DANIEL 7 - KA BAIBL

Ka jingithuhpaw u Daniel ïa ki saw tylli ki mrad

¹ Ha ka snem ka banyngkong ka jong u Belshassar u syiem ka Babilon, u Daniel u la phohsniew bad u la ïohi ki jingithuhpaw halor ka jingthiah jong u: ynda kumta, u la thoh ïa kata ka jingphohsniew bad u la ïathuh ïa ka jingkyllum jong kita kiei kiei ruh.

² U Daniel u la kren bad u la ong, “Nga la ïohi ha ka jingithuhpaw jong nga mynmiet, bad ha khmih, kita ki saw lyer ka bneng ki la pyrsad halor ka duriaw bah.

³ Te saw tylli ki mrad kiba heh ki la ïawan mih noh na kata ka duriaw, kiba ïapher uwei na uwei pat.

⁴ U banyngkong u la long kum u sing, bad u la don ki thapniang pukni: nga la khmih haduh ba la phut noh ïa ki thapniang jong u, bad la khyllie ïa u na ka khyndew, bad la pynïeng ïa u ha ki kjat ar tylli kum u briew, bad la ai ïa ka dohnud briew ha u.

⁵ Bad ha khmih sa uwei pat u mrad u ba-ar, kum ka dngiem, te la khyllie shiliang ïa u, bad lai tylli ki shyieng krung ki la don ha ka shyntur jong u hapdeng ki bniat jong u: bad ki la ong kumne ha u, ‘To ïeng, to bam doh shibun.’

⁶ Hadien kane, nga la khmih, bad ha khmih, sa uwei pat kum u 'labasa, uba la don saw tylli ki thapniang sim ha ka ingdong jong u; uta u mrad u la don saw tylli ki khlieh ruh; bad ïa ka jingsynshar la ai ha u.

⁷ Hadien kane de, nga la ïohi ha kita ki jingithuhpaw mynmiet, bad ha khmih sa u basaw u mrad, uba itieng bad uba don bor, bad uba khlaiñ shikatdei eh; bad u la don ki bniat nar kiba heh: u la bam duh bad u la pynlwet jin, bad u la kyrdem da ki kjat ïa kaba sah: bad u la pher na kita ki mrad baroh kiba la don mynshuwa ïa u; bad u la don shiphew tylli ki reng.

⁸ Nga la dang pyrkhat shaphang kita ki reng, bad ha khmih, la mih hapdeng jong ki sa kawei pat ka reng kaba rit, ha khmat jong ka, lai tylli na kita ki reng ki banyngkong la phut noh na ki thied: bad ha khmih, ha kane ka reng, la don ki khmat kum ki khmat briew, bad ka shyntur kaba kren ïa kiei kiei kiba khraw.

⁹ “Nga la khmih haduh, “ba la buh ïa ki khet, bad ba uwei uba na mynhyndai kulong u la shong: ka jaiñkup jong u ka la long kaba lieh kum ka ïor, bad u 'ñiuh khlieh jong u kum u 'saiwul uba lieh; ka khet jong u ka la long da ki thylliej ding, bad ki shalyntem jong ka, ka ding kaba meh.

¹⁰ Ka wah ding ka la mih bad ka la tuid noh na khmat jong u: hajar ki hajar ki la shakri ïa u, bad shiphew hajar sien shiphew hajar ki la ïeng ha khmat jong u: ka jingbishar la long, bad ki kitab la plied.

¹¹ “Nga la khmih ha kata ka por namar ka jingsawa jong kita ki ktien kiba khraw ïa kiba kata ka reng ka la kren; nga la khmih, jin haduh ba la pynïap ïa uta u mrad, bad ba la pynjot noh ïa ka met jong u, bad la aiti noh ïa u ban thang da ka ding.

¹² Bad shaphang kita kiwei pat ki mrad, ïa ka jingsynshar jong ki la shim noh: hynrei, la pynslem ïa ka jingim jong ki kat shi aïom bad shi por.

¹³ “Nga la ïohi ha ki jingithuhpaw mynmiet, “bad ha khmih, u la wan uwei da ki lyoh bneng kum u khun u briew, bad u la wan sha uta uba na mynhyndai kulong, bad ki la wallam ïa u hajan jong u.

¹⁴ Bad la ai ha u ka jingsynshar, bad ka burom, bad ka hima, ba ki kynja bynriew baroh, ki jaid bynriew bad ki ktien kin shakri ïa u: ka jingsynshar jong u ka long ka jingsynshar bymjukut, ka ban ym duh noh, bad ka hima jong u ka ban ym pynjot noh ïa ka.

¹⁵ “Nga hi u Daniel, ka mynsiem jong nga, ka la sngewsih hapdeng ka met jong nga, bad ki jingithuhpaw ka khlieh jong nga, ki la pynkhuslai ïa nga.

¹⁶ Nga la wan hajan ha uwei na kita kiba ïeng hajan, bad nga la kylli ha u ïa ka jingshisha shaphang kane baroh. Kumta, u la ïathuh ha nga, bad u la pyntip ha nga ïa ka jingbatai jong kita kiei kiei ruh.

¹⁷ ‘Kine ki mrad kiba heh, kiba saw tylli, ki long saw ngut ki syiem, ki ban mih noh na ka khyndew.

¹⁸ Hynrei, ki riewkhuid jong U Bahakhlieh Tam Eh kin ïoh ïa kata ka hima, bad kin shim ïa kata ka hima ha la ka rta, jin ha la ka rta, ha la ka rta hi.’

¹⁹ “Ynda kumta, nga la kwah ban tip ïa ka jingshisha sa ïa uta u mrad u basaw, uba la long pher na kita baroh, uba itieng shikatdei eh, uba ki bniat jong u, ki la long da u nar, bad ki tyrsim jong u, da ka rnong; bad uba la bam duh, uba la pynlwet jin, uba la kyrdem ïa kaba sah da ki kjat jong u;

²⁰ bad ïa kita ki shiphew tylli ki reng kiba la don halor ka khlieh jong u, bad kata kawei pat ka reng kaba la mih, kiba ha khmat jong ka, lai tylli ki la hap; kata ka reng hi keiñ kaba la don ki khmat, bad ka shyntur kaba la kren ïa kiei kiei kiba khraw, kaba kham i heh ban ïa ki lok jong ka.

²¹ Nga la khmih, bad kata kajuh hi ka reng ka la pynlong thma bad kita ki riewkhuid, bad ka la jop ïa ki;

²² tad ynda uta uba na mynhyndai kulong u la wan, bad u la ai ka jingbishar ha kita ki riewkhuid jong U Bahakhlieh Tam Eh; bad ka por ka la poi ba ki riewkhuid ki la shim ïa kata ka hima.

²³ “Kumne u la ong, ‘Uta u mrad u basaw, “ ‘un long ka hima ka basaw ha ka khyndew, ka ban long ka bapher na ki hima baroh, bad kan bam duh ïa ka khyndew baroh, bad kan ïuh roit noh ïa ka, bad kan pynlwet jin ïa ka.

²⁴ Bad shaphang kita ki shiphew tylli ki reng, na kane ka hima, shiphew ngut ki syiem kin mih: bad uwei pat, un mih hadien jong ki; u ban long uba pher na kita kiba mynshuwa, bad un jop ïa lai ngut ki syiem.

²⁵ Bad un kren ki ktien kiba pyrshah ïa U Bahakhlieh Tam Eh, bad un pynduh noh ïa ki riewkhuid jong U Bahakhlieh Tam Eh: bad un thmu ban pynkylla ïa ki por bad ïa ka hukum; bad yn ai noh ïa ki ha ka kti jong u haduh ka por bad ki por bad ka shiteng por.

²⁶ Hynrei, kata ka jingbishar kan long, bad kin shim noh ïa ka jingsynshar jong u, ban pynduh bad ban pynjot ïa ka haduh ka bakut.

²⁷ Te ïa kata ka hima bad ïa ka jingsynshar, bad ïa ka jingkhraw jong kita ki hima hapoh ka bneng baroh, yn aiti noh ha ki briew jong kita ki riewkhuid ki jong U Bahakhlieh Tam Eh: ka hima jong u ka long ka hima bymjukut, bad ki jingsynshar baroh kin shakri bad kin kohnguh ïa u.’

²⁸ “Kane ka long ka bakut jong kata ka kam. Nga hi u Daniel, ki jingpyrkhat jong nga ki la pynkhuslai shibun ïa nga, bad ka khmat jong nga ka la kylla bak ha nga: hynrei, nga la rieh ïa kata ka kam ha la ka dohnud.”