AMOS 2 - KA BAIBL

¹ Kumne u ong U Trai: “Namar lai tylli ki jingryngkang u Moab, shisha, namar saw tylli, ngan ym pynphai noh ïa ka jingpynshitom na u; namar u la thang haduh ban da long shun ïa ki shyieng u syiem ka Edom:

² hynrei, ngan phah ka ding halor u Moab, te kan bam duh ïa ki ïingbah ka Kerioth; bad u Moab un ïap ha ka jingkhihwin, ha ka jingkynhui, bad ha ka jingsawa ka turoi:

³ bad ngan pom noh ïa u nongbishar napdeng jong u, bad ngan pynïap noh baroh ïa ki bakhraw batri jong u lem bad u,” ong U Trai.

⁴ Kumne u ong U Trai: “Namar lai tylli ki jingryngkang ki Judah, shisha, namar saw tylli, ngan ym pynphai noh ïa ka jingpynshitom na ki; namar ki la kyntait noh ïa ka hukum U Trai, bad kim shym sumar ïa ki aiñ jong u, bad ki jinglamler jong ki, ki la pynsakma ïa ki, ha kiba ki kpa jong ki, ki la ju ïaid:

⁵ hynrei, ngan phah ka ding halor ki Judah, te kan bam duh ïa ki ïingbah ka Jerusalem.”

Ka jingbishar U Blei halor ki Israel

⁶ Kumne u ong U Trai: “Namar lai tylli ki jingryngkang ki Israel, shisha, namar saw tylli, ngan ym pynphai noh ïa ka jingpynshitom na ki; namar ki la die noh ïa u bahok namar ka rupa, bad ïa u baduk namar shi jur ki khulom:

⁷ kiba ïuh roit ïa ka khlieh ki baduk hapoh ka khyndew, bad ki pynbakla ïa ka lynti jong uba lui lui: bad u briew bad la u kpa kin leit ha kajuh ka kynthei, ïa ka ban pynsang ïa ka kyrteng bakhuid jong nga:

⁸ bad halor ki jaiñ ba la bynda ki thiah hajan ki duwan baroh, bad ha ka ïing U Blei jong ki, ki dih ïa ka Waiñ jong kiba la shah daiñ kuna.

⁹ “Pynban, nga la pynjot ïa u nong Amor ha khmat jong ki, uba ka rynïeng jong u ka la long ka rynïeng ki dieng Kedar, bad u la khlaiñ kat ki dieng Sning; pynban, nga la pynduh ïa u soh jong u na jrong, bad ïa ki thied jong u na shapoh.

¹⁰ Nga la wallam ruh ïa phi na ka ri Ijipt, bad nga la ïalam ïa phi sawphew snem ha ka ri khlaw, ïa ka ban ïoh ïa ka ri u nong Amor.

¹¹ Bad nga la pynmih na ki khun shynrang jong phi ban long nongïathuhlypa, bad na ki samla jong phi ki ban long ki Nasar. Hato kam long kumta, A phi ki khun Israel?” ong U Trai.

¹² “Hynrei, phi la pyndih ïa ki Nasar da ka Waiñ; bad phi la hukum ïa ki nongïathuhlypa, phi ïa-ong, ‘Wat ïathuhlypa.’

¹³ “Ha khmih, ngan ban khak ïa phi ha la ka jaka, kumba ka kali kaba dap da ki song Kew ka ban.

¹⁴ Bad ka bor phet noh kan duh noh na uba stet, bad uba khlaiñ un ym ïoh pynkhlaiñ ïa la ka bor, lymne uba shait un ym pynim ïa la ka mynsiem:

¹⁵ lymne un ym ïeng uta uba bat ïa ka ryntieh; bad uta uba stet ki kjat un ym pynim ïa lade; lymne uta uba shong kulai un ym pynim ïa la ka mynsiem:

¹⁶ bad uta uba ïaw mynsiem hapdeng ki bakhlaiñ un phet ïap noh lyngkhuit ha kata ka sngi,” ong U Trai.