AMOS 9 - KA BAIBL

Ym lah ban lait na kata ka jingpynjot U Blei

¹ Nga la ïohi ïa U Trai ba u ïeng hajan ka duwan: bad u la ong, “To shoh ïa ka khlieh ki rishot, ba ki nongrim ki jingkhang kin khih: bad pynlwet jin ïa ki halor ka khlieh jong ki baroh: nga ruh ngan pynïap ïa ki basah na ki da ka waitlam: ym don uwei na ki u ban phet noh, bad ym don uwei na ki u ban lait im.

² “La ki tih haduh ka dujok, nangta ka kti jong nga kan shim ïa ki; bad la ki kiew haduh ka bneng, nangta ngan pynhiar ïa ki.

³ Bad la ki buhrieh ïa lade ha khlieh u Karmel, ngan wad bad ngan shim noh ïa ki nangta; bad la ki ïarieh na khmat jong nga ha trai ka duriaw, nangta ngan hukum ïa u bseiñ, te un puh ïa ki.

⁴ Bad la ki leit long mraw ha khmat ki nongshun, nangta ngan hukum ïa ka waitlam, te kan pynïap noh ïa ki: bad ngan peit ïa la ki khmat ha ki, ïa ka ban sniew, te ym ïa ka ban bha.”

⁵ Naba U Trai, U Blei ki paid, u long uta uba ktah ïa ka ri te ka um noh, bad baroh kat kiba shong ha ka kin ïambriew; te kan shlei noh baroh kum kata ka Wah; bad kan them pat, kum ka Wah ka Ijipt.

⁶ Dei ma u uba tei ïa la ki kamra ha bneng, bad uba la seng nongrim ïa la ka khilon halor ka khyndew; uta uba phah khot ïa ki um ka duriaw bad u theh noh ïa ki halor ka khmat ka khyndew; “U Trai” long ka kyrteng jong u.

⁷ “Phi phim long ha nga kum ki khun ki Ethiopia, A ko khun Israel?” ong U Trai. “Nga la wallam noh ne em ïa ki Israel na ka ri Ijipt, bad ïa ki Philistia na Kaphtor, bad ïa ki Syria na Kir?

⁸ Ha khmih, ki khmat U Trai U Blei ki halor kata ka hima kaba pop, bad ngan pyndam noh ïa ka na khmat ka khyndew; tang ba ngan ym pynduh noh khoit ïa ka ïing u Jakob,” ong U Trai.

⁹ “Naba, ha khmih, ngan hukum, bad ngan kynruh ïa ka ïing Israel hapdeng ki jaid bynriew baroh, kumba kynruh ïa u Kew ha ka shalani, hynrei, iwei i barit eh i soh Kew in ym hap ha ka khyndew.

¹⁰ Ki bapop baroh na ki paidbah jong nga kin ïap da ka waitlam, kiba ong, ‘Kata ka basniew kan ym lap lymne leit sha shuwa jong ngi.’ ”

Ka jingpynïeng pat ïa ki Israel

¹¹ “Ha kata ka sngi ngan pynïeng ïa Ka Tabernakl u Dabid kaba la kyllon, bad ngan pyndam ïa ki jingpynpei jong ka; bad ngan pynïeng pat ïa ki jingtwa jong ka, bad ngan tei pat ïa ki kumjuh kumba ha ki sngi mynbarim;

¹² ba kin dup ïoh ïa kaba sah jong ka Edom, bad ïa kita ki jaid bynriew baroh, ïa kiba la khot da ka kyrteng jong nga,” ong U Trai uba leh ïa kane.

¹³ “Ha khmih, ki sngi kin wan,” ong U Trai, “ba u nonglur un lap ïa u nongot, bad uta uba ïuh ïa ki soh Waiñ ïa uba bet ïa u symbai; bad ki lum bah kin pynjaw ïa ka Waiñ thiang, bad ki lum rit baroh kin um noh.

¹⁴ Te ngan pynwan pat ïa ka jingpynwir ki Israel ki briew jong nga, bad kin tei pat ïa ki shnong bajot, bad kin shong ha ki; bad kin thung ki brisoh Waiñ, bad kin dih ïa ka Waiñ jong ki; kin thaw ki kper ruh, bad kin bam ïa u soh jong ki.

¹⁵ Bad ngan thung ïa ki ha la ka ri, bad yn ym rat noh shuh ïa ki na la ka ri kaba nga la ai ha ki,” ong U Trai U Blei jong me.