AMOS 5 - KA BAIBL

Ka jingkhot sha ka jingkylla-ka-bamut

¹ To sngew ïa kane ka ktien kaba nga shim ban long ka jingïambriew pyrshah ïa phi, A ka ïing Israel.

² “Ka theisotti Israel ka la kyllon; kan ym khie shuh: la bred ei ïa ka ha la ka khyndew; ym don shuh u ban pynïeng ïa ka.”

³ Naba U Trai U Blei u ong kumne: “Ka nongbah kaba ju leit mih shi hajar ngut kan sah shispah, bad kata kaba ju leit mih shispah ngut kan sah shiphew, ha ka ïing Israel.”

⁴ Naba kumne u ong U Trai ha ka ïing Israel, “To wad phi ïa nga, te phin im:

⁵ hynrei, wat wad ïa ka Bethel, lymne wat rung sha Gilgal, wat leit ruh sha Beer-sheba: naba da shisha ka Gilgal kan leit long mraw, bad ka Bethel kan duh ei noh.”

⁶ To wad ïa U Trai, te phin im; ïoh ba un mih noh kum ka ding ha ka ïing u Joseph, bad ba kan bam duh noh bad ba yn ym don ban pynlip ïa ka ha Bethel:

⁷ phi kiba pynkylla 'hur kthang ïa ka jingbishar, bad kiba pynkyllon ha ka khyndew ïa ka hok.

⁸ To wad ïa uta uba pynlong ïa ki Pleïades bad u Orion, bad uba pynkylla ïa ka jingdum tliw tliw ban long step, bad ïa ka sngi ban long miet; uba phah khot ïa ki um ka duriaw, bad uba theh noh ïa ki halor ka khmat ka khyndew; “U Trai” long ka kyrteng jong u;

⁹ uba wallam ïa ka jingpynjot bakynsan halor kiba khlaiñ, ba kumta ka jingpynjot ka ngat ïa ka kut.

¹⁰ Ki shun ïa uba pynrem ha ka khyrdop, bad ki isih ïa uba kren hok.

¹¹ Namar kata, naba phi ïaïuh roit ïa u baduk, bad ba phi khrong khia ïa u Kew na u: phi la tei ïa ki ïing da ki maw ba la shniah, hynrei, phin ym ïoh shong ha ki; phi la thung ki brisoh Waiñ kiba itynnad, hynrei, phin ym ïoh dih na ka Waiñ jong ki.

¹² Naba nga tip kiba bun syrtap katno ki long ki jingryngkang jong phi bad katno kiba jur ki long ki pop jong phi; phi kiba pynjynjar ïa ki bahok, kiba bamsap, bad kiba ñiat noh ha ka khyrdop ïa ki bakyrduh na la ka hok.

¹³ Namar kata, uta u basian un sngap jar kum ha kata ka por; naba ka long ka por ka basniew.

¹⁴ To wad ïa ka babha, te ym ïa ka basniew, ba phin ïoh im: te kumta U Trai, U Blei ki paid, un long lem bad phi, kumba phi ong.

¹⁵ To shun ïa ka basniew, bad ieit ïa ka babha, bad to pynïeng ïa ka jingbishar ha ka khyrdop: lehse U Trai, U Blei ki paid, un leh isynei ïa kiba sah jong u Joseph.

¹⁶ Namar kata, kumne u ong U Trai, U Blei ki paid, U Trai keiñ: “Kan long ka jingïam ha ki lynti bah baroh; bad kin ïa-ong ha ki lynti shnong baroh, ‘Waw! waw!’ Bad kin khot ïa u nongrep ban ïambriew, bad ïa kita kiba nang ïambriew ban ïam.

¹⁷ Bad ha ki brisoh Waiñ baroh kan long ka jingïam: naba ngan ïaid lyngba napdeng jong me,” ong U Trai.

¹⁸ Kordit ïa phi kiba kwah ïa ka sngi U Trai! namar balei phi kwah ïa ka sngi U Trai? ka long ka jingdum, te ym ka jingshai.

¹⁹ Kumjuh kumba u briew u la phet ïap na u sing, te u la ïakynduh bad ka dngiem; lane u la rung shapoh ïing bad u la shan da la ka kti ha ka kynroh, bad la puh u bseiñ ïa u.

²⁰ Hato kata ka sngi U Trai kan ym long ka jingdum, te ym ka jingshai? ka ba-dum tliw keiñ, bymdon jingtyngshaiñ satia ha ka?

²¹ “Nga isih, nga ibeiñ ïa Ki Jingkhawai Niam jong phi, bad ngan ym sngewbha satia ïa ki jingïaseng bakyrpang jong phi.

²² Shisha keiñ, la phi ainguh ha nga ïa ki jingainguh thang bad ki jingainguh bam jong phi, ngan ym pdiang ïa ki: lymne ngan ym ñiew ïa ki jingainguh pynïasuk da ki jingri basngaid jong phi.

²³ To pynkynriah noh na nga ïa ka jingsawa ki jingrwai jong me; naba ngan ym sngap ïa ka jingkynud ki bela jong me.

²⁴ Hynrei, to ai ba ka jingbishar kan tuid kum ki um, bad ka hok kum ka wah kaba shlei.

²⁵ “Hato phi la wallam ki jingkñia bad ki jingainguh ha nga ha ka ri khlaw sawphew snem, A ka ïing Israel?

²⁶ Hynrei, phi la rah ïa u Sikuth u syiem jong phi bad ïa ki Khiun ki durblei jong phi, u khlur jong u blei jong phi, kiba phi la thaw ha lade.

²⁷ Namar kata, ngan ïalam mraw ïa phi sha lyndet ka Damaskos,” ong U Trai, uba ka kyrteng jong u, “U Blei ki paid”.