AMOS 3 - KA BAIBL

Ka kamram u nongïathuhlypa

¹ To sngew ïa kane ka ktien ba U Trai u la kren pyrshah ïa phi, A ki khun Israel, pyrshah ïa kata ka ïing baroh kaba nga la wallam noh na ka ri Ijipt, u da ong,

² “Tang ma phi keiñ nga la ithuh na ki kur baroh ka pyrthei: namar kata, ngan pynwan phai halor jong phi ïa ki jingleh bymhok jong phi baroh.

³ “Hato ar ngut kin ïaïaid lang lymda ki ïadei jingmut?

⁴ Hato u sing un kyrhuh ha khlaw, haba um don jinglute? Hato u sing samla un byrngem na la ka krem, lada um shym la kynrup ei ei?

⁵ Hato u sim un ngat ha ka jingriam ha ka khyndew, ha ka bym shym la buh ïa ka shangkhawiah ïa u? Hato ka jingriam kan kynjih na ka khyndew, khlem da ngat ei ei ruh em?

⁶ Hato yn put ïa ka ronsing ha nongbah, bad ki briew kin ym sheptieng? Hato ka jingsniew kan ngat ha ka shnong, haba U Trai um leh ïa kata?

⁷ “Shisha U Trai U Blei un ym leh ei ei, khlem da pynpaw ïa la ka jingthmu ha la ki shakri ki nongïathuhlypa.

⁸ U sing u la kyrhuh, uei u ban ym sheptieng? U Trai U Blei u la kren, uei u ban ym ïathuhlypa?”

Ka jingjot bashyrkhei jong ka Samaria

⁹ To pynbna phi ha ki ïingbah ha Ashdod, bad ha ki ïingbah ha ri Ijipt, bad to ong, “To ïalum lang halor ki lum Samaria, bad to khmih ki jingkhynwin kiba khraw katno ki don hapoh jong ka, bad ki jinglehbeiñ kiba katno hapdeng jong ka.”

¹⁰ “Naba kim nang ïa ka ban leh hok,” ong U Trai, “ki ïakynton ïa ka jingleh-jubor bad ka jinglute ha la ki ïingbah.”

¹¹ Namar kata, kumne u ong U Trai U Blei: “u nongïaleh pyrshah un don, baroh sawdong ïa ka ri keiñ: te un pynduh ïa ka bor jong me na me, bad un lute ïa ki ïingbah jong me.”

¹² Kumne u ong U Trai: “Kumba u nongaplangbrot u knieh ar tylli ki kjat, lane shi lyngkot ka shkor na ka shyntur u sing; kumta, yn knieh noh ïa ki khun Israel kiba shong ha Samaria ha ka dong i jingthiah, bad halor ki syngkhlieh muka jong ka jingthiah.

¹³ “To sngap phi, bad to sakhi pyrshah ïa ka ïing u Jakob,” ong U Trai U Blei, U Blei ki paid.

¹⁴ “Naba ha kata ka sngi kaba ngan pynphai ïa ki jingpalat u Israel halor jong u, ngan khmih ruh ïa ki duwan ka Bethel, bad ïa ki reng jong ka duwan yn pom noh, bad kin hap ha khyndew.

¹⁵ Te ngan shoh ïa ka ïingshong tlang lem bad ka ïingshong lyiur; bad ki ïing kiba da ki bniat hati kin duh noh, bad ki ïing ki bakhraw kin dam noh,” ong U Trai.