AMOS 8 - KA BAIBL

Ka jingithuhpaw kaba saw: shi shang u soh lyiur

¹ Kumne U Trai U Blei u la pyni ha nga: te ha khmih, shi shang ki soh lyiur.

² Bad u la ong, “Ko Amos, me ïohi aïu?” Te nga la ong, “Shi shang ki soh lyiur.” Ynda kumta, U Trai u la ong ha nga, “Ka bakut ka la wan ha ki Israel ki briew jong nga; ngan ym ïaid kiar shuh ïa ki.

³ Te ki jingrwai jong ka templ kin long ki jingjlew ha kata ka sngi,” ong U Trai U Blei: “Ki metïap kin long shibun; ha man ka jaka yn bred noh jar jar ïa ki.”

Ka jingpynjot bashyrkhei ïa ki Israel ka la jan

⁴ “To sngew ïa kane, A phi ki ban da ïuh roit ïa ki bakyrduh, bad ki ban da pynduh noh ïa ki baduk jong ka ri,

⁵ phi ïa-ong, ‘Lano un ïap noh u 'nai thymmai, ba ngin ïadie Kew? bad ka Sabbaton, ba ngin pynmih noh ïa u Kew? da kaba pynrit ïa ka ephah, bad pynheh ïa ka shekel, bad leh shukor da ki tarajur ka jingbymhok;

⁶ ba ngin thied ïa ki baduk da ka rupa, bad ïa ki bakyrduh da ki juti shi jur, bad die ïa ka synrum Kew.’ ”

⁷ U Trai u la smai da ka burom u Jakob, “Da shisha ngan ym klet lano lano ïa ki jingleh jong ki baroh.

⁸ Hato ka ri kan ym khynñiuh namar kane, bad uwei uwei baroh uba shong ha ka un ym ïam? Shisha, kan shlei kum kata ka Wah; bad yn pynkhih kyrthep ïa ka bad kan them pat, kum ka Wah ka Ijipt.”

⁹ “Te ha kata ka sngi,” ong U Trai U Blei, “ngan pynsep ïa ka sngi ha kaba shiteng sngi, bad ngan pyndum ïa ka khyndew haba dang shai ka sngi.

¹⁰ Te ïa Ki Jingkhawai Niam jong phi ngan pynkylla ïam, bad ïa ki jingrwai jong phi ka jingïambriew; bad ngan wallam ka jaiñ byrni ban long ha ki syngkai baroh, bad ka jingdkhaw khlieh ha baroh; bad ngan pynlong ïa ka kum ka jingïambriew ïa u khun marwei, bad ïa ka bakut jong ka kum ka sngi bakthang.

¹¹ “Ha khmih, ki sngi kin wan,” ong U Trai U Blei, “bad ngan phah ka jingkyrduh ha ka ri, ym ka jingkyrduh kpu, lymne ka jingsliang ïa ka um, hynrei, ka jong kaba ïohsngew ïa ki ktien U Trai.

¹² Bad kin ïa-ïaid shen shen na ka duriaw sha ka duriaw, bad na shatei haduh mihngi; kin ïaphet shane bad shawei ban wad ïa ka ktien U Trai, te kin ym shem ïa ka.

¹³ “Ha kata ka sngi, ki theisotti babhabriew bad ki samla kin ïapler namar kaba sliang.

¹⁴ Kita kiba smai da ka pop ka Samaria, bad kiba ong, ‘Katba u im U Blei jong me, ko Dan’; bad, ‘Katba ka im ka rukom Beer-sheba;’ kita keiñ kin kyllon, bad kin ym ïeng shuh lano lano ruh.”