AMOS 6 - KA BAIBL

Ka jingpynjot ïa ki Israel

¹ “Kordit ïa kita kiba shongsuk ha Seïon, bad ïa kita kiba sngewskhem ha u lum Samaria, kiba donnam na ki bakongsan jong ki jaid bynriew, ha kiba ka ïing Israel ka wan!

² To ïaid haduh Kalneh, bad to khmih; bad nangta to leit haduh ka Hamath bah: ynda kumta, leit hiar sha Gath jong ki Philistia: hato ki kham bha ban ïa kine ki hima? lane ki pud hima jong ki, ki kham jrong ban ïa ka pud hima jong phi?

³ Phi kiba pynjngai ïa ka sngi ka basniew, bad ba pynwan hajan ïa ka jingshong ka jingleh-jubor;

⁴ kiba thiah ha ki jingthiah bniat hati, bad kiba kyrbeit ïa lade ha la ki palong, bad kiba bam ïa ki khun langbrot na ka kynhun, bad ïa ki khun masi napdeng ka sem;

⁵ kiba rwai ïa ki jingrwai ba thala ha ki sur jong ka bela; kiba thaw ha lade ïa ki jingtem bathymmai, kum u Dabid;

⁶ kiba dih Waiñ na ki khuri heh, bad sleh ïa lade da ki jingsleh babha tam; hynrei, kim sngewsih namar ka jingjynjar u Joseph.

⁷ Namar kata te, kin ïaleit shong mraw ryngkat kiba nyngkong ki ban leit shong mraw, bad ka jingleh tamsa jong kita kiba thiah alhia kan dam noh.

⁸ “U Trai U Blei u la smai ha lade, ong U Trai, U Blei ki paid: “ ‘Nga isih ïa ka jingleh khraw u Jakob, bad nga shun ïa ki ïingbah jong u: namar kata, ngan aiti noh ïa kane ka nongbah bad baroh kat kiba don ha ka.’ ”

⁹ “Bad kan jia, ba lada don shiphew ngut kiba sah ha kawei ka ïing, kin ïap noh keiñ.

¹⁰ Bad haba u kñi jong u briew uba la ïap un rah noh ïa u, wat uta uba thang ïa u, ïa ka ban pynmih noh ïa ki shyieng na ïing, bad un ong ha uta uba sha kyndong eh jong ka ïing, ‘Dang sah mano mano ruh bad me?’ u te un ong, ‘Em’; ynda kumta, un ong, ‘To sngap jar noh; naba ngim bit shuh ban ong ïa ka kyrteng U Trai.’ ”

¹¹ Naba, ha khmih, U Trai u hukum, te ïa ka ïingbah yn shoh da ki jingtwa, bad ïa ka ïingrit da ka jingpdang.

¹² Ki kulai kin ïamareh halor u mawsiang? Yn lur mano mano hangta da ki masi dab? Naba phi la pynkylla umksang ïa ka jingbishar, bad u 'hur kthang ïa u soh ka hok:

¹³ phi kiba leh kmen ha kaba thala, kiba ong, “Hato ngim shym la shim ha ngi ki reng da la ka jong ka bor?”

¹⁴ “Naba, ha khmih, ngan pynïeng pyrshah ïa phi da ka jaid bynriew, A ka ïing Israel, ong U Trai, U Blei ki paid; te kin pynjynjar ïa phi naduh kaba rung sha Hamath haduh i wah duid jong ka Arabah.”