DANIEL 9 - KA BAIBL

Ka jingduwai u Daniel na ka bynta ka Jerusalem

¹ Ha ka snem ka banyngkong jong u Daraïos u khun u Ahasueros, uba na u symbai jong ki Mid, ïa uba la pynlong syiem halor ka hima Khaldea;

² ha ka snem ka banyngkong ka jingsynshar jong u, nga, u Daniel, nga la sngewthuh na ki kitab ïa ka jingkheiñ jong kita ki snem, kiba shaphang jong ki, ka ktien U Trai ka la wan ha u Jeremaïah u nongïathuhlypa, ba un pyndep ïa kita ki hynñiewphew snem ka jinglong jot jong ka Jerusalem.

³ Bad nga la phai la ka khmat sha U Trai U Blei, ban wad da ka jingduwai bad ki jingkyrpad, lem bad kaba shah jingit, bad ka jaiñ byrni, bad ka dpei.

⁴ Bad nga la duwai ha U Trai U Blei jong nga, bad nga la phla, bad nga la ong, “A Trai, U Blei u bakhraw bad uba itieng, uba bat ïa ka jutang bad ïa ka jingisynei bad kita kiba ieit ïa u bad kiba sumar ïa ki hukum jong u;

⁵ ngi la leh pop, bad ngi la leh mutlop, bad ngi la leh bymman, bad ngi la ïaleh pyrshah, da kaba phai noh na ki hukum jong me bad na ki jingbishar jong me:

⁶ lymne ngim shym la shahshkor ha ki shakri jong me ki nongïathuhlypa, kiba la kren ha ka kyrteng jong me ha ki syiem jong ngi, ha ki rangbah jong ngi, bad ha ki kpa jong ngi, bad ha ki briew baroh jong kata ka ri.

⁷ A Trai, ka hok ka long ka jong me, hynrei, ïa ngi ka jinglehrain ka khmat, kumba ha kane ka sngi; ïa ki briew jong u Judah, bad ïa kiba shong ha Jerusalem, bad ïa ki Israel baroh, kiba jan bad kiba jngai, ha ki ri baroh sha kiba me la beh noh ïa ki, namar ka jingpalat jong ki kaba ki la palat ïa me.

⁸ A Trai, ïa ngi ka long ka jinglehrain ka khmat, ïa ki syiem jong ngi, ïa ki rangbah jong ngi, bad ïa ki kpa jong ngi, namar ba ngi la leh pop ïa me.

⁹ Ïa U Trai U Blei jong ngi ki dei ki jingisynei bad ki jingmap; namar ngi la ïaleh pyrshah ïa u;

¹⁰ lymne ngim shym la kohnguh ïa ka ktien U Trai U Blei jong ngi, ban ïaid ha ki hukum jong u, kiba u la buh ha khmat jong ngi da ki shakri jong u ki nongïathuhlypa.

¹¹ Shisha keiñ, ki Israel baroh ki la ryngkang ïa ka hukum jong me, da kaba phai noh, ba kin ym kohnguh ïa ka ktien jong me: namar kata, ïa kata ka jingtim, bad ïa kata ka jingsmai ïa kaba la thoh ha Ka Hukum u Moses u shakri u jong U Blei, la theh noh halor jong ngi; namar ba ngi la leh pop ïa u.

¹² Bad u la pynskhem ïa la ki ktien, ïa kiba u la kren pyrshah ïa ngi, bad pyrshah ïa ki nongbishar jong ngi kiba la bishar ïa ngi, da kaba pynwan halor jong ngi ïa ka jingsniew kaba khraw: namar hapoh ka bneng baroh ym shym la leh katba la leh halor ka Jerusalem.

¹³ Kumba la thoh ha Ka Hukum u Moses, kane ka jingsniew baroh ka la wan halor jong ngi: pynban, ngim pat shym kyrpad ïa ka jingisynei U Trai U Blei jong ngi, ba ngin phai noh na la ki jingleh bymhok, bad ban ïoh ka jingshemphang ha ka jingshisha jong me.

¹⁴ Namar kata, U Trai u la ap ïa kata ka basniew, bad u la pynwan ïa ka halor jong ngi: namar U Trai U Blei jong ngi u long u bahok ha ki kam jong u baroh kiba u leh, bad ngi ngim shym la kohnguh ïa ka ktien jong u.

¹⁵ Te mynta, A Trai U Blei jong ngi, uba la wallam noh ïa la ki briew na ka ri Ijipt da ka kti badonbor, bad uba la pyndonnam ïa lade, kumba ha kane ka sngi; ngi la leh pop, ngi la leh bymman.

¹⁶ A Trai, nga kyrpad ïa me, katba kum ka jinglehhok jong me baroh, to ka jingbitar jong me bad ka jingotshla jong me kin phai noh na ka nongbah jong me ka Jerusalem, u lum u bakyntang jong me: namar na ka bynta ki pop jong ngi, bad na ka bynta ki jingleh bymhok ki kpa jong ngi, ka Jerusalem bad ki briew jong me ki la long ka jingibeiñ ha baroh kiba kylleng sawdong ïa ngi.

¹⁷ Mynta, namar kata, A U Blei jong ngi, to sngew ïa ka jingduwai u shakri jong me, bad ïa ki jingkyrpad jong u, na ka bynta U Trai, bad to pyntyngshaiñ la ka khmat halor ka jaka kyntang jong me kaba la jot.

¹⁸ A U Blei jong nga, to pyndem la ka shkor, bad to sngew; to peit la ki khmat, bad to khmih ïa ka jinglong jot jong ngi, bad ïa kata ka nongbah ïa kaba la khot da ka kyrteng jong me: namar ym na ka bynta ki hok jong ngi, ba ngi pynmih ïa la ki jingkyrpad ha khmat jong me, hynrei, na ka bynta ki jingisynei kiba khraw jong me.

¹⁹ A Trai, to sngew; A Trai, to map; A Trai, to shahshkor to leh ruh; wat pyntud; na ka bynta ïa lade, A U Blei jong nga, namar ïa ka nongbah jong me bad ïa ki briew jong me la khot da ka kyrteng jong me.”

Ka jingïathuhlypa shaphang ki hynñiewphew taïew

²⁰ Te katba nga la dang kren, bad duwai, bad phla ïa la ka pop bad ïa ka pop ki briew jong nga ki Israel, bad dang pynmih noh ïa la ka jingkyrpad ha khmat U Trai U Blei jong nga na ka bynta uta u lum bakyntang U Blei jong nga;

²¹ shisha keiñ, katba nga la dang kren ha ka jingduwai, uta u rangbah u Gabriel, ïa uba nga la ïohi ha kata ka jingithuhpaw ha kaba nyngkong, ïa uba la pynher stet, u la ktah ïa nga hamar ka por kata ka jingainguh janmiet.

²² Bad u la hikai ïa nga, bad u la kren bad nga, bad u la ong, “Ko Daniel, nga la wan noh ïa ka ban pynlong ïa me uba nang ha ka jingsngewthuh.

²³ Ha kaba sdang ki jingkyrpad jong me, ka hukum ka la leit mih noh, bad nga la wan ban ïathuh ha me; namar me long ïa uba la ieit eh: namar kata, to pyrkhat ïa kata ka ktien, bad to sngewthuh ïa kata ka jingithuhpaw.

²⁴ “Hynñiewphew taïew la pynkut halor ki briew jong me bad halor kata ka nongbah bakhuid jong me, ïa ka ban pyndep ïa ka jingpalat, bad ban pynwai noh ïa ki pop, bad ban pynlong ka jingpynïasuk na ka bynta ka jingbymhok, bad ban wallam noh ïa ka hok bymjukut, bad ïa ka ban pyndait laha ïa ka jingithuhpaw bad ïa ka jingïathuhlypa, bad ban pynsleh ïa U Bakhuid Tam Eh.

²⁵ To tip namar kata, bad to sngewthuh, ba na kata ka jingmih noh jong kata ka hukum ïa ka ban pynthymmai bad ban tei ïa ka Jerusalem ïa uta uba la sleh, uta u syiem keiñ, kan long hynñiew taïew; bad hynriewphew ar taïew, yn tei pat ïa ka, bad ki lynti shnong bad ki kharai, ha ki por bajynjar keiñ.

²⁶ Te hadien kita ki hynriewphew ar taïew, ïa uta uba la sleh yn ot noh, bad un ym ïoh ei ei ruh: bad ki briew jong uta u syiem u ban wan, kin pynjot noh ïa kata ka nongbah bad ïa kata ka jaka kyntang; bad ka bakut jong u kan long da ka jingshlei, te haduh ka bakut keiñ kan long ka thma; la thmu ïa ki jingpynjot.

²⁷ Bad shi taïew un pynlong ïa ka jutang baskhem bad kiba bun: bad hamar kaba shiteng jong kata ka taïew, un pynduh noh ïa kata ka jingkñia bad ïa kata ka jingainguh bam; bad halor ka thapniang jong ki jingijli, un wan uwei uba pynjot; te wat haduh ka bakut, bad ïa kata ruh ba la thmu, yn theh noh ïa ka jingbitar halor uta u nongpynjot.”