DANIEL 11 - KA BAIBL

¹ “Te nga, ha ka snem ka banyngkong jong u Daraïos u nong Mid, nga la ïeng ban pynskhem bad ban pynkhlaiñ ïa u.

Ki syiem kiba na shatei bad kiba na shathie

² “Te mynta, ngan pyni ha me ïa ka jingshisha. Ha khmih, sa lai ngut shuh ki syiem kin mih ha Persha; bad u basaw un long uba kham riewspah shibun ïa kita baroh: bad haba u la man khlaiñ da ki spah jong u, un pynkhih ïa baroh pyrshah ïa ka hima Gris.

³ Te uwei u syiem uba don bor un mih, u ban synshar da ka jingsynshar bakhraw, bad u ban leh katba u mon.

⁴ Bad ynda u la mih, yn pynkheiñ ïa ka hima jong u, bad yn sam ïa ka sha ki saw lyer bneng; hynrei, ym sha ki khun ki ksiew jong u, lymne katba kum ka jingsynshar jong u da kaba u la synshar; namar yn rat noh ïa ka hima jong u, hynrei, sha kiwei pat nalor kita.

⁵ “Bad uta u syiem na shathie un long uba don bor, hynrei, uwei na ki rangbah jong u un kham don bor ïa u, bad un ïoh ka jingsynshar; ka jingsynshar jong u kan long ka jingsynshar kaba khraw.

⁶ Te ha ka bakut ki snem kin ïasoh lang; bad ka khun kynthei jong uta u syiem na shathie kan wan sha uta u syiem na shatei ban pynlong ka jingïakut: hynrei, kan ym bat ïa ka bor ka ksang'ti jong ka; u ruh, un ym ïeng, lymne ka ksang'ti jong u; hynrei, yn aiti noh ïa ka, bad ïa kita kiba la wallam ïa ka, bad ïa uta uba la pynkha ïa ka, bad ïa uta uba la ai bor ïa ka ha kita ki por.

⁷ “Hynrei, na u shylluit uba na ki thied jong ka, un ïeng uwei ha ka jaka jong u, u ban wan sha u paidïapom, bad un rung shapoh ka kut jong uta u syiem na shatei, bad un ïaleh ïa ki, bad un jop:

⁸ bad ïa ki bleithaw jong ki, bad ïa ki durblei ba la shu saiñ jong ki, bad ïa ki khiew babha jong ki, kiba da ka rupa bad ka ksiar, un ring mraw sha Ijipt; bad un kynran khyndiat snem na uta u syiem na shatei.

⁹ Te un wan shapoh ka hima jong uta u syiem na shathie, hynrei, un phai pat sha la ka ri hi.

¹⁰ “Hynrei, ki khun shynrang jong u kin ïahiar thma, bad kin ïalum ïa u paidïapom bakhraw, u ban wan, bad u ban tap lup, bad u ban ïaid lyngba: bad kin phai pat sha ka kut jong u keiñ, bad kin ïaleh thma.

¹¹ Te uta u syiem na shathie un khih bitar, bad un mih noh bad un ïaleh thma bad u, bad uta u syiem na shatei keiñ: te un ïalum ïa u paidbah bakhraw, bad ïa uta u paidbah yn ai noh ha ka kti jong u.

¹² Te yn pynsarong ïa uta u paidbah, bad ka dohnud jong u kan sngewmeng: bad un pynkyllon bun phew hajar, hynrei, un ym jop.

¹³ Te uta u syiem na shatei un wan phai pat, bad un ïalum ïa u paidbah uba kham khraw ban ïa uta u banyngkong; bad ha ka bakut ki aïom, ki snem keiñ, un wan lem bad u paidbah bakhraw bad ka spah kaba bun.

¹⁴ “Bad ha kita ki por bun kin ïaïeng ïaleh ïa uta u syiem na shathie; bad ki khun jong kita kiba leh jubor hapdeng ki briew jong me kin pynïeng ïa lade ban pyndep ïa kata ka jingithuhpaw; hynrei, kin kyllon noh.

¹⁵ Kumta uta u syiem na shatei un wan, bad un pynïeng ka kynton, bad un jop ïa ka nongbah ba la ker kut: bad ki ksang'ti jong ka shathie kin ym lah ïashan, lymne ki briew ba la kynsai jong u, lymne yn ym don kano kano ka bor ban ïashan.

¹⁶ Hynrei, uta uba wan ïaleh ïa u, un leh katba u mon hi, bad ym don u ban ïeng ha khmat jong u: bad un ïeng ha kata ka ri ba-donburom, bad ha ka kti jong u kan don ka jingpynjot.

¹⁷ Bad un thew la ka khmat ban wan da ka bor ka hima jong u baroh, bad ki bahok lem bad u; bad un leh katba u mon: bad un ai ha u ka khun jong ki kynthei, ban pynsniew ïa ka; hynrei, kan ym neh, lymne kan ym long ka jong u.

¹⁸ Hadien kane un phai la ka khmat sha kita ki 'dewlynnong, bad un jop ïa shibun: hynrei, uwei u rangbah un pynduh noh ïa ka jingpynkheiñ-burom kaba u la leh; shisha keiñ, un pynphai ruh ïa ka jingpynkheiñ-burom jong u halor jong u hi.

¹⁹ Ynda kumta, un phai la ka khmat sha ki kut baskhem ka ri jong u hi: hynrei, un jynthut bad un kyllon, bad yn ym shem shuh ïa u.

²⁰ “Ynda kumta, un mih da uwei pat ha ka jaka jong u ban phah ïa uba khrong bor ïa ka burom ka hima: hynrei, sa khyndiat sngi yn pynduh ïa u, ym ha ka jingbitar, lymne ha ka thma.

²¹ Te ha ka jaka jong u, un mih u briew uba khlem burom, ha uba kim shym la ai ka burom ka hima: hynrei, un wan ha ka por basuk, bad un ïoh ïa ka hima da ki jingkren arsap.

²² Bad da ki ksang'ti jong ka jingshlei yn kit noh ïa ki na khmat jong u, bad yn pynduh noh ïa ki; shisha, bad ïa u rangbah jong kata ka jutang ruh.

²³ Te ynda la pynlong ka jingïakut bad u, un leh shukor: namar un wan mih, bad un man khlaiñ da kiba khyndiat ki briew.

²⁴ Ha ka por basuk un wan sha ki jaka ki babha tam jong kata ka shnat; bad un leh ïa kaba ki kpa jong u kim ju leh mynno mynno, lymne ki kthaw jong u; un theh hapdeng jong ki, ïa ka jinglute, bad ka jingkurup, bad ka spah: bad un thaw la ki buit ïaleh ïa ki kut baskhem, kata ruh tang shi por.

²⁵ Bad un pynkhih ïa la ka bor bad ïa la ka jingshlur ban ïaleh ïa uta u syiem na shathie da u paidïapom bakhraw; bad u syiem na shathie un hiar thma da u paidïapom bakhraw bad badonbor eh: hynrei, un ym ïeng, namar kin thaw ïa ka buit ban ïaleh ïa u.

²⁶ Shisha keiñ kita kiba bam na ka jingbam jong u kin pynjot ïa u, bad u paidïapom jong u, un shlei noh: bad bun kin kyllon ïap.

²⁷ Bad shaphang kine ar ngut ki syiem, ki dohnud jong ki kin thew ïa ka ban leh sniew, bad kin ïakren lamler ha kajuh ka miej: hynrei, kan ym long; namar ka bakut kan long pynban ha ka por ba la buh.

²⁸ Ynda kumta, un phai pat sha la ka ri bad ka spah ka bakhraw; bad ka dohnud jong u kan long pyrshah ïa kata ka jutang bakhuid; te un leh katba u mon, bad un phai pat sha la ka ri.

²⁹ “Ha ka por ba la buh un phai pat, bad un wan shaphang shathie; hynrei, kan ym long ha ka por bakhatduh kumba ka la long ha ka banyngkong.

³⁰ Namar ki lieng ïapom na Kittim kin wan ïaleh ïa u; namar kata, un sngewsih, bad un phai noh pat, bad un khih bitar ïa kata ka jutang bakhuid, bad un leh katba u mon: un phai pat, bad un khmih sngewbha ïa kita kiba kyntait ïa kata ka jutang bakhuid.

³¹ Bad ki riewïapom kin ïeng ha ka liang jong u, bad kin leh sang ïa kata ka jaka kyntang, ïa kata ka kut baskhem keiñ, bad kin pynduh noh ïa kata ka jingainguh thang kaba borabor, bad kin pynïeng ïa kata ka jingijli kaba pynjot.

³² Te kat ïa kita kiba leh sniew pyrshah ïa kata ka jutang, un pynkylla da ki jingshukor: hynrei, kita ki briew kiba ithuh ïa U Blei jong ki kin long kiba khlaiñ, bad kiba nang jop.

³³ Bad kita ki bastad hapdeng kita ki briew kin hikai ïa shibun: pynban, kin hap da ka waitlam bad da ka ding, da ka jinglongmraw bad da ka jinglute, bun sngi.

³⁴ Te haba kin hap, da kaba khyndiat ka jingïarap, yn ïarap ïa ki: hynrei, bun kin pynïasoh ïa lade bad ki, da kaba arsap.

³⁵ Te katto katne na kita ki bastad kin hap, ïa ka ban phrang ïa ki, bad ban pynkhuid, bad ban pynlieh ïa ki, haduh ka por jong ka bakut: namar ba ka long ïa ka por ba la buh.

³⁶ “Bad uta u syiem un leh katba u mon; bad un pynkyntiew ïa lade, bad pynkhraw ïa lade halor ki blei baroh, bad un kren ïa kiei kiei ruh ki baphylla pyrshah ïa U Blei ki blei: bad un man bha haduh ba la pyndep ïa kata ka jingbitar; namar ïa kata kaba la thmu, yn pyndep keiñ.

³⁷ Lymne un ym suidñiew ïa ki blei ki kpa jong u, lymne ïa ka jingkyrpad ki kynthei, lymne un ym ñiew ïa uno uno u blei: namar un pynkhraw ïa lade halor baroh.

³⁸ Hynrei, ha ka jaka jong u, un burom ïa u blei thma: bad ïa u blei uba ki kpa jong u kim shym ithuh, un burom da ka ksiar, bad ka rupa, bad da ki mawkordor, bad kiei kiei ruh kiba itynnad.

³⁹ Bad un ïaleh ïa ki kut baskhem da ka bor u blei nongwei; uno uno uba nguh ïa u, un pynkhraw ïa ka burom jong u: bad un buh ïa ki ban synshar halor kiba bun, bad un bynta ïa ka ri ban long ka nong.

⁴⁰ “Bad ha ka por jong ka bakut, u syiem na shathie un tur sha u: bad u syiem na shatei un wan ïaleh ïa u kum ka lyer langthari, da ki kali ïapom, bad ki shipai shong kulai, bad bun ki lieng ïapom ruh; te un rung hapoh kita ki ri, bad un tap lup bad un ïaid lyngba.

⁴¹ Un rung hapoh kata ka ri ba-donburom ruh, bad ïa bun ki ri yn pynkyllon: hynrei, ïa kine yn pyllait na ka kti jong u: ka Edom, bad ka Moab, bad ki rangbah na ki khun u Ammon.

⁴² Un kner noh ïa la ka kti ruh halor kita ki ri: bad ka ri Ijipt kan ym ïohlait.

⁴³ Hynrei, un ïoh bor halor ki jingkynshew ksiar bad rupa, bad halor kiei kiei baroh kiba kordor jong ka Ijipt: bad ki Libia bad ki Ethiopia kin ïabud ïa u.

⁴⁴ Hynrei, ki jingbna na mihngi bad na shatei kin pynkhuslai ïa u: bad un mih noh da ka jingbitar bakhraw ban pynjot bad ban pynduh noh khoit ïa kiba bun.

⁴⁵ Bad un sher ïa ki dara ka ïing jong u hapdeng ka duriaw bad uta u lum bakyntang ba-donburom; pynban, un poi sha ka bakut jong u, bad yn ym don ban ïarap ïa u.