DANIEL 6 - KA BAIBL

U Daniel ha krem ki sing

¹ U Daraïos u la ibit ban thung halor ka hima ïa ki shispah arphew ngut ki lyngskor, ki ban long halor ka hima baroh;

² bad halor kita ruh, ïa ki lai ngut ki rangbah, na kita, u Daniel u la long uwei; ba kita ki lyngskor kin ai jingkheiñ ïa ki, ba u syiem un ym luksan.

³ Ynda kumta, une u Daniel u la kham donnam halor kita ki rangbah bad ki lyngskor, namar ba la don ka mynsiem ka babha eh ha u; bad u syiem u la pyrkhat ban buh ïa u halor ka hima baroh.

⁴ Ynda kumta, kita ki rangbah bad ki lyngskor ki la ïapyrshang ban wad daw ïa u Daniel shaphang ka kam ka hima; hynrei, kim lah shem daw lymne jingduna; namar ba u la long uba ngeit, ym shym la shem ïa ka jingbakla lane ka jingduna ha u.

⁵ Ynda kumta, kine ki briew ki la ïa-ong, “Ngin ym shem ïa kano kano ruh ka daw ïa une u Daniel, lymda ngin shem ïa kaei kaei ruh ban ïaleh ïa u shaphang ka hukum U Blei jong u.”

⁶ Ynda kumta, kine ki rangbah bad ki lyngskor ki la ïawan lang sha u syiem, bad ki la ong kumne ha u, “Ko Daraïos syiem, to im ha la ka rta.

⁷ Ki rangbah baroh jong ka hima, ki deputi bad ki lyngskor, ki myntri bad ki nongsynshar, ki la ïapyrkhat lang ban buh ïa ka hukum syiem, bad ban pynlong ïa ka adong ka baskhem, ba uno uno u ban kyrpad jingkyrpad na uno uno u blei lane u briew, hapdeng laiphew sngi, lait na me, ko syiem, yn bred noh ïa uta sha ka krem ki sing.

⁸ Mynta, ko syiem, to pynskhem ïa kane ka adong, bad to soi ïa kane ka jingthoh, ba yn ym pynkylla shuh ïa ka, katba kum ka hukum ki Mid bad ki Persha, ka bym ju kylla.”

⁹ Namar kata, u Daraïos syiem u la soi ïa kata ka jingthoh bad kata ka adong.

¹⁰ Te haba u Daniel u la tip ba la soi ïa kata ka jingthoh, u la leit sha la ïing; (te ki jingkhang ïit jong u ki la plie rynghang ha ka pulit jong u shaphang Jerusalem;) bad u la dem la ki khohsiew lai sien shi sngi, bad u la duwai, bad u la ainguh ha khmat U Blei jong u, kumba u la ju leh mynshuwa.

¹¹ Ynda kumta, kine ki briew ki la ïalum lang, bad ki la lap ïa u Daniel ba u da duwai bad kyrpad ha khmat U Blei jong u.

¹² Te ki la ïawan hajan, bad ki la kren ha khmat u syiem shaphang kata ka adong u syiem, “Me mem shym la soi ïa ka adong, ba uno uno u briew u ban kyrpad ha uno uno u blei lane u briew hapoh laiphew sngi, lait na me, ko syiem, yn bred noh ïa u sha ka krem ki sing?” U syiem u la ïathuh bad u la ong, “Kata ka long kaba shisha, katba kum ka hukum ki Mid bad ki Persha, ka bym ju kylla.”

¹³ Ynda kumta, ki la ïathuh bad ki la ong ha khmat u syiem, “Uta u Daniel, uba na ki khun ka jinglongmraw jong ki Judah, um suidñiew ïa me, ko syiem, lymne ïa kata ka adong ïa kaba me la soi, hynrei, u pynlong ïa ka jingkyrpad jong u lai sien shi sngi.”

¹⁴ Ynda kumta, u syiem, haba u la ïohsngew ïa kine ki ktien, u la sngewsih eh, bad u la thew ha la ka dohnud ban pyllait ïa u Daniel: bad u la ïaleh haduh ban da sep ka sngi ban pyllait ïa u.

¹⁵ Ynda kumta, kine ki briew ki la ïawan lang sha u syiem, bad ki la ong ha u syiem, “To tip, ko syiem, ba ka long ka hukum jong ki Mid bad ki Persha, ban ym pynkylla ïa kano kano ka adong lane ka hukum ïa kaba u syiem u la pynskhem.”

¹⁶ Ynda kumta, u syiem u la hukum, bad ki la wallam ïa u Daniel, bad ki la bred noh ïa u hapoh ka krem ki sing. Te u syiem u la kren bad u la ong ha u Daniel, “U Blei jong me ïa uba me shakri khlem da pud, un pynim ïa me.”

¹⁷ Bad la wallam ïa u maw, bad la buh halor ka khmat jong kata ka krem; bad u syiem u la shon muhor ïa u da ka muhor jong u hi, bad da ka muhor ki rangbah jong u ruh de; ba yn ym pynkylla ei ei ruh em shaphang u Daniel.

¹⁸ Ynda kumta, u syiem u la leit sha la ïing, bad u la pynleit ïa kata ka miet da kaba shah jingit: lymne ym shym la wallam jingtem ha khmat jong u: bad ka jingïohthiah ka la duh noh na u.

¹⁹ Ynda kumta, u syiem ha kaba lashai mynstep u la khie la dang step eh, bad u la leit kyrkieh sha kata ka krem ki sing.

²⁰ Bad haba u la wan hajan kata ka krem sha u Daniel, u la pyrta da ka ktien ïaïam: u syiem u la kren bad u la ong ha u Daniel, “Ko Daniel, u shakri U Blei u ba-im, U Blei ïa uba me shakri khlem da pud, u lah ne em ban pynim ïa me na kita ki sing?”

²¹ Ynda kumta, u Daniel u la ong ha u syiem, “Ko syiem, to im ha la ka rta.

²² U Blei jong nga u la phah ïa u angel jong u, bad u la khang ïa ki shyntur ki sing, te kim shym la pynmynsaw ïa nga: namar ïa ka jingkhuid la shem ha nga ha khmat jong u; bad ha khmat jong me ruh, ko syiem, ngam shym la leh ei ei ka basniew.”

²³ Ynda kumta, u syiem u la kmen shikatdei eh, bad u la hukum ba kin sei noh ïa u Daniel na kata ka krem. Kumta, la sei noh ïa u Daniel na kata ka krem, bad ym shym la shem jingmynsaw ei ei ruh em ha u, namar ba u la shaniah ha U Blei jong u.

²⁴ Bad u syiem u la hukum, bad ki la wallam ïa kita ki briew kiba la mudui ïa u Daniel, bad ki la bred noh ïa ki shapoh kata ka krem ki sing, ma ki, ki khun jong ki, bad ki tnga jong ki; bad kita ki sing ki la jop ïa ki, bad haba kim pat lap ba poi sha trai kata ka krem, ki la pynlwet jin ïa ki shyieng jong ki baroh.

²⁵ Ynda kumta, u Daraïos syiem u la thoh sha kita ki briew, ki jaid bynriew, bad ki ktien baroh, kiba shong ha ka khyndew baroh; “To ka jingsuk kan nang roi ha phi.

²⁶ Nga buh ïa ka hukum, ba ha ka jingsynshar ka hima jong nga baroh ki briew kin khynñiuh bad kin sheptieng ha khmat U Blei jong u Daniel: “Namar ma U, U long U Blei U ba-im, bad U ba-neh junom, bad ïa ka hima jong U yn ym pynjot noh, bad ka jingsynshar jong U kan neh haduh ka bakut hi:

²⁷ U pyllait bad U pynim, bad U pynlong ïa ki dak khyllah bad ïa ki jingphylla ha ka bneng bad ha ka khyndew; Uba la pynim ïa u Daniel na ka bor ki sing.”

²⁸ Kumta, une u Daniel u la man bha ha ka jingsynshar u Daraïos, bad ha ka jingsynshar u Seiros u nong Persha.