DANIEL 2 - KA BAIBL

U Daniel u batai ïa ka jingphohsniew u Nebukhadnessar

¹ Te ha ka snem ka ba-ar ka jingsynshar u Nebukhadnessar, u Nebukhadnessar u la phohsniew ki jingphohsniew; bad la pynkhuslai ïa ka mynsiem jong u, bad ka jingïohthiah jong u ka la duh noh na u.

² Ynda kumta, u syiem u la hukum ban khot ïa ki riewstad, bad ki nongleh byrtong, bad ki nongkheiñ ksuid, bad ki Khaldi, ban ïathuh ha u syiem ïa ki jingphohsniew jong u. Kumta, ki la wan hapoh bad ki la ïeng ha khmat u syiem.

³ Bad u syiem u la ong ha ki, “Nga la phohsniew ka jingphohsniew, bad la pynkhuslai ïa ka mynsiem jong nga ban tip ïa kata ka jingphohsniew.”

⁴ Ynda kumta, ki Khaldi ki la kren ha u syiem ha ka ktien Syria, “Ko syiem, to im ha la ka rta: to ïathuh ha la ki shakri ïa kata ka jingphohsniew, te ngin pyni ïa ka jingbatai.”

⁵ U syiem u la ïathuh bad u la ong ha ki Khaldi, “Ka la jah noh na nga: lada phim pyntip ha nga ïa kata ka jingphohsniew bad ïa ka jingbatai jong ka, yn ot lyngkhot lyngkhai ïa phi, bad yn pynlong synrum ïa ki ïing jong phi.

⁶ Hynrei, lada phin pyni ïa kata ka jingphohsniew bad ïa ka jingbatai jong ka, phin ïoh na nga ïa ki jingai, bad ki buskit bad ka burom bakhraw: namar kata, pyni ha nga ïa kata ka jingphohsniew bad ïa ka jingbatai jong ka.”

⁷ Ki la ïathuh ka ba-ar sien bad ki la ong, “To u syiem un ïathuh ha la ki shakri ïa ka jingphohsniew, ngi te ngin pyni ïa ka jingbatai.”

⁸ U syiem u la ïathuh bad u la ong, “Nga tip biang ba phi shu pynlut ïa ka por, naba phi ïohi ba kata ka la jah noh na nga.

⁹ Hynrei, lada phim pyntip ha nga ïa kata ka jingphohsniew, don tang kawei ka hukum ïa phi: namar phi la khreh ïa ki ktien kiba lamler bad kiba shukor ban kren ha khmat jong nga, tad ynda la pynkylla ïa ka por: namar kata, to ong ha nga ïa kata ka jingphohsniew, bad ngan tip ba phi nang ban pyni ha nga ïa ka jingbatai jong ka.”

¹⁰ Ki Khaldi ki la ïathuh ha khmat u syiem, bad ki la ong, “Ym don u briew ha ka khyndew uba lah ban pyni ïa kane ka kam u syiem; namar ym don u syiem lymne u kynrad, lymne u nongsynshar, uba la pan ïa kiba kum kine na uno uno u riewstad, lane u nongleh byrtong, lane u Khaldi.

¹¹ Bad ka long ka bym ju don kaba u syiem u pan, bad ym don uno uno uba lah ban pyni ïa ka ha khmat u syiem, hynrei, tang kita ki blei, kiba ka jaka shong jong ki kam long lem bad ka doh.”

¹² Namar kane ka daw, u syiem u la sngewsih bad u la bitar lep, bad u la hukum ban pynduh ïa ki riewstad baroh jong ka ri Babilon.

¹³ Kumta, kata ka hukum ka la mih noh, ban pynïap ïa kita ki riewstad; te ki la wad ïa u Daniel bad ïa ki lok jong u ruh ban pynïap ïa ki.

¹⁴ Ynda kumta, u Daniel u la ong da ka jingpyrkhat bad ka jingstad ha u Ariok u rangbah ki nongap syiem, uba la mih noh ban pynïap ïa ki riewstad jong ka ri Babilon;

¹⁵ u la ïathuh bad u la ong ha u Ariok u kaptan u syiem, “Balei ka hukum ka la long kaba kyrkieh katta katta na u syiem?” Ynda kumta, u Ariok u la pyntip ïa u Daniel shaphang kata.

¹⁶ Te u Daniel u la leit hapoh, bad u la kyrpad ïa u syiem ba un buh Ïa ïa u, u te un pyni ïa u syiem ïa ka jingbatai.

¹⁷ Ynda kumta, u Daniel u la leit sha la ïing, bad u la pyntip ïa kata ha u Hananiah, u Mishael, bad u Asariah, ki lok jong u:

¹⁸ ba kin kyrpad ïa ki jingisynei na U Blei ka bneng shaphang kane ka jingbuhrieh; ba u Daniel bad ki lok jong u kin ym ïap lem bad kita kiwei pat ki riewstad jong ka ri Babilon.

¹⁹ Ynda kumta, la pynpaw ïa kata ka jingbuhrieh ha u Daniel ha ka jingithuhpaw mynmiet. Ynda kumta, u Daniel u la kyrkhu ïa U Blei ka bneng.

²⁰ U Daniel u la ïathuh bad u la ong, “Long ba la kyrkhu ïa ka kyrteng jong U Blei ha la ka rta: namar ka jingstad bad ka bor ki long ki jong u:

²¹ bad u pynkylla ma u ïa ki por bad ïa ki aïom: u pynduh ïa ki syiem, bad u thung ïa ki syiem: u ai ka jingstad ïa ki bastad, bad ka jingtip ïa kiba don jingshemphang.

²² U pynpaw ïa kiei kiei kiba jylliew bad kiba rieh: u tip aïu don ha ka jingdum, bad ka jingshai ka shong sah lem bad u.

²³ Nga nguh ïa me, bad nga ïaroh ïa me, A me U Blei ki kpa jong nga, uba la ai ha nga ka jingstad bad ka bor, bad uba la pyntip ha nga mynta ïa kaba ngi la pan na me: namar me la pyntip ha ngi ïa kane ka kam u syiem.”

²⁴ Namar kata, u Daniel u la leit shapoh sha u Ariok, ïa uba u syiem u la thung ban pynduh ïa ki riewstad jong ka ri Babilon: u la leit bad u la ong kumne ha u; “Wat pynduh ïa ki riewstad ka ri Babilon: to ïalam ïa nga ha khmat u syiem, bad ngan pyni ha u syiem ïa kata ka jingbatai.”

²⁵ Ynda kumta, u Ariok u la wallam ïa u Daniel da kaba kyrkieh ha khmat u syiem, bad u la ong ha u kumne, “Nga la shem ïa u briew na ki khun ka jinglongmraw jong ki Judah, u ban pyntip ha u syiem ïa kata ka jingbatai.”

²⁶ U syiem u la ïathuh bad u la ong ha u Daniel, uba ka kyrteng u Belteshassar, “Me lah ban pyntip ha nga ïa kata ka jingphohsniew ïa kaba nga la ïohi, bad ïa ka jingbatai de?”

²⁷ U Daniel u la ïathuh ha khmat u syiem, bad u la ong, “Ym don ki riewstad, ki nongleh byrtong, ki nongleh myntor, lymne ki nongkren shwar, kiba lah ban pyni ha u syiem ïa kata ka jingbuhrieh ïa kaba u syiem u la kwah;

²⁸ hynrei, don U Blei ha bneng uba pynpaw ïa ki jingbuhrieh, bad u la pyntip ïa u Nebukhadnessar syiem ïa kaei ka ban jia long ha ki sngi ki bakhatduh. Ka jingphohsniew jong me, bad ki jingithuhpaw ka khlieh jong me ha la ka jingthiah, ki long kine:

²⁹ shaphang jong me, ko syiem, ki jingpyrkhat jong me ki la mih ha ka jingmut jong me ha ka jingthiah jong me, kaei ka ban sa jia hadien kane: bad uta uba pynpaw ïa ki jingbuhrieh u la pyntip ïa me kaei ka ban sa jia.

³⁰ Hynrei, shaphang jong nga, ym shym la pynpaw ïa kane ka jingbuhrieh ïa nga namar ba nga don ka jingstad kham tam ïa uno uno baroh u ba-im, hynrei, khnang ban pyntip ïa kata ka jingbatai ïa u syiem, bad ba me men tip ïa ki jingpyrkhat ka dohnud jong me.

³¹ “Me, ko syiem, me la ïohi, bad ha khmih ka durblei kaba khraw. Kane ka durblei, kaba la long kaba heh, bad kaba ka jingtyngshaiñ jong ka, kaba itynnad tam, ka la ïeng ha khmat jong me; bad ka dur jong ka, ka la long kaba shyrkhei.

³² Shaphang kane ka durblei, ka khlieh jong ka, ka la long da ka ksiar banylla, ka shadem bad ki ksang'ti jong ka, da ka rupa, ka kpoh bad ki lbong jong ka, da ka rnong,

³³ ki kjat jong ka, da ka nar, ki sla'jat jong ka, shi bynta da ka nar, bad shi bynta da ka 'dewbyrtha.

³⁴ Me la ïohi tad ynda la khlaw ym da ka kti ïa uwei u maw, uba la shoh ïa kata ka durblei na ki sla'jat jong ka, kiba la long da ka nar bad ka 'dewbyrtha, bad u la pynlwet ïa ki.

³⁵ Ynda kumta, la pynlwet lang ïa ka nar, ïa ka 'dewbyrtha, ïa ka rnong, ïa ka rupa, bad ïa ka ksiar, bad ki la long kum u stait ha ki kyntem kba ha ka por lyiur; bad ka lyer ka la kit noh ïa ki, katba ym shym la shem jaka shuh ïa ki: te uta u maw uba la shoh ïa kata ka durblei u la kylla long u lum uba khraw, bad u la dap ïa ka khyndew baroh.

³⁶ “Kane ka long kata ka jingphohsniew; bad ngin ïathuh ïa ka jingbatai jong ka ha khmat u syiem.

³⁷ Me, ko syiem, me long u syiem ki syiem, ha uba U Blei ka bneng u la ai ka hima, ka bor, bad ka jingkhlaiñ, bad ka burom;

³⁸ bad kat ha kaba ki shong ki khun bynriew, u la ai ha ka kti jong me ïa ki mrad khlaw bad ïa ki sim bneng, bad u la buh ïa me ban synshar halor jong ki baroh: me long kata ka khlieh ksiar.

³⁹ Te hadien jong me, kan mih sa kawei pat ka hima kaba kham poh ïa me; bad sa kawei pat, ka balai ka hima da ka rnong, ka ban synshar halor ka khyndew baroh.

⁴⁰ Bad ka basaw ka hima kan long ka bakhlaiñ kat ka nar: naba kumba ka nar ka pynlwet bad ka jop ïa kiei kiei baroh: bad kumba ka nar kaba tylliat ïa kiei kiei baroh, ka ruh kan pynlwet bad kan tylliat.

⁴¹ Bad kumba me la ïohi ïa ki sla'jat bad ki shynriah'jat, shi bynta da ka 'dewbyrtha u nongthaw khiew bad shi bynta da ka nar, ka ruh kan long ka hima kaba la pait; hynrei, kan don ha ka, ka bor nar, kumba me la ïohi ïa kata ka nar ba la ïakhleh bad ka 'dewbyrtha baktieh.

⁴² Bad kumba ki shynriah'jat ki la long shi bynta da ka nar, bad shi bynta da ka 'dewbyrtha, kumta, ka hima kan long shi bynta kaba khlaiñ, bad shi bynta kaba shroiñ.

⁴³ Bad kumba me la ïohi ïa ka nar ba la ïakhleh bad ka 'dewbyrtha baktieh, kin pynkhleh ïa lade bad u symbai ki briew; hynrei, kin ym ïadait lang kumba ka nar ruh kam ïadait bad ka 'dewbyrtha.

⁴⁴ Te ha ki sngi jong kita ki syiem, U Blei ka bneng un pynïeng ïa ka hima, ïa kaba yn ym pynduh lano lano ruh, lymne yn ym iehnoh ïa ka jingsynshar jong ka ha kawei pat ka jaid bynriew; hynrei, kan pynlwet bad kan bam duh ïa kine ki hima baroh bad kan ïaisah bymjukut.

⁴⁵ Kat kumba me la ïohi ba la khlaw ïa uta u maw na u lum ym da ki kti, bad ba u la pynlwet ïa ka nar, ïa ka rnong, ïa ka 'dewbyrtha, ïa ka rupa, bad ïa ka ksiar; U Blei u bakhraw u la pyntip ïa u syiem kaei ka ban sa jia hadien kane: te ka jingphohsniew ka long kaba shisha, bad ka jingbatai jong ka, kaba skhem.”

⁴⁶ Ynda kumta, u Nebukhadnessar u la dem ngon la ka khmat, bad u la mane ïa u Daniel, bad u la hukum ba kin ai ka jingkñia ainguh bad ki jingiwbih ïa u.

⁴⁷ U syiem u la ïathuh ha u Daniel, bad u la ong, “Da kaba shisha, U Blei jong phi u long U Blei ki blei, bad U Trai ki syiem, bad u nongpynpaw ïa ki jingbuhrieh, naba me la lah ban pynpaw ïa kane ka jingbuhrieh.”

⁴⁸ Ynda kumta, u syiem u la kyntiew nam ïa u Daniel, bad u la ai bun ki jingai ki bakhraw ïa u, bad u la thung ïa u ban synshar halor kata ka shnat baroh jong ka Babilon, bad ban long u nongsynshar rangbah halor ki riewstad baroh jong ka ri Babilon.

⁴⁹ Te u Daniel u la kyrpad ïa u syiem, bad u la buh ïa u Shadrak, ïa u Meshak, bad ïa u Abednego, halor ki kam ka shnat jong ka Babilon; hynrei, u Daniel u la shong ha ka khyrdop u syiem.