Israel, na u briew bad na u mrad de: u long u jong nga.”

Ka Jingkhawai Niam U Kpu Bakhlem Thiat

³ Te u Moses u la ong ha u paidbah, “To kynmaw phi ïa kane ka sngi, ha kaba phi la wan noh na ka ri Ijipt, na kata ka ïing ka jingpynlong mraw; naba da ka kti badonbor U Trai u la ïalam noh ïa phi nangta: wat bam ïa u kpu ba dei thiat.

⁴ Ha kane ka sngi phi la wan noh ha u 'nai Abib.

⁵ Te ynda U Trai u la ïalam ïa me sha ka ri ki Kanaan, bad ki Hit, bad ki Amor, bad ki Hib, bad ki Jebus de, ïa kaba u la smai ha ki kpa jong me ban ai ha me, ka ri kaba tuid da ka dud bad ka ngap, men leh ïa kane ka kam ha une u bnai.

⁶ Hynñiew sngi men bam ïa u kpu bakhlem thiat, te ha ka bahynñiew sngi kan long Ka Jingkhawai Niam ha U Trai.

⁷ Phin bam ïa u kpu bakhlem thiat hynñiew sngi; bad wat ai ban ïohi bad me ïa u kpu ba dei thiat, bad wat da ai ban ïohi ïa u thiat, ha ki phang jong me baroh.

⁸ Men pynpaw ruh ha u khun jong me ha kata ka sngi, da kaba ong, ‘Ïa kane nga leh, namar kata, ïa kaba U Trai u la leh ha nga, mynba nga la wan noh na ka ri Ijipt.’

⁹ Kane te kan sa long ka dak ïa me ha ka kti jong me, bad kum ka jingpynkynmaw hapdeng ki khmat jong me, khnang ba ka hukum U Trai kan da long ha ka shyntur jong me: namar da ka kti badonbor U Trai u la ïalam noh ïa me na ka ri Ijipt.

¹⁰ Namar kata, men sumar ïa kane ka hukum ha la ka aïom man la ka snem.”

Kiba la kha nyngkong

¹¹ “Bad ynda U Trai te u la wallam ïa me sha ka ri ki Kanaan, kumba u la smai ha me bad ha ki kpa jong me bad un ai ruh ïa ka ha me,

¹² te me ruh men pynkyntang ha U Trai ïa uba la kha nyngkong baroh, bad ïa uba la kha nyngkong baroh na ki mrad ruh ba me don; ki shynrang keiñ kin long ki jong U Trai.

¹³ Bad ïa uba la kha nyngkong na ka kadda baroh ruh men siewspah da u khun langbrot; te lada men ym siewspah ïa u, to kdiah te ïa ka ryndang jong u: bad baroh ïa uba la kha nyngkong jong u briew hapdeng ki khun jong me men da siewspah ruh.

¹⁴ Te haba u khun jong me un sa kylli ïa me lashai lashisngi, u da ong, ‘Kaei kane?’ men ong ha u te, ‘Da ka kti badonbor U Trai u la ïalam noh ïa ngi na ka ri Ijipt, na ka ïing ka jingpynlong mraw keiñ.

¹⁵ Ka la jia te mynba u Pharaoh da kaba eh u da pyllait noh ïa ngi, ba U Trai u la pynïap ïa uba la kha nyngkong baroh ha ka ri Ijipt, ïa uba la kha nyngkong na u briew, bad ïa uba la kha nyngkong na u mrad ruh. Namar kata, nga kñia ainguh ha U Trai ïa uba la kha nyngkong baroh, uba long shynrang; hynrei, ïa uba la kha nyngkong na ki khun jong nga baroh nga siewspah keiñ.’

¹⁶ Kane te kan long ka dak ha ka kti jong me, bad ki jingteh hapdeng ki khmat jong me: namar da ka kti badonbor U Trai u la wallam ïa ngi na ka ri Ijipt.”

U rishot lyoh bad u rishot ding

¹⁷ Te, mynba u Pharaoh u la pyllait noh ïa uta u paidbah, U Blei um shym la ïalam ïa ki na lynti ka ri ki Philistia, la kata ka la jan ruh; naba U Blei u la ong, “Ba ïoh uta u paidbah un kylla, haba ki ïohi ïa ka thma, bad un leit phai pat sha ka ri Ijipt.”

¹⁸ Hynrei, U Blei u la ïalam ïa uta u paidbah sawdong, na ka lynti ka ri khlaw ka Duriaw Basaw: da kaba kieng atiar ruh ki khun Israel ki la ïaleit mih artet na ka ri Ijipt.

¹⁹ Bad u Moses u la shim lem bad u ïa ki shyieng jong u Joseph; naba u la pynsmai skhem ïa ki khun Israel, u da ong, “U Blei shisha un da wan-i ïa phi; phi ruh phin ïarah ïa ki shyieng jong nga artet lem bad phi.”

²⁰ Te ynda ki la ïamih noh na Sukkoth, ki la shong dara ha Etham, harud ka ri khlaw.

²¹ Bad U Trai u la ïaid ha shuwa jong ki mynsngi ha u rishot lyoh, ban ïalam lynti ïa ki; bad mynmiet ruh ha u rishot ding, ban ai jingshai ïa ki; ba ki lah ban ïaid mynsngi bad mynmiet ruh:

²² um shym la shim noh ïa uta u rishot lyoh mynsngi, lymne ïa uta u rishot ding mynmiet, na khmat uta u paidbah.