DANIEL 5 - KA BAIBL

Ka jingthoh ha ka kynroh

¹ U Belshassar syiem u la thaw ïa ka jingkhawai bakhraw ïa ki shi hajar na ki rangbah jong u, bad u la dih Waiñ ha khmat jong kita ki shi hajar.

² U Belshassar, ynda u la mad ïa ka Waiñ, u la hukum ban wallam ïa kita ki khiew ksiar khiew rupa ïa kiba u Nebukhadnessar u kpa jong u, u la lah shim na ka templ kaba ha Jerusalem; ba u syiem bad ki rangbah jong u, ki tnga jong u bad ki tnga kliar jong u, kin ïadih da ki.

³ Ynda kumta, ki la wallam ïa kita ki khiew ksiar ïa kiba la shim noh na ka templ ka ïing U Blei kaba ha Jerusalem; bad u syiem bad ki rangbah jong u, ki tnga jong u bad ki tnga kliar jong u, ki la ïadih da kita.

⁴ Ki la ïadih Waiñ, bad ki la ïaroh ïa ki blei kiba da ka ksiar, bad da ka rupa, da ka rnong, da u nar, da ka dieng, bad da u maw.

⁵ Ha kata hi ka por, ki la mihpaw ki shynriah'ti briew, bad ki la thoh marpyrshah ka dieng pynïeng sharak halor ka astor ka kynroh ka ïing u syiem: bad u syiem u la ïohi ïa kata ka bynta ka kti kaba la thoh.

⁶ Ynda kumta, ka khmat u syiem ka la kylla bak, bad ki jingpyrkhat jong u ki la pynkhuslai ïa u; bad ki mat ka syngkai jong u ki la khih, bad ki khohsiew jong u ki la ïatyngkhuh.

⁷ U syiem u la pyrta jam ban wallam hapoh ïa ki nongkren byrtong, ki Khaldi, bad ïa ki nongkren shwar, u syiem u la kren bad u la ong ïa ki riewstad jong ka Babilon, “Uno uno u ban pule ïa kane ka jingthoh, bad u ban pyni ha nga ïa ka jingbatai jong ka ruh, yn pynkup ïa u da ki jaiñ basaw bthuh, bad un ïoh u kynjri ksiar ha ka ryndang jong u, bad un ïoh long u nongsynshar u balai ha ka hima.”

⁸ Ynda kumta, ki la wan rung baroh ki riewstad ki jong u syiem: hynrei, kim lah ban pule ïa kata ka jingthoh, lymne ban pyntip ha u syiem ïa ka jingbatai.

⁹ Ynda kumta, u Belshassar syiem u la khuslai shikatdei eh, bad ka khmat jong u ka la kylla bak, bad ki rangbah jong u ki la sngewlyngngoh.

¹⁰ Te ka syiem, namar ki ktien u syiem bad ki rangbah jong u, ka la wan hapoh kata ka ïing khawai: bad ka syiem ka la kren bad ka la ong, “Ko syiem, to im ha la ka rta; wat ai ba ki jingpyrkhat jong me kin pynkhuslai ïa me, lymne wat ai ba ka khmat jong me kan kylla:

¹¹ don u briew ha ka hima jong me, ha uba don ka mynsiem jong kita ki blei bakhuid; bad ha ki sngi u kpa jong me, ïa ka jingshai bad ïa ka jingshemphang bad ïa ka jingstad, kum ka jingstad ki blei, la shem ha u: bad u Nebukhadnessar syiem, u kpa jong me, uta u syiem, u kpa jong me keiñ, u la pynlong rangbah ïa u halor ki riewstad, ki nongkren byrtong, ki Khaldi, bad ki nongkren shwar;

¹² namar ïa ka mynsiem ka babha eh, bad ïa ka jingtip, bad ïa ka jingshemphang, ïa ka jingbatai ki jingphohsniew, bad ïa kaba pynpaw ïa ki jingong kiba dum, bad ïa kaba pynshai ïa ki jingeh, la shem ha une hi u Daniel, ïa uba u syiem u la kyrteng ‘u Belteshassar’. Mynta, to ai ba yn khot ïa u Daniel, bad un pyni ïa kata ka jingbatai.”

¹³ Ynda kumta, la wallam ïa u Daniel hapoh ha khmat u syiem. U syiem u la kren bad u la ong ha u Daniel, “Me long uta u Daniel, uba na kita ki khun ka jinglongmraw jong ki Judah, ïa kiba u syiem u kpa jong nga u la wallam noh na ri Judah?

¹⁴ Nga la ïohsngew shaphang jong me, ba ka mynsiem jong kita ki blei ka don ha me, bad ba la shem ha me ka jingshai bad ka jingshemphang bad ka jingstad babha tam eh.

¹⁵ Te mynta, ïa ki riewstad, kita ki nongkren byrtong keiñ, la wallam hapoh ha khmat jong nga, ba kin pule ïa kane ka jingthoh, bad ban pyntip ha nga ïa ka jingbatai jong ka: hynrei, kim lah ban pyni ïa ka jingbatai jong ka.

¹⁶ Hynrei, nga la ïohsngew shaphang jong me, ba me lah ban ai ki jingbatai, bad ban pynshai ïa ki jingeh: mynta lada me lah ban pule ïa kata ka jingthoh, bad ban pyntip ha nga ïa ka jingbatai jong ka, yn pynkup ïa me da ki jaiñ basaw bthuh, bad men ïoh u kynjri ksiar ha ka ryndang jong me, bad men ïoh long u nongsynshar u balai ha ka hima.”

¹⁷ Ynda kumta, u Daniel u la ïathuh bad u la ong ha khmat u syiem, “Ieh ki jingai jong me kin long ki jong me hi, bad ai ïa ki nong jong me ha uwei pat; hynrei, ngan pule ha u syiem ïa kata ka jingthoh, bad ngan pyntip ha u ïa ka jingbatai.

¹⁸ A me u syiem U Blei U Bahakhlieh Tam Eh u la ai ha u Nebukhadnessar u kpa jong me ïa ka hima, bad ïa ka jingkhraw, bad ïa ka burom, bad ïa ka jingdonburom:

¹⁹ bad na ka bynta kata ka jingkhraw ba u la ai ha u, baroh ki briew, ki jaid bynriew, bad ki ktien ki la khynñiuh bad ki la sheptieng ha khmat jong u: ïa uba u mon u pynïap, bad ïa uba u mon u pynim; bad ïa uba u mon u kyntiew, bad ïa uba u mon u pynpoh.

²⁰ Hynrei, haba ka dohnud jong u ka la sngewmeng, bad ka mynsiem jong u ka la eh haduh ba u la leh sarong, la pynhiar ïa u na ka khet syiem jong u, bad ki la shim noh na u ïa ka burom jong u:

²¹ bad la beh ïa u na u khun bynriew; bad la pynlong ïa ka dohnud jong u kum ki mrad, bad ka jaka shong jong u ka la long ryngkat bad ki kadda khlaw; la pynbam phlang ïa u kum ki masi dab, bad ka met jong u ka la jhieh da ka umjer bneng: tad ynda u la tip ba U Blei U Bahakhlieh Tam Eh u synshar ha ka hima ki briew, bad ba u buh halor jong ka ïa uba u mon hi.

²² Bad me u khun jong u, ko Belshassar, mem shym la pynrit ïa la ka dohnud, la me la tip ïa kane baroh;

²³ hynrei, me la kyntiew ïa lade pyrshah ïa U Trai ka bneng; bad ki la wallam ïa ki khiew ka ïing jong U ha khmat jong me, bad me bad ki rangbah jong me, ki tnga jong me bad ki tnga kliar jong me, phi la ïadih Waiñ da kita; bad me la ïaroh ïa ki blei kiba da ka rupa, bad da ka ksiar, da ka rnong, da u nar, da ka dieng, bad da u maw, ki bymïohi, lymne ïohsngew, lymne tip: bad ïa U Blei uba ha ka kti jong u ka jingring mynsiem jong me ka don, bad uba ki lynti jong me baroh ki long ki jong u, mem shym la pyndonburom.

²⁴ “Namar kata, la phah noh ïa kata ka bynta ka kti na khmat jong u, bad la thoh ïa kane ka jingthoh.

²⁵ “Te kane ka long kata ka jingthoh ba la thoh, Mene, Mene, Tekel, Upharsin.

²⁶ Kane ka long ka jingbatai jong ka: Mene, U Blei u la kheiñ ïa ka hima jong me, bad u la pynwai ïa ka.

²⁷ Tekel, la thew ïa me ha ki tarajur, bad la shem ba me duna.

²⁸ Peres, la pynbynta ïa ka hima jong me, bad la aiti ïa ka ha ki Mid bad ha ki Persha.”

²⁹ Te u Belshassar u la hukum, bad ki la pynkup ïa u Daniel da ki jaiñ basaw bthuh, bad ki la pyndeng u kynjri ksiar ha ka ryndang jong u, bad ki la pynbna shaphang jong u, ba un long u nongsynshar u balai ha kata ka hima.

³⁰ Ha kata hi ka miet, la pynïap ïa u Belshassar u syiem ki Khaldi.

³¹ Bad u Daraïos u nong Mid u la ïoh ïa kata ka hima, haba u la long kumba hynriewphew ar snem ka rta.