DANIEL 8 - KA BAIBL

Ka jingithuhpaw u Daniel ïa u langbrot bad u 'lang sohmoh

¹ Ha ka snem ka balai ka jingsynshar u Belshassar syiem, ka jingithuhpaw ka la paw ha nga, ha nga, u Daniel keiñ, hadien kata kaba la paw ha nga ha kaba mynnyngkong.

² Bad nga la ïohi ha kata ka jingithuhpaw; te ka la long kumne, ba mynba nga la ïohi, nga la don ha Shushan kata ka ïingsyiem, kaba don ha ka shnat Elam; te nga la ïohi ha kata ka jingithuhpaw, bad nga la don harud kata ka wah Ulai.

³ Ynda kumta, nga la khmied la ki khmat, bad nga la ïohi, te ha khmih, la ïeng ha shuwa kata ka wah u langbrot uba la don ar tylli ki reng; bad kita ki ar tylli ki reng ki la long kiba jrong; hynrei, kawei ka la kham jrong ïa kawei pat, bad kata kaba kham jrong ka la mih khatduh.

⁴ Nga la ïohi ïa uta u langbrot ba u da tur shaphang sepngi, bad shaphang shatei, bad shaphang shathie; bad ym shym don u mrad uba lah ban ïeng ha khmat jong u, lymne ym shym don uba lah ban pyllait na ka kti jong u; hynrei, u la leh katba kum ka mon jong u, bad u la pynkhraw ïa lade.

⁵ Bad katba nga dang pyrkhat, ha khmih, u 'lang sohmoh u la wan na sepngi halor ka khmat ka khyndew baroh, bad um shym kynduh ha ka khyndew: bad uta u 'lang sohmoh u la don ka reng kaba phylla hapdeng ki khmat jong u.

⁶ Bad u la wan ha uta u langbrot uba la don ar tylli ki reng, ïa uba nga la ïohi ba u da ïeng ha shuwa kata ka wah, bad u la kynrup ïa u ha ka jingbitar bah ka bor jong u.

⁷ Bad nga la ïohi ba u la wan hajan uta u langbrot, bad u la bitar lep ïa u, bad u la pakhuh ïa uta u langbrot, bad u la pynkheiñ baroh ar tylli ki reng jong u; bad ym shym don bor ha uta u langbrot ban ïeng ha khmat jong u: hynrei, u la pynkyllon ïa u ha khyndew, bad u la ïuh roit ïa u; bad ym shym don uba lah ban pyllait ïa uta u langbrot na ka kti jong u.

⁸ Bad uta u 'lang sohmoh u la pynkhraw ïa lade shikatdei eh: te haba u la khlaiñ, ïa kata ka reng bakhraw la pynkheiñ noh; bad ha ka jaka jong ka, ki la mih saw tylli ki reng kiba phylla sha ki saw lyer bneng.

⁹ Te na kawei na kita, la mih kawei ka reng kaba rit, kaba la man khraw shikatdei eh, shaphang shathie, bad shaphang mihngi, bad shaphang kata ka ri ba-donburom.

¹⁰ Bad ka la man khraw jin haduh u paidbah bneng; te na uta u paidbah bad na ki khlur de don kiba ka la pynhap sha ka khyndew, bad ka la ïuh roit ïa ki.

¹¹ Shisha keiñ, ka la pynkhraw ïa lade ruh, wat haduh u rangbah jong uta u paidbah; bad ka la shim noh na u, ïa kata ka jingainguh thang kaba borabor, bad ïa ka jaka ka ïing kyntang jong u la pynkyllon noh.

¹² Bad ïa uta u paidbah la aiti noh ha ka lem bad kata ka jingainguh thang kaba borabor namar ka jingpalat; bad ka la bred noh ïa ka jingshisha ha ka khyndew, bad ka la leh la ka mon bad ka la man bha.

¹³ Ynda kumta, nga la ïohsngew ïa uwei u bakhuid ba u da kren; bad uwei pat u bakhuid u la ong ha uta uba la kren, “Slem katno kan long kata ka jingithuhpaw shaphang kata ka jingainguh thang kaba borabor, bad kata ka jingpalat kaba pynjot, ban aiti noh ïa kata ka jaka kyntang bad ïa uta u paidbah ba yn ïuh roit ïa ki?”

¹⁴ Bad u la ong ha nga, “Haduh ar hajar laispah sngi; ynda kumta, ïa kata ka jaka kyntang yn pynkhuid noh.”

¹⁵ Te haba nga, nga u Daniel keiñ, nga la ïohi ïa kata ka jingithuhpaw, nga la pyrshang ban sngewthuh ïa ka; te ha khmih, la ïeng ha khmat jong nga ka jing-i kaba kum u briew.

¹⁶ Bad nga la ïohsngew ïa ka ktien briew hapdeng ka wah Ulai, kaba pyrta, bad ka ong, “Ko Gabriel, to pynsngewthuh ïa une u briew shaphang kata ka jingithuhpaw.”

¹⁷ Kumta, u la wan hajan kaba nga ïeng; bad haba u la wan, nga la sheptieng bad nga la hap da pyllup: hynrei, u la ong ha nga, “To sngewthuh, ko khun u briew; naba kata ka jingithuhpaw ka dei ïa ka por ka jong ka bakut.”

¹⁸ Te katba u dang kren bad nga, nga la lap kaba ïohthiah lyngngai da pyllup ha khyndew: hynrei, u la ktah ïa nga, bad u la pynïeng ïa nga.

¹⁹ Bad u la ong, “Ha khmih, ngan pyntip ha me ïa kata ka ban jia ha ka por ka bakhatduh jong kata ka jingbitar: namar ka dei ïa ka por ba la buh jong kata ka bakut.

²⁰ Uta u langbrot ïa uba me la ïohi uba la don ar tylli ki reng, ki long ki syiem ka Mid bad ka Persha.

²¹ Bad uta u 'lang sohmoh uba runar u long u syiem ka Gris: bad kata ka reng bakhraw kaba hapdeng ki khmat jong u, ka long u syiem u banyngkong.

²² Bad shaphang kata kaba la kheiñ noh, ha ka jaka jong ka, saw tylli ki la mih, saw tylli ki hima keiñ, kin mih noh na kata ka jaid bynriew, hynrei, ym bad ka bor jong ka.

²³ Bad ha ka bakut ka por ka hima jong ki, haba ki la biang bha ki nongleh palat, un mih uwei u syiem uba don ka khmat kaba itieng, uba sngewthuh ïa ki jingong kiba dum.

²⁴ Bad ka bor jong u kan long kaba jur, hynrei, ym da ka bor jong u hi; bad un pynjot da kaba phylla, bad un man bha bad un leh katba u mon: bad un pynjot noh ïa kita kiba don bor bad ïa ki riewkhuid de.

²⁵ Bad da ka buit jong u, un pynroi ïa ka jingshukor ha ka kti jong u; bad un pynkhraw ïa lade ha la ka dohnud, bad ha ka jingsngewshngain jong ki, shibun un pynjot; un ïeng ïaleh ruh ïa uta U Syiem ki syiem; hynrei, yn pynlwet ïa u ym da ka kti.

²⁶ Bad kata ka jingithuhpaw jong kita ki janmiet bad ki step ïa kaba la ïathuh ka long kaba shisha: hynrei, to pyndait noh ïa kata ka jingithuhpaw; namar ka dei ïa kaba lawei lathai.”

²⁷ Bad nga, u Daniel, nga la ïapler, bad nga la pang katto katne sngi; ynda kumta, nga la khie bad nga la trei ïa ka kam u syiem: bad nga la sngewphylla ïa kata ka jingithuhpaw, hynrei, ym don ba sngewthuh ïa ka.