AMOS 1 - KA BAIBL

Ka jingbishar U Blei halor ki hima ba-marjan ki Israel

¹ Ki ktien u Amos, uba la long hapdeng ki nongaplangbrot ka Tekoa, kiba u la ïohi shaphang ki Israel ha ki sngi u Ussiah u syiem ka Judah, bad ha ki sngi u Jeroboam u khun u Joash u syiem ki Israel, ar snem shuwa u jumai.

² Bad u la ong, “U Trai un kyrhuh na Seïon, bad un pynmih ïa la ka ktien na Jerusalem; ki jaka pynbam phlang ki nongaplangbrot kin ïapstai, bad ka khlieh u Karmel kan ïap tyrkhong.”

³ Kumne u ong U Trai: “Namar lai tylli ki jingryngkang ka Damaskos, shisha, namar saw tylli, ngan ym pynphai noh ïa ka jingpynshitom na ka; namar ki la shoh ïa ka Gilead da ki tiar shoh kba kiba da u nar:

⁴ hynrei, ngan phah ka ding shapoh ka ïing u Hasael, bad kan bam duh ïa ki ïingbah u Benhadad.

⁵ Bad ngan pynkheiñ ïa u narkhang khyrdop ka Damaskos, bad ngan pom noh ïa uta uba shong ha Ka Them Aben, bad ïa uta uba bat ïa u dieng synshar na ka ïing Eden: bad u paidlang ka Syria un leit shong mraw haduh Kir,” ong U Trai.

⁶ Kumne u ong U Trai: “Namar lai tylli ki jingryngkang ka Gasa, shisha, namar saw tylli, ngan ym pynphai noh ïa ka jingpynshitom na ka; namar ki la ring mraw ïa u paidbah baroh, ban aiti noh ïa ki ha u Edom:

⁷ hynrei, ngan phah ka ding ha ka kynroh ker ka Gasa, bad kan bam duh ïa ki ïingbah jong ka:

⁸ te ngan pom noh ïa u shnong u thaw na Ashdod, bad ïa uta uba bat ïa u dieng synshar na Ashkelon; bad ngan pynphai ïa la ka kti pyrshah ïa ka Ekron, bad kita kiba sah jong ki Philistia kin ïap duh noh,” ong U Trai U Blei.

⁹ Kumne u ong U Trai: “Namar lai tylli ki jingryngkang ka Tyros, shisha, namar saw tylli, ngan ym pynphai noh ïa ka jingpynshitom na ka; namar ki la aiti noh ïa u paidbah baroh ha u Edom, bad kim shym kynmaw ïa ka jingïateh jutang shipara:

¹⁰ hynrei, ngan phah ka ding ha ka kynroh ker ka Tyros, te kan bam duh ïa ki ïingbah jong ka.”

¹¹ Kumne u ong U Trai: “Namar lai tylli ki jingryngkang ka Edom, shisha, namar saw tylli, ngan ym pynphai noh ïa ka jingpynshitom na ka; namar ba u la beh ïa la u para da ka waitlam, bad u la pynduh noh ïa ka jingisynei baroh, bad ka jingbitar jong u ka tar ha la ka sngi, bad u la bat ïa la ka jingbitar shla ha la ka rta:

¹² hynrei, ngan phah ka ding halor ka Teman, te kan bam duh ïa ki ïingbah ka Bosrah.”

¹³ Kumne u ong U Trai: “Namar lai tylli ki jingryngkang ki khun u Ammon, shisha, namar saw tylli, ngan ym pynphai noh ïa ka jingpynshitom na ka; namar ki la tar ïa ki kynthei bapunkhun jong ka Gilead, khnang ba kin ïoh pynïar ïa la ka pud:

¹⁴ hynrei, ngan pynmeh ïa ka ding ha ka kynroh ka Rabbah, te kan bam duh ïa ki ïingbah jong ka, da ka jingkhynwin ha ka sngi ka thma, da ka 'erïong ha ka sngi ka lyer langthari:

¹⁵ bad u syiem jong ki un leit shong mraw, ma u lem bad ki bakhraw batri jong u,” ong U Trai.