DANIEL 4 - KA BAIBL

Ki jingpyrkhat bad ki jingithuhpaw ki pynkhuslai ïa u Nebukhadnessar

¹ U Nebukhadnessar syiem, sha ki kynja bynriew baroh, ki jaid bynriew, bad ki ktien, kiba shong ha ka pyrthei baroh: “To ka jingsuk kan nang roi ha phi.

² Nga la ibit ban pyni ïa ki dak khyllah bad ïa ki jingphylla ïa kiba U Blei U Bahakhlieh Tam Eh u la leh ïa nga.

³ “Kiba khraw katno ki long ki dak khyllah jong u! bad kiba don bor katno ki long ki jingphylla jong u! ka hima jong u ka long ka hima bymjukut, bad ka jingsynshar jong u kaba ha la ka rta.

⁴ “Nga, u Nebukhadnessar, nga la shongsuk ha la ïing, bad nga man bha ha la ka ïingsyiem.

⁵ Nga la ïohi ïa ka jingphohsniew kaba la pynsheptieng ïa nga; bad ki jingpyrkhat halor ka jingthiah jong nga bad ki jingithuhpaw ka khlieh jong nga ki la pynkhuslai ïa nga.

⁶ Namar kata, nga la hukum ban wallam hapoh ha khmat jong nga ïa ki riewstad baroh jong ka Babilon, ba kin pyntip ha nga ïa ka jingbatai jong kata ka jingphohsniew.

⁷ Ynda kumta, la wan hapoh ki riewstad, ki nongleh byrtong, ki Khaldi, bad ki nongkren shwar: bad nga la ïathuh ïa ka jingphohsniew ha khmat jong ki; hynrei, kim shym pyntip ha nga ïa ka jingbatai jong ka.

⁸ Hynrei, ha ka bakhatduh u la wan ha khmat jong nga u Daniel, uba kyrteng ‘u Belteshassar’, kum ka kyrteng u blei jong nga, bad uba ka mynsiem kita ki blei bakhuid ka don ha u: bad nga la ïathuh ïa kata ka jingphohsniew ha khmat jong u, nga da ong,

⁹ ‘Ko Belteshassar, u rangbah ki riewstad, namar ba nga tip ba ka mynsiem jong kita ki blei bakhuid ka don ha me, bad ba ym don ka jingbuhrieh kaba eh ïa me, to ong ha nga ïa ki jingithuhpaw ka jingphohsniew jong nga ïa kiba nga la ïohi, bad ïa ka jingbatai jong ki ruh.

¹⁰ Ki jingithuhpaw ka khlieh jong nga halor ka jingthiah jong nga ki la long kumne: Nga la ïohi, bad ha khmih, u dieng hapdeng ka khyndew, bad ka jingjrong jong u ka la long kaba khraw.

¹¹ Uta u dieng u la nang san, bad u la nang ïaw, bad ka jingjrong jong u ruh ka la kot haduh ka bneng, bad ka jingpaw jong u haduh ka bakut ka khyndew baroh.

¹² Ki sla jong u ki la long kiba itynnad, bad ki soh jong u ki la bun, bad ha u la don ka jingbam ïa baroh: ki mrad khlaw ki la rieh tngen hapoh jong u, bad ki sim bneng ki la shong ha ki tnat jong u, bad ka doh baroh ka la ïoh bam na u.’ ”

¹³ “Nga la ïohi ha ki jingithuhpaw ka khlieh jong nga halor ka jingthiah jong nga, bad, ha khmih, u nongap phira bad u bakhuid ruh u la wan hiar na bneng.

¹⁴ U la pyrta jam, bad u la ong kumne, ‘To khet noh ïa uta u dieng, bad to ngor noh ïa ki tnat jong u, to kynther noh ïa ki sla jong u, bad pynsaphred ïa ki soh jong u: ai ba ki mrad khlaw kin mih noh napoh jong u, bad ki sim na ki tnat jong u.

¹⁵ Hynrei, to iehnoh ïa ka dyngkhong ki thied jong u ha ka khyndew, da ka jingspaiñ nar bad rnong, ha u 'lang lung ka khyndew. To ai ba yn synreit ïa u da ka umjer bneng, bad ai ba ka bynta jong u kan long ryngkat bad ki mrad ha u phlang jong ka khyndew:

¹⁶ to ai ba yn pynkylla ïa ka dohnud jong u na ka jong u briew, bad ba un ïoh ïa ka dohnud mrad; bad ai ba hynñiew ki aïom kin lut ha u.

¹⁷ Kane ka jingrai ka long da ka hukum jong kita ki nongap phira, bad ka jingleh da ka ktien jong kita ki bakhuid: khnang ba kita ki ba-im kin tip ba U Bahakhlieh Tam Eh u synshar ha ka hima jong ki briew, bad ba u ai ïa ka ha uno uno uba u mon hi, bad ba u buh halor jong ka, ïa uba poh tam na ki briew.’

¹⁸ Ïa kane ka jingphohsniew, nga, u Nebukhadnessar syiem, nga la ïohi: bad ma me te, ko Belteshassar, to ïathuh ïa ka jingbatai jong ka, namar ba ki riewstad baroh ka hima jong nga kim lah ban pyntip ha nga ïa kata ka jingbatai; hynrei, me, me lah, naba ka mynsiem jong kita ki blei bakhuid ka don ha me.”

¹⁹ Ynda kumta, u Daniel, uba kyrteng “u Belteshassar”, u la lyngngoh shi por, bad ki jingpyrkhat jong u ki la pynkhuslai ïa u. U syiem u la kren bad u la ong, “Ko Belteshassar, wat ai ba kata ka jingphohsniew, lane ka jingbatai, kan pynkhuslai ïa me.” U Belteshassar u la ïathuh bad u la ong, “Ko kynrad jong nga, kata ka jingphohsniew to kan long ïa ki nongshun jong me, bad ka jingbatai jong ka, ïa ki nongïaleh ïa me.

²⁰ Uta u dieng uba me la ïohi, uba la nang san, bad uba la nang ïaw, uba ka jingjrong jong u ka la kot haduh ka bneng, bad ka jingpaw jong u haduh ka pyrthei baroh;

²¹ uba ki sla jong u ki la long kiba itynnad, bad ki soh jong u kiba bun, bad ha uba don ka jingbam ïa baroh; hapoh jong u, ba ki mrad khlaw ki la rieh tngen, bad ha ki tnat jong u ki sim bneng ki la shong:

²² uta, u long ma me, ko syiem, uba la nang khraw bad uba la nang khlaiñ: namar ka jingkhraw jong me ka la nang san, bad ka la kot haduh bneng, bad ka jingsynshar jong me haduh ka bakut ka khyndew.

²³ Bad ha kata ba u syiem u la ïohi ïa u nongap phira bad u bakhuid ba u da wan hiar na bneng, bad ba u da ong, ‘To khet noh ïa uta u dieng, bad to pynduh ïa u; hynrei, to iehnoh ïa ka dyngkhong ki thied jong u ha ka khyndew, da ka jingspaiñ nar bad rnong, ha u 'lang lung ka khyndew; to ai ba yn synreit ïa u da ka umjer bneng, bad ai ba ka bynta jong u kan long ryngkat bad ki mrad khlaw, haduh ba hynñiew ki aïom kin lut ha u;’

²⁴ kane ka long ka jingbatai, ko syiem, bad kane ka long ka hukum jong U Bahakhlieh Tam Eh, ka ban sa jia ha u kynrad jong nga u syiem:

²⁵ ba yn beh noh ïa me na ki briew bad ka jaka shong jong me kan long ryngkat bad ki mrad khlaw, bad yn pynbam phlang ïa me kum ki masi dab, bad yn synreit ïa me da ka umjer bneng, bad hynñiew ki aïom kin lut ha me; tad ynda me la tip ba U Bahakhlieh Tam Eh u synshar ha ka hima jong ki briew, bad ba u ai ïa ka ha uba u mon hi.

²⁶ Bad ha kata ba ki la hukum ban iehnoh ïa ka dyngkhong ki thied, ka hima jong me kan skhem ha me, ynda me la tip ba ki bneng ki synshar.

²⁷ Namar kata, ko syiem, to pdiang ïa ka jingkyntu jong nga, bad to pynduh noh ïa ki pop jong me da ka jinglehhok, bad ïa ki jingbymhok jong me da kaba leh isynei ïa ki baduk; lehse don ka jingpynslem ïa ka jingsuk jong me.”

²⁸ Kane baroh, ka la jia ha u Nebukhadnessar syiem.

²⁹ Ha ka bakut khat-ar bnai u la dang ïaid kai ha kata ka ïingsyiem jong ka Babilon.

³⁰ U syiem u la ïathuh bad u la ong, “Hato kane kam long ka Babilon bakhraw, ïa kaba nga la tei ma nga ban long ka jaka shong syiem, da ka jingkhraw ka bor jong nga bad na ka bynta ka nam ka burom jong nga?”

³¹ Hamar ba u syiem u dang kren ïa kata ka ktien, ka jingsawa ka la hiar na bneng ka da ong, “Ko Nebukhadnessar syiem, la ong ha me: ka hima ka la leit noh na me.

³² Bad yn beh noh ïa me na ki briew, bad ka jaka shong jong me kan long ryngkat bad ki mrad khlaw; bad yn pynbam phlang ïa me kum ki masi dab, bad hynñiew ki aïom kin lut ha me; tad ynda me la tip ba U Bahakhlieh Tam Eh u synshar ha ka hima jong ki briew, bad ba u ai ïa ka ha uba u mon hi.”

³³ Ha kata hi ka por, la pyndep ïa kata ha u Nebukhadnessar; bad la beh noh ïa u na ki briew bad u la bam phlang kum ki masi dab bad ka met jong u ka la jhieh da ka umjer bneng, tad ynda u shñiuh jong u, u la san kum ki 'ner pukni, bad ki tyrsim jong u kum ki tyrsim sim.

³⁴ “Te ha ka bakut kita ki sngi, nga, u Nebukhadnessar, nga la khmied la ki khmat sha bneng, bad ka jingshemphang jong nga ka la wan phai pat sha nga, bad nga la kyrkhu ïa U Bahakhlieh Tam Eh, bad nga la ïaroh bad nga la pyndonburom ïa uta u ba-im junom; “namar ka jingsynshar jong u ka long ka jingsynshar bymjukut, bad ka hima jong u pateng la pateng bynriew:

³⁵ bad ïa ki briew baroh jong ka khyndew ym shym kheiñ ei ei: bad u leh katba u mon ha u paidbah jong ka bneng, bad hapdeng ki briew jong ka khyndew: bad ym don ba lah ban pynsangeh ïa ka kti jong u, lane ong ha u, ‘Me leh aïu?’

³⁶ “Ha kata hi ka por, ka jingshemphang jong nga ka la wan phai sha nga; bad na ka bynta ka burom ka hima jong nga, ka burom syiem bad ka jingitynnad jong nga ki la wan phai pat sha nga; bad ki riewsaid jong nga bad ki rangbah jong nga ki la ïawad ïa nga; bad la pynskhem ïa nga ha ka hima jong nga, bad ka jingkhraw bor la pynlang ha nga.

³⁷ Mynta, nga, u Nebukhadnessar, nga ïaroh bad kyntiew nam bad pyndonburom ïa uta u syiem jong ka bneng; namar ki kam jong u baroh, ki long ka jingshisha, bad ki lynti jong u, ka jingbishar: bad ïa kiba ïaid ha ka jingsarong, u lah ban pynpoh.”