DANIEL 10 - KA BAIBL

Ka jingithuhpaw harud ka wah

¹ Ha ka snem ka balai jong u Seiros syiem ka Persha la pynpaw ei ei ha u Daniel, ïa uba la khot “u Belteshassar”; kata ruh ka la long kaba shisha, ka thma ka bakhraw keiñ: bad u la sngewthuh ïa kata, bad u la ïoh ka jingshemphang ïa kata ka jingithuhpaw.

² Ha kita ki sngi, nga, u Daniel, nga la khuslai jin lai taïew.

³ Ngam shym bam jingbam babang, lymne ym shym la don ka doh lane ka Waiñ ha ka shyntur jong nga, lymne ngam shym sleh ïa lade satia, tad ynda la dap lai taïew.

⁴ Bad ha ka ba-arphew saw tarik u bnai u banyngkong, katba nga la don harud kata ka wah bakhraw, “ka Hidekel”,

⁵ nga la khmied la ki khmat, bad nga la khmih, bad ha khmih, u briew uba la kup da ka jaiñ linen, uba la panpoh ïa la ka syngkai da ka ksiar banylla na Uphas:

⁶ ka met jong u ruh ka la long kum u Beril, bad ka khmat jong u, kum ka leilieh, bad ki khmat jong u, kum ki sharak ba la thang, bad ka rong ki ksang'ti bad ki kjat jong u ka la long kum ka rnong ba la pynphyrnai, bad ka jingsawa ki ktien jong u, kum ka jingsawa u paidbah.

⁷ Bad tang ma nga, u Daniel, marwei nga la ïohi ïa kata ka jingithuhpaw: namar kita ki briew kiba la don ryngkat bad nga, kim shym ïohi ïa kata ka jingithuhpaw; hynrei, ka jingkhynñiuh kaba khraw ka la ngat ha ki, bad ki la phet noh ban rieh ïa lade.

⁸ Kumta, la iehnoh ïa nga marwei, bad nga la ïohi ïa kane ka jingithuhpaw kaba khraw, te kam sah shuh ka bor ha nga: naba ka jingitynnad jong nga ka la kylla kaba pyut ha nga, bad ngam shym don bor shuh.

⁹ Pynban, nga la ïohsngew ïa ka jingsawa ki ktien jong u: te haba nga la ïohsngew ïa ka jingsawa ki ktien jong u, hangta nga la lap ha ka jingïohthiah lyngngai da pyllup, la ka khmat sha ka khyndew keiñ.

¹⁰ Bad ha khmih, ka kti ka la ktah ïa nga, kaba la khyllie pynshan khohsiew bad shan kti ïa nga.

¹¹ Bad u la ong ha nga, “Ko Daniel, me u briew ïa uba la ieit eh, to sngewthuh ïa ki ktien kiba nga kren ha me, bad to ïeng beit; namar ha me la phah ïa nga mynta”: bad haba u la lah kren ïa kane ka ktien ha nga, nga la ïeng da kaba khynñiuh.

¹² Ynda kumta, u la ong ha nga, “To wat sheptieng, ko Daniel; namar naduh kata ka sngi ka banyngkong ha kaba me la buh ïa la ka dohnud ban sngewthuh, bad ban pyndem ïa lade ha khmat U Blei jong me, la sngew ïa ki ktien jong me: bad na ka bynta ki ktien jong me nga la wan.

¹³ Hynrei, u syiem jong ka hima Persha u la ïeng ïaleh ïa nga arphew wei sngi; hynrei, ha khmih, u Meikhal, uwei u rangbah na ki bakhraw, u la wan ïarap ïa nga: te nga la sah hangta bad ki syiem ka Persha.

¹⁴ Mynta nga la wan ban pynsngewthuh ïa me shaphang kata ka ban jia ïa ki briew jong me ha ki sngi ki bakhatduh: namar ka jingithuhpaw ka long ïa kaba lawei lathai.”

¹⁵ Te haba u la lah kren ha nga ïa kine ki ktien, nga la pyndem la ka khmat sha ka khyndew, bad nga la sngap jar.

¹⁶ Te ha khmih, uwei uba kum u khun bynriew u la ktah ïa ki rmiang shyntur jong nga: ynda kumta, nga la ang la ka shyntur bad nga la kren bad nga la ong ha uta uba ïeng ha khmat jong nga, “A kynrad jong nga, ki jingsngewsih jong nga ki la tyllep ïa nga namar kata ka jingithuhpaw, te ka bor kam don shuh ha nga.

¹⁷ Namar kumno u shakri une u kynrad jong nga u lah ban kren bad une u kynrad jong nga? namar nga hi, ka bor kam don shuh ha nga, lymne kam sah mynsiem ha nga.”

¹⁸ Ynda kumta, uba ka jing-i kum u briew u la ktah pat ïa nga, bad u la pynkhlaiñ ïa nga.

¹⁹ Bad u la ong, “A u briew ïa uba la ieit eh, to wat sheptieng: to long ka jingsuk ïa me, to long uba khlaiñ, shisha, to long uba khlaiñ.” Te ynda u la kren ha nga, la pynkhlaiñ ïa nga, bad nga la ong, “To u kynrad jong nga un kren; namar me la pynkhlaiñ ïa nga.”

²⁰ Ynda kumta, u la ong, “Me tip balei nga la wan sha me? te mynta ngan leit phai pat ban ïaleh bad u syiem ka Persha; bad haba nga leit mih noh, ha khmih, u syiem ka Gris un wan.

²¹ Hynrei, ngan ïathuh ha me ïa-ei ba la thoh ha ka jingthoh jong ka jingshisha: bad ym don ba ïaineh bad nga pyrshah ïa kine, hynrei, tang u Meikhal u syiem jong phi.”