EKLESIASTIS 3 - KA BAIBL

Ka don ka por ïa kiei kiei baroh

¹ Don ka aïom ïa kiei kiei baroh, bad ka por ïa ka jingthmu baroh hapoh ka bneng:

² ka por ban kha, bad ka por ban ïap; ka por ban thung, bad ka por ban rat noh ïa kata kaba la thung;

³ ka por ban pynïap, bad ka por ban pynkhiah; ka por ban pynpra noh, bad ka por ban tei pat;

⁴ ka por ban ïam, bad ka por ban rkhie; ka por ban sngewsih, bad ka por ban shad;

⁵ ka por ban bred noh ïa ki maw, bad ka por ban ïalum lang ïa ki maw; ka por ban ïa-piam, bad ka por ban ym ïa-piam;

⁶ ka por ban wad, bad ka por ban jah noh; ka por ban ri, bad ka por ban bred noh;

⁷ ka por ban kad, bad ka por ban suh; ka por ban sngap jar, bad ka por ban kren;

⁸ ka por ban ieit, bad ka por ban isih; ka por ban ïaleh thma, bad ka por ban ïasuk.

⁹ Ka jingmyntoi aïu un ïoh uta uba trei ha kata kaba u trei shitom?

¹⁰ Nga la ïohi ïa ka jingshitom ïa kaba U Blei u la ai ha ki khun bynriew, ban dup mlien da kata.

¹¹ U la pynlong itynnad ïa kiei kiei baroh ha la ka aïom: ruh u la buh ïa ka pyrthei ha ka dohnud jong ki, pynban, la kumta ruh, u briew um lah ban shem ïa kata ka kam kaba U Blei u la leh naduh ka basdang haduh ka bakut.

¹² Nga tip ba ym don ei ei kaba kham bha ïa ki, ban ïa ka ban leh kmen, bad ban leh bha katba ki dang im.

¹³ Bad ba u briew baroh ruh, un bam bad ba un dih, bad ban pynsngewbha ïa lade ha ka jingtrei jong u baroh, ka long ka jingai U Blei.

¹⁴ Nga tip ba kaei kaei baroh ïa kaba U Blei u leh, kan neh junom: ym lah ban pynlang ei ei ha ka, lymne shim noh ei ei na ka: bad U Blei u la leh ïa ka, ba ki briew kin tieng ha khmat jong u.

¹⁵ Kata kaba long ka la lah long lypa; bad kata ka ban sa long ka la long lypa: bad U Blei u wad pat ïa kata kaba la ïaid jah noh.

Ka jingthala jong ka jingim

¹⁶ Bad nalor kane, nga la ïohi hapoh ka sngi, ha ka jaka jingbishar, ba ka bymman ka la don hangta; bad ha ka jaka jong ka hok, ba ka bymman ka la don hangta.

¹⁷ Nga la ong ha la ka dohnud, “U Blei un bishar ïa u bahok bad ïa u bymman: namar don ka por hangta ïa ka jingthmu baroh bad ïa ka kam baroh.”

¹⁸ Nga la ong ha la ka dohnud, “Ka long namar ki khun bynriew, ba U Blei un ïoh tynjuh ïa ki, bad ba kin ïohi ba ki long hi tang kum ki mrad.”

¹⁹ Naba kata kaba jia ïa ki khun bynriew ka jia ïa ki mrad; kajuh hi keiñ ka jia ïa ki: kumba uta uwei u ïap, kumta uta uwei pat u ïap; shisha, ki baroh, ki don kajuh ka jingim; bad u briew um don ka jingkor nalor ki mrad: namar baroh ka long kaba thala.

²⁰ Baroh ki leit sha kajuh ka jaka; baroh ki long na ka 'dewmet, bad baroh kin phai pat sha ka 'dewmet.

²¹ Uei uba ithuh ïa ka mynsiem u briew la ka kiew artet ne em, bad ïa ka mynsiem u mrad la ka hiar arsut sha ka khyndew ne em?

²² Namar kata, nga la ïohi ba ym don ei ei kaba kham bha, ban ïa kaba u briew un leh kmen ha la ki kam; namar kata ka long ka bynta jong u: namar uei u ban wallam noh pat ïa u ban ïohi ïa kaei ka ban long hadien jong u?