EKSODOS 1 - KA BAIBL

Ka jingshah jynjar ki khun Israel ha ka ri Ijipt

¹ Te kine ki long ki kyrteng ki khun shynrang Israel, kiba la wan sha ka ri Ijipt; uwei pa uwei bad la ka ïing ki la ïawan ryngkat bad u Jakob.

² U Reuben, u Simeon, u Lebi, bad u Judah;

³ u Issakhar, u Sabulon, bad u Benjamin;

⁴ u Dan, u Naphtali, u Gad, bad u Asher.

⁵ Ki mynsiem baroh te kiba la mih na ka syngkai u Jakob ki la long jin hynñiewphew ki mynsiem; naba u Joseph u la don lypa ha ka ri Ijipt.

⁶ Te u Joseph u la ïap noh, bad ki hynmen jong u baroh, bad kata ka pateng bynriew.

⁷ Bad ki khun Israel ki la ïaroi, bad ki la ïaroi kyrhai, ki la ïaman bun eh, bad ki la nang khraw bor ruh shikatdei; te la pyndap ïa kata ka ri da ki.

⁸ Ynda kumta te, la mih u syiem thymmai ha ka ri Ijipt, u bym shym la ithuh ïa u Joseph.

⁹ Bad u la ong ha la ki briew, “Ha khmih, ki briew jong ki khun Israel ki la kham bun bad ki kham don bor ruh ban ïa ngi:

¹⁰ Ïa, ngin ïakham leh sian bad ki; ba ïoh kin ïaroi, bad haba kan mih ka thma, kan jia ba kin ïashah bad ki nongshun jong ngi, bad ïaleh bad ngi, te kumta kin leit mih noh na kane ka ri.”

¹¹ Namar kata, ki la thung ïa ki sordar halor jong ki ban pynshitom ïa ki da ki jingkit jong ki. Te ki la tei ki nongbah ki jingkynshew ïa u Pharaoh, ka Pithom bad ka Raamses keiñ.

¹² Te katba ki la nang pynshitom ïa ki, katta ki la ïa nang roi pynban. Bad la pynjynjar ïa ki namar ki khun Israel.

¹³ Te ki Ijipt ki la pyntrei ïa ki khun Israel da kaba jur eh:

¹⁴ Bad ki la ïa-pynkthang ïa ka jingim jong ki da ka jingpynlong mraw kaba shitom ha ka 'dewbyrtha bad ha u maw-it, bad ha ka kynja jingtrei baroh ha ka lyngkha, ka jingtrei jong ki baroh, ha kaba la pyntrei ïa ki ka la long da kaba jur keiñ.

¹⁵ Te uta u syiem ka ri Ijipt u la kren ha ki Hebru kynthei kiba bat khun, kiba ka kyrteng kawei na ki long “Ka Shiphrah”, bad ka kyrteng kawei pat “Ka Puah”:

¹⁶ bad u la ong, “Haba phi leh ïa ka kam bat khun ha ki kynthei Hebru, bad ba phi khmih ïa ki haba ki dang kha; lada i long shynrang, te phin pynïap noh ïa u; hynrei, lada i long kynthei, te kan ïoh im.”

¹⁷ Hynrei, kita ki nongbat khun ki la sheptieng ïa U Blei, bad kim shym leh kumba uta u syiem ka ri Ijipt u la hukum ïa ki, hynrei, ki la ri im ïa ki khun shynrang.

¹⁸ Te uta u syiem ka ri Ijipt u la khot ïa kita ki nongbat khun, bad u la ong ha ki, “Balei phi la leh ïa kane, bad ba phi la ri im ïa ki khun shynrang?”

¹⁹ Kita ki nongbat khun te ki la ong ha u Pharaoh, “Namar ki kynthei Hebru kim long kum ki kynthei Ijipt; naba ki long kiba shait, bad ki kha haba ki nongbat khun kim pat poi ha ki.”

²⁰ Namar kata, U Blei u la leh bha ïa kita ki nongbat khun: bad kita ki briew ki la nang roi, bad ki la nang khraw bor de shikatdei.

²¹ Te namar ba kita ki nongbat khun ki la sheptieng ïa U Blei, ki Hebru ki la ïa nang roi.

²² Te u Pharaoh u la hukum ïa ki briew jong u baroh, u da ong, “Ïa ki khun shynrang baroh kiba yn kha to phin bred noh sha kata ka wah, hynrei, ïa ki khun kynthei baroh phin ri im.”