EKSODOS 11 - KA BAIBL

Ka jingbyrngem ban pynïap ïa ki khun nyngkong

¹ Te U Trai u la ong ha u Moses, “Ngan da wallam shuh sa kawei ka jingpynïapthem halor u Pharaoh, bad halor ka ri Ijipt; hadien kata te, un sa pyllait noh ïa phi nangne: haba un da pyllait noh ïa phi, shisha un da beh noh ïa phi nangne baroh phar.

² To kren mynta ha kaba ïohsngew u paidbah, bad to ai ba u briew baroh un pan na la u paramarjan, bad ka kynthei baroh na la ka paramarjan ïa ki jingdeng rupa bad ïa ki jingdeng ksiar.”

³ U Trai ruh u la ai ha uta u paidbah ka jingsngewbha ha khmat ki Ijipt. U Moses ruh u la long u briew bakhraw eh ha ka ri Ijipt, ha khmat ki shakri u Pharaoh, bad ha khmat ki briew baroh.

⁴ U Moses u la ong ruh, “Kumne u la ong U Trai, ‘Hamar shiteng synñia ngan leit mih noh shabar hapdeng ka ri Ijipt;

⁵ te u khun nyngkong baroh uba ha ka ri Ijipt un sa ïap noh, naduh u khun nyngkong u Pharaoh uba shong halor la ka khet, haduh u khun nyngkong jong ka mraw batrei ha u mawtylliat; bad ki khun nyngkong jong ki mrad baroh.

⁶ Kan sa long te ka jinglynñiar bakhraw ha ka ri Ijipt baroh kawei, kat kata ym pat ju don, lymne kat kata ruh yn ym long shuh.

⁷ Hynrei, ïa uwei ruh na ki khun Israel, u ksew un ym pynkhih ïa la u thylliej, ïa u briew lane ïa u mrad: khnang ba phin ïoh tip ba U Trai u buh ka jingïapher hapdeng ki Ijipt bad ki Israel.’

⁸ Te kine ki shakri jong me baroh kin ïawan hiar ha nga, bad kin ïanguh ïa nga, kin da ïa-ong, ‘To leit mih noh phi, bad une u paidbah baroh uba bud ïa me:’ hadien kata te, ngan sa mih noh.” Te u la leit mih noh na u Pharaoh ha ka jingbitar bakhraw.

⁹ U Trai te u la ong ha u Moses, “U Pharaoh un ym shahshkor ïa phi: ba ki dak khyllah jong nga kin nang bun ha ka ri Ijipt.”

¹⁰ U Moses ruh bad u Aaron ki la leh ïa kine ki dak khyllah baroh ha khmat u Pharaoh: te U Trai u la pyneh ïa ka dohnud u Pharaoh, ba kumta un ym pyllait noh ïa ki khun Israel na ka ri jong u.