AMOS 4 - KA BAIBL

¹ “To sngew ïa kane ka ktien, phi ki masi ka Bashan, kiba shong ha u lum Samaria, kiba lehbeiñ ïa u baduk, kiba khñiot ïa u bakyrduh, kiba ong ha ki trai jong ki, ‘Wallam, bad to ngin ïadih.’

² U Trai U Blei u la smai da la ka jingkhuid, ba, ha khmih, ki sngi kin wan ha phi, ba kin shim noh ïa phi da ki bnoh, bad kita kiba sah na phi da ki khwai dohkha.

³ Te phin leit mih noh na ki jingtwa, kawei kawei baroh beit ha khmat jong ka; bad yn bred ïa phi ha Harmon,” ong U Trai.

Ki Israel kim shemphang ïa ka jingsneng sympat U Blei

⁴ “Ale sha Bethel, bad to leh palat; sha Gilgal, bad to nang pynbun ïa ka jingpalat; bad to wallam ïa la ki jingkñia man ka step, bad ïa la ki bashiphew ha man la ka lai sngi;

⁵ bad to kñia ïa ka jingkñia ainguh na kata kaba la khleh thiat, bad to pyrta ïa ki jingainguh sngewbha bad to pynbna ïa ki: naba ïa kane phi sngewbha, A phi ki khun Israel,” ong U Trai U Blei.

⁶ “Te nga la ai ha phi ka jingtyrkhong bniat ha ki nongbah jong phi baroh, bad ka jingkyrduh kpu ha phi ha ki jaka jong phi baroh: pynban, phim shym phai sha nga,” ong U Trai.

⁷ “Bad nga la khang ruh ïa u slap na phi, haba dang don lai bnai haduh ka aïom ot: bad nga la pynhap slap ha kawei ka nongbah, bad nga la pynlong ban ym hap slap ha kawei pat ka nongbah. Kawei ka bynta ka la ïoh slap, te kata ka bynta ka bym shym ïoh slap ka la ïap tyrkhong.

⁸ Kumta, ar ne lai tylli ki nongbah ki la ïaid ïor ïor sha kawei ka nongbah ban dih um, te kim jah sliang: pynban, phim shym phai sha nga,” ong U Trai.

⁹ “Nga la shoh ïa phi da ka jingïap tram bad kaba bam khñiang: ïa ka jingkynrei ki kper jong phi bad ki brisoh Waiñ jong phi bad ki dieng Dumbur jong phi bad ki dieng Olib jong phi u puit u la bam duh: pynban, phim shym phai sha nga,” ong U Trai.

¹⁰ “Nga la phah hapdeng jong phi da ka jingïapkhlam kum ka rukom ka Ijipt: ïa ki samla shynrang jong phi nga la pynïap da ka waitlam, bad nga la rah noh ïa ki kulai jong phi; bad ïa ka jingiwkhong ka jaka shong dara jong phi nga la pynkiew haduh ki thliew khmut jong phi: pynban, phim shym phai sha nga,” ong U Trai.

¹¹ “Nga la pynkyllon ïa kiba na phi kumba U Blei u la pynkyllon ïa ka Sodom bad ka Gomorra, bad phi, phi la long kum ka dieng tyllaw ba la weng noh na ka jinging; pynban, phim shym la phai sha nga,” ong U Trai.

¹² “Namar kata, kumne ngan leh ïa me, ko Israel: bad namar ba ngan leh ïa kane ha me, to khreh ban ïakynduh bad U Blei jong me, ko Israel.”

¹³ Naba, ha khmih, uta uba shna ïa ki lum, bad uba thaw ïa ka lyer, bad uba ïathuh ha u briew kaei ka jingmut jong u, uba pynlong dum ïa ka step, bad uba ïuh halor ki jaka bajrong jong ka khyndew; “U Trai, U Blei ki paid” long ka kyrteng jong u.