EKSODOS 12 - KA BAIBL

Ka Niam Ka Jinglait

¹ Te U Trai u la kren ha u Moses bad ha u Aaron ha ka ri Ijipt, u da ong,

² “Une u bnai un long ha phi u banyngkong na ki bnai: un long ïa phi u bnai nyngkong jong ka snem.

³ To kren ha u paidbah Israel baroh, da ong, ‘Ha ka bashiphew sngi jong une u bnai, to shim ha lade man la u briew ïa u khun langbrot, katba kum ka ïing ki kpa jong ki, uwei uwei u khun langbrot khmat ka ïing keiñ.

⁴ Te lada shi ïing ka duna briew ïa uwei u khun langbrot, to ai ba uta bad la u paramarjan ïing kin sa ïashim ïa u katba don ka jingkheiñ ki briew; uwei uwei baroh katba u ju bam phin kheiñ ïa uta u khun langbrot.

⁵ Uta u khun langbrot jong phi un long uba janai, u shynrang uba shi snem: phin sa shim ïa u na ki jong ki langbrot, lane na ki jong ki blang;

⁶ to ri ïa u ruh haduh khatsaw sngi jong une u bnai: bad ka jingïalang jong u paidbah Israel baroh kin ïa-pynïap ïa u ha kaba la janmiet.

⁷ Kin shim ruh na ka snam, bad kin kyllan ha ki baroh ar liang ka shawkad bad ha khlieh jingkhang jong kita ki ïing, ha kiba kin sa ïabam ïa u.

⁸ Kin ïabam ruh ïa ka doh ha kata ka miet, ïa kaba la syang ha ka ding, bad ïa ki kpu khlem thiat; lem bad ki jhur bakthang kin ïabam ïa ka.

⁹ Phi wat ïabam doh im ïa ka, lymne ba la shet um, hynrei, ba la syang ha ka ding; ïa ka khlieh jong u lem bad ki kjat bad ki snier jong u ruh de.

¹⁰ Phin ym pynsah ei ei ruh na u haduh mynstep; te ïa kata kaba dang sah haduh mynstep, to thang noh ha ding.

¹¹ Te kumne phin ïabam ïa u; ba la panpoh ïa la ki syngkai, la ki juti ha la ki sla'jat, bad la ki diengduh ruh ha la ki kti: bad phin ïabam ruh ïa u da kaba kyrkieh: ka long ka jinglait jong U Trai.

¹² Naba ngan ïaid lyngba ka ri Ijipt ha kane ka miet, bad ngan shoh ïap ïa u khun nyngkong baroh kiba ha ka ri Ijipt, u jong u briew bad u jong u mrad ruh; bad pyrshah ïa ki blei ka ri Ijipt ngan pynlong ïa ka jingbishar: ma nga, nga long U Trai.

¹³ Kata ka snam te kan sa long ka dak ïa phi ha ki ïing ha kiba phi don: bad haba nga ïohi ïa kata ka snam, ngan ïaid palat ïa phi, bad kata ka jingpynïap kan ym long ïa ka ban pynjot ïa phi, haba nga shoh ïap ïa ka ri Ijipt.

¹⁴ “ ‘Kane ka sngi ruh kan long ïa phi ka jingpynkynmaw, bad phin rakhe ruh ïa ka kum Ka Jingkhawai Niam ïa U Trai: ha ki pateng la pateng jong phi phin rakhe ïa ka keiñ kum Ka Jingkhawai Niam da ka hukum kaba ha la ka rta.

¹⁵ Hynriew sngi phin bam ïa u kpu khlem thiat; ha ka sngi nyngkong to bred noh ïa u thiat na ki ïing jong phi: naba uno uno ruh uba bam ïa u kpu ba dei thiat naduh kata ka sngi banyngkong haduh ka sngi ka bahynñiew, ïa kata ka mynsiem yn ot noh na ki Israel.

¹⁶ Ha kata ka sngi banyngkong te kan long ka jingïaseng bakyntang, bad ha kata ka sngi bahynñiew ruh ka jingïaseng bakyntang ïa phi: wat leh ka kam ei ei ruh ha ki, tang ïa kaba u briew baroh u bam, tang ïa kata hi lah ban leh.

¹⁷ Phin rakhe te ïa Ka Niam U Kpu Khlem Thiat; namar ha kane ka sngi hi, ngan ïalam noh ïa ki paidbah jong phi na ka ri Ijipt: namar kata, phin rakhe ïa kane ka sngi ha ki pateng la pateng jong phi da ka hukum ha la ka rta.

¹⁸ Ha u bnai banyngkong, ha ka bakhatsaw sngi jong uta u bnai ha kaba la janmiet, phin ïabam ïa u kpu khlem thiat, haduh ka ba-arphew wei jong uta u bnai la janmiet.

¹⁹ Hynñiew sngi wat ai ba yn shem ïa u thiat ha ki ïing jong phi: naba uno uno ruh uba bam ïa u kpu ba dei thiat, ïa kata ka mynsiem yn ot noh na ka jingïalang ki khun Israel, la u long u nongwei, ne u trai-shnong.

²⁰ Phin ym bam ei ei ruh ba la dei thiat; ha ki jaka shong jong phi baroh phin bam da u kpu khlem thiat.’ ”

²¹ Ynda kumta, u Moses u la khot ïa ki tymmen basan baroh ki Israel, bad u la ong ha ki, “To kem, shim ruh ïa u khun langbrot sha lade katba kum ki ïing ki ïing jong phi, bad to pynïap ïa ka jinglait.

²² Bad to shim ruh shi song u Hyssop, bad haba phi la wieh ïa u ha ka snam kaba ha ka pliang, to kyllan ïa ka khlieh jingkhang bad ïa baroh ar liang ki shawkad da kata ka snam kaba ha kata ka pliang; te mano mano ruh na phi wat mih shabar ka jingkhang la ka jong ka ïing haduh mynstep.

²³ Naba U Trai un sa ïaid lyngba ïa ka ban shoh ïap ïa ki Ijipt; te haba u ïohi ïa kata ka snam ha khlieh jingkhang, bad ha baroh ar liang ki shawkad, U Trai un ïaid palat ïa kata ka jingkhang, bad un ym shah ïa uta u nongpynjot ban wan hapoh ki ïing jong phi ïa ka ban pynjot.

²⁴ To phin sumar ruh ïa kane ban long ka hukum ïa me bad ïa ki khun shynrang jong me ha la ka rta.

²⁵ Te ynda phi la poi sha kata ka ri ïa kaba U Trai un sa ai ha phi, kumba u la kular, phin leh ïa kane ka kam.

²⁶ Te kan jia, haba ki khun jong phi kin ong ha phi, ‘Phi mut aïu da kane ka kam?’

²⁷ Ba phin ïathuh, ‘Ka long ka jingkñia ka jinglait jong U Trai, uba la ïaid palat ïa ki ïing jong ki khun Israel ha ka ri Ijipt, mynba u la shoh ïap ïa ki Ijipt, bad u la pyllait ïa ki ïing jong ngi.’ ” Te uta paidbah u la nguh bad u la mane ruh.

²⁸ Te ki khun Israel ki la ïaleit noh bad ki la leh kumta; kumba U Trai u la lah hukum ïa u Moses bad ïa u Aaron, kumta ki la leh keiñ.

Ka jingpynïap ïa u khun nyngkong

²⁹ Te ha kaba shiteng synñia, U Trai u la shoh ïap ïa uba kha nyngkong baroh ha ka ri Ijipt; naduh uba la kha nyngkong jong u Pharaoh uba shong halor la ka khet haduh uba la kha nyngkong jong ka mraw kaba ha ka ïing byndi; bad ïa kiba la kha nyngkong jong ki mrad baroh ruh.

³⁰ Bad u Pharaoh u la khie mynmiet, ma u, bad ki shakri jong u baroh, bad ki Ijipt baroh; te la don ka jinglynñiar bakhraw ha ka ri Ijipt; naba ym shym la don ïing khlem da don u baïap.

³¹ Bad u la khot ïa u Moses bad ïa u Aaron mynmiet, bad u la ong, “To ïeng, to mih noh napdeng ki briew jong nga, ma phi bad ki khun Israel ruh; to khie leit noh, da shakri ïa U Trai, kumba phi la ong.

³² To shim ruh ïa la ki langbrot bad ïa la ki masi, kumba phi la ong, bad to khie noh; to kyrkhu ïa nga ruh.”

³³ Te kita ki Ijipt ki la ïakyntu eh ïa u paidbah, ki da phah noh ïa ki na kata ka ri da kaba kyrkieh; naba ki la ïa-ong, “Ngi la ïap lut noh.”

³⁴ Uta u paidbah te u la shim ïa u kpu im jong ki haba ym pat la khleh thiat, ki la ïasong ruh ïa u kpu im jong ki ha la ki jaiñkup ba ki da bah ha la ki tyrpeng.

³⁵ Ki khun Israel ki la leh ruh katba kum ka ktien u Moses; bad ki la ïapan na ki Ijipt ïa ki jingdeng rupa, bad ïa ki jingdeng ksiar, bad ïa ki jaiñkup jaiñsem de;

³⁶ te U Trai u la ai ha uta u paidbah ka jingsngewbha ha khmat ki Ijipt, ba kumta ki la ai ha ki katba ki la pan. Kumne ki la ïoh buria pat na ki Ijipt.

Ki khun Israel ki ïaleit mih noh na ka ri Ijipt

³⁷ Te ki khun Israel ki la ïaleit mih noh na Rameses sha Sukkoth da ka kjat, kumba hynriewspah hajar ki rangbah, nalor ki khynnah.

³⁸ Bad bun ki paidbah bakhleh ruh ki la ïaleit kiew lem bad ki: ki langbrot ruh, bad ki masi, ki jingri shibun eh keiñ.

³⁹ Te ki la shet ïa u kpu bakhlem thiat da uta u kpu im ïa uba ki la wallam na ka ri Ijipt, naba ym shym la khleh thiat ïa u; namar la beh noh ïa ki na ka ri Ijipt, katba kim lah ban sangeh shuh, lymne kim shym la ïoh khreh jingbam ïa lade.

⁴⁰ Te ka jingshong sah ki khun Israel katba ki la ïashong sah ha ka ri Ijipt ka la long sawspah laiphew snem.

⁴¹ Te ynda la kut kita ki sawspah laiphew snem, ha kata ka sngi hi keiñ, ka la jia ba ki paidbah jong U Trai baroh ki la ïamih noh na ka ri Ijipt.

⁴² Kane ka long ka miet ïa ka ban rakhe ha U Trai ha kaba la ïalam noh ïa ki na ka ri Ijipt; kane ka long kata ka miet U Trai, ïa ka ban rakhe da ki khun Israel baroh ha ki pateng la pateng jong ki.

Kaba buh ïa Ka Niam Ka Jinglait

⁴³ U Trai u la kren ruh ha u Moses bad u Aaron, “Kane ka hukum jong kata Ka Jinglait: u nongwei un ym ïoh bam ïa ka;

⁴⁴ hynrei, u shakri baroh ïa uba la thied da u sbai, ynda me la otsher ïa u, te un sa bam ïa ka.

⁴⁵ U nongwei bad u nongbylla kin ym ïoh bam ïa ka.

⁴⁶ Tang ha kawei ka ïing dei ban bam ïa ka; wat rah ei ei ruh em na ka doh shabar kata ka ïing; lymne wat pynkheiñ ïa kawei ka shyieng jong ka.

⁴⁷ Baroh ka jingïalang ki khun Israel kin ïarakhe ïa kane.

⁴⁸ Te haba u nongwei un shong basa lem bad me, bad un da mon ruh ban rakhe ïa Ka Jinglait ha U Trai, to ai ban otsher ïa ki shynrang jong u baroh, ynda kumta te, ai un wan hajan ïa ka ban leh ïa ka; te un long kum uba la kha ha ka ri hi: hynrei, uno uno uba khlem otsher un ym bam ïa ka.

⁴⁹ Tang kawei ka hukum kan long ïa uba la kha ha la ka ri hi, bad ïa u nongwei uba wanhap hapdeng jong phi.”

⁵⁰ Kumne te ki khun Israel baroh ki la leh; kat kaba U Trai u la hukum ïa u Moses bad u Aaron, kumta hi, ki la leh.

⁵¹ Bad ka la jia ba ha kata hi ka sngi ba U Trai u la wallam ïa ki khun Israel na ka ri Ijipt da ki paidbah.