DANIEL 1 - KA BAIBL

Ka jingtip bad ka jingnang jingstad u Daniel bad ki lok jong u

¹ Ha ka snem ka balai ka jingsynshar jong u Jehoïakim u syiem ka Judah u la wan u Nebukhadnessar u syiem ka Babilon sha Jerusalem, bad u la ker kut ïa ka.

² Bad U Trai u la ai noh ïa u Jehoïakim u syiem ka Judah ha ka kti jong u, lem bad shi bynta na ki khiew ki pliang ka ïing U Blei; te u la rah noh ïa ki sha ka ri Shinar sha ka ïing u blei jong u: bad u la wallam ïa kita ki khiew ki pliang ha ka ïing jingkynshew u blei jong u.

³ Bad u syiem u la ong ïa u Aspenas u rangbah ki ïunukh jong u, ban wallam na ki khun Israel, na ka jaid syiem bad na ki bakhraw batri keiñ;

⁴ ïa ki samla bymdon ka jingthoh dak, hynrei, kiba bhabriew, bad kiba don buit ha ka jingstad baroh, bad ki basian ha ka jingtip, bad kiba sngewthuh ïa ka tynrai ka jingstad, bad kiba nang ban ïeng ha ka ïing u syiem; bad ba un hikai ïa ki ka jingstad bad ka ktien ki Khaldi.

⁵ Bad u syiem u la buh ka bynta ba ha la ka sngi ïa ki na ka jingbam syiem, bad na ka Waiñ kaba u dih, bad ba yn bsa ïa ki lai snem; ba ha ka bakut kita ruh ki lah ban ïeng ha khmat u syiem.

⁶ Te hapdeng kine, na ki khun Judah, la don u Daniel, u Hananiah, u Mishael, bad u Asariah.

⁷ Bad u rangbah ki ïunukh u la kyrteng ïa ki: ïa u Daniel u la khot “u Belteshassar”; bad ïa u Hananiah “u Shadrak”; bad ïa u Mishael “u Meshak”; bad ïa u Asariah “u Abednego”.

⁸ Hynrei, u Daniel u la thmu ha la ka dohnud ba un ym pyntngit ïa lade da ka jingbam syiem, lymne da ka Waiñ ba u dih: namar kata, u la kyrpad ïa u rangbah ki ïunukh ba um dei ban pyntngit ïa lade.

⁹ Te U Blei u la pynshem ïa u Daniel ka jingsngewbha bad ka jingieit ha khmat uta u rangbah ki ïunukh.

¹⁰ Bad uta u rangbah ki ïunukh u la ong ha u Daniel, “Nga sheptieng ïa u kynrad jong nga u syiem, uba la buh ïa ka jingbam bad ïa ka jingdih jong phi: namar balei un ïohi ba ki khmat jong phi ki kham sniew ban ïa kita ki samla kiba ïabiang ka rta bad phi? Kumta, phin pynrem ïa ka khlieh jong nga ha khmat u syiem.”

¹¹ Ynda kumta, u Daniel u la ong ha u Melsar, ïa uba u rangbah ki ïunukh u la buh halor u Daniel, u Hananiah, u Mishael, bad u Asariah:

¹² “To tynjuh ïa la ki shakri, nga kyrpad ïa me, shiphew sngi: bad to kin ai ri ïa ngi ban bam, bad ka um ban dih.

¹³ Ynda kumta, to sa khmih ïa ki khmat jong ngi ha khmat jong me, bad ïa ki khmat jong kita ki samla kiba bam na ka jingbam u syiem; te kumba me ïohi, to leh bad la ki shakri.”

¹⁴ Kumta, u la shahshkor ïa ki ha kane, bad u la tynjuh ïa ki, shiphew sngi.

¹⁵ Bad ha ka bakut kita ki shiphew sngi, ki khmat jong ki, ki la paw kham itynnad, bad ki la kham sngaid, ban ïa kita ki samla baroh kiba la bam na ka jingbam u syiem.

¹⁶ Kumta, u Melsar u la shim noh ïa ka jingbam jong ki, bad ïa ka Waiñ kaba ki dei ban dih, bad u la ai ri ïa ki.

¹⁷ Te shaphang kine saw ngut ki samla, U Blei u la ai ïa ki ka jingtip bad ka buit ha ka jingnang bad ka jingstad baroh: bad u Daniel u la don ka jingshemphang ha ki jingithuhpaw bad ki jingphohsniew baroh.

¹⁸ Te ha ka bakut kita ki sngi kiba u syiem u la buh ban wallam ïa ki hapoh, u rangbah ki ïunukh u la wallam ïa ki ha khmat u Nebukhadnessar.

¹⁹ Bad u syiem u la ïakren bad ki; te hapdeng jong ki baroh, ym shym la shem uwei ruh kum u Daniel, u Hananiah, u Mishael, bad u Asariah: namar kata, ki la ïeng ha khmat u syiem.

²⁰ Bad ha ka jingstad bad ka jingshemphang baroh, shaphang kiba u syiem u la kylli ïa ki, u la shem ba ki la kham nang shiphew shah ban ïa ki riewstad bad ki nongleh byrtong baroh kiba ha ka hima jong u baroh.

²¹ Te u Daniel u la sah haduh ka snem ka banyngkong u syiem Seiros.