AMOS 7 - KA BAIBL

Ki lai tylli ki jingithuhpaw jong ka jingpynjot ki puit, ka ding bad u sawar

¹ Kumne U Trai U Blei u la pyni ha nga: te ha khmih, u pynmih ïa ki puit ha kaba sdang ka jingkhie lung u 'lang khatduh; te ha khmih, ka la long u 'lang khatduh hadien ka jingot phlang u syiem.

² Te haba ki la lah bam ïa u phlang jong ka khyndew, ynda kumta, nga la ong, “A Trai U Blei, to map, nga kyrpad ïa me: kumno u Jakob un ïeng? naba u long u barit.”

³ U Trai u la kylla-ka-bamut shaphang kane: “Kan ym long keiñ,” ong U Trai.

⁴ U Trai U Blei u la pyni ha nga kumne: bad ha khmih, U Trai U Blei u la khot ïaleh da ka ding; te ka la jliah lut ïa ka jingjylliew bah, bad ka la thew ban bam ïa ka khyndew.

⁵ Ynda kumta, nga la ong, “A Trai U Blei, keiñ noh, nga kyrpad ïa me: kumno u Jakob un ïeng? Naba u long u barit.”

⁶ U Trai u la kylla-ka-bamut shaphang kane: “Kane ruh kan ym long,” ong U Trai U Blei.

⁷ Kumne u la pyni ha nga: te ha khmih, U Trai u la ïeng hajan ka kynroh ba la tei da ka sawar, bad ka sawar ha ka kti jong u.

⁸ Bad U Trai u la ong ha nga, “Ko Amos, me ïohi aïu?” Te nga la ong, “U sawar.” Ynda kumta, U Trai u la ong, “Ha khmih, ngan buh ïa ka sawar hapdeng ki Israel u paidbah jong nga; ngan ym ïaid kiar ïa ki shuh:

⁹ bad ki jaka jrong jong u Isaak kin long jaka kynjah, bad ïa ki jaka kyntang ki Israel yn pynjot noh; bad ngan ïeng ïaleh ïa ka ïing u Jeroboam da ka waitlam.”

U Amos bad u Amasaïah

¹⁰ Ynda kumta, u Amasaïah u lyngdoh ka Bethel u la phah ha u Jeroboam u syiem ki Israel, u da ong, “U Amos u la shet pyrshah ïa me hapdeng ka ïing Israel: ka ri kam lah shah ïa ki ktien jong u baroh.

¹¹ Naba u Amos u ong kumne, “ ‘U Jeroboam un ïap da ka waitlam, bad da shisha ïa ki Israel yn ïalam mraw noh na la ka ri.’ ”

¹² U Amasaïah u la ong ha u Amos ruh, “A me u nongïohi, khie leit, phet ïap noh me sha ka ri Judah, bad to bam kpu hangta, bad to ïathuhlypa hangta:

¹³ hynrei, wat ïathuhlypa shuh ha Bethel: naba ka long ka jaka kyntang u syiem, bad ka jaka bashong u syiem.”

¹⁴ Ynda kumta, u Amos u la ïathuh, bad u la ong ha u Amasaïah, “Ngam shym long u nongïathuhlypa, lymne u khun u nongïathuhlypa; hynrei, nga la long uba sumar jingri, bad u nongtrei brisoh Dumbur:

¹⁵ te U Trai u la shim noh ïa nga na kaba sharai ïa ka kynhun, bad U Trai u la ong ha nga, ‘Khie leit, ïathuhlypa ha ki Israel ki briew jong nga.’

¹⁶ Namar kata te, to sngew ma me ïa ka ktien U Trai: “Ma me, me ong, ‘Wat ïathuhlypa pyrshah ïa ki Israel, bad wat kren pyrshah ïa ka ïing u Isaak;’ ”

¹⁷ namar kata, U Trai u ong kumne: “Ka tnga jong me kan sa long ka nuti ha ka shnong, bad ki khun shynrang bad ki khun kynthei jong me kin kyllon da ka waitlam, bad ïa ka khyndew jong me yn sam da u ksai: bad ma me hi men ïap ha ka ri ka bymkhuid, bad shisha shisha, yn ïalam mraw ïa ki Israel na la ka jong ka ri.”