DANIEL 12 - KA BAIBL

Kaba kut jong kita ki sngi

¹ “Te ha kata ka por, un ïeng u Meikhal, uta u rangbah bakhraw uba ïeng na ka bynta ki khun ki briew jong me: bad kan long ka por kaba jynjar, kat kata ym shym la don naduh ba la long ka jaid bynriew haduh kata ka por: bad ha kata ka por, yn pynim ïa ki briew jong me, ïa kat u ban shem ba la thoh ha kata ka kitab.

² Bad bun na kita kiba ïohthiah ha ka 'dewmet ka khyndew kin kyndit, kiwei sha ka jingim bymjukut, bad kiwei pat sha ka jinglehrain bad ka jingjahburom bymjukut.

³ Bad kita ki bastad, kin tyngshaiñ kum ka jingshai ka sahit bneng; bad kita kiba pynkylla bun sha ka hok kum ki khlur junom la junom.

⁴ Hynrei me, ko Daniel, to tap ïa ki ktien, bad to pyndait laha ïa ka kitab, haduh ka por jong ka bakut keiñ: bun kin long ki ban phet shane shatai, bad ka jingtip kan roi.”

⁵ Ynda kumta, nga, u Daniel, nga la khmih, bad ha khmih, la ïeng ar ngut kiwei pat, uwei harud ka wah ha kane ka liang, bad uwei pat harud ka wah ha katai ka liang.

⁶ Te uwei u la ong ha uta u briew uba la kup jaiñ linen, uba la don halor ki um jong kata ka wah, “Sa katno kan long haduh ka bakut jong kine ki jingphylla?”

⁷ Bad nga la ïohsngew ïa uta u briew uba la kup jaiñ linen, uba la don halor ki um jong kata ka wah, mynba u la rah ïa ka kti kamon jong u bad ïa ka kti kadiang jong u sha bneng, bad ba u la smai ha uta u ba-im ha la ka rta ba kan long shi por, ki por, bad ka shiteng; bad ynda ki la lah pynduh ïa ka bor jong kita ki briew ki bakhuid, ïa kine baroh yn sa pyndep.

⁸ Bad nga la ïohsngew, hynrei, ngam shym sngewthuh: ynda kumta, nga la ong, “Ko kynrad jong nga, kaei kan long ka bakut jong kine kiei kiei ruh?”

⁹ Bad u la ong, “Koit, khie noh, Daniel: namar ïa ki ktien la tap bad la pyndait laha haduh ka por jong ka bakut.

¹⁰ Bun kin pynkhuid ïa lade, bad pynlong lieh ïa lade, bad yn phrang ïa ki; hynrei, ki bymman kin ïai-leh bymman; bad yn ym don na ki bymman u ban sngewthuh: hynrei, kita ki bastad kin sngewthuh.

¹¹ Bad naduh ka por ba yn shim noh ïa kata ka jingainguh thang kaba borabor, bad ba yn pynïeng ïa kata ka jingijli kaba pynjot, kan long shi hajar arspah khyndaiphew sngi.

¹² Suk uta uba ïai-ap, bad uba kot haduh shi hajar laispah laiphew san sngi.

¹³ Hynrei, to ïai-leit ma me haduh ka bakut: namar men ïoh shongthait, bad men ïoh ïeng ha la ka bynta, ha ka bakut jong kita ki sngi.”