2 TIMOTHI 4 - KA BAIBL

¹ Nga hukum ha khmat U Blei, bad U Jisu Khrist uba U Trai, u ban sa bishar ïa kiba im bad ïa ki baïap, bad da kata ka jingmihpaw jong u bad ka hima jong u,

² to men ïalap ïa kata ka ktien; to ïaiminot haba dei por, ha bymdei por de; to pynkynduh, to sneng, to kyntu da ka jingshahslem baroh bad ka jinghikai.

³ Namar ka por kan jia, haba kin ym shahshkor ïa ka jinghikai bajanai; hynrei, haba ki don ki shkor ba-dait, kin ïakynton ha lade ïa ki nonghikai katba kum ki jingkwah brai jong ki hi;

⁴ bad kin pynphai noh ïa la ki shkor jong ki na ka jingshisha, bad kin phai khmat sha ki puriskam.

⁵ Hynrei, ma me, to sharai ha kiei kiei baroh, to shah shitom, to leh ïa ka kam u nongïathuhkhana, to pyndep ïa kata ka kam jong me.

⁶ Namar ïa nga la theh noh lypa kum ka jingainguh dih, bad kata ka por ka jingleit noh jong nga ka la jan.

⁷ Nga la ïaleh ïa kata ka jingïaleh babha, nga la pyndep ïa la ka jingphet, nga la ri ïa ka jingngeit.

⁸ Naduh mynta, ïa nga la buh ïa kata ka pansngiat jong ka hok, ïa kaba U Trai, uta U Nongbishar bahok, un ai ha nga ha kata ka sngi: bad ym tang ha nga hi, hynrei, ha kita baroh ruh kiba ieit ïa kata ka jingmihpaw jong u.

Bad ki jingkyrpad u Paul

⁹ To pynkloi ban wan shen sha nga;

¹⁰ namar u Demas u la iehnoh ïa nga, bad u la ieit ïa kane ka pyrthei, bad u la leit noh sha Thessaloni; u Kresen sha Galatia; u Titos sha Dalmatia.

¹¹ Tang u Loukas u don lem bad nga. To shim ïa u Mark, to ïalam lem bad me: namar u long uba myntoi ïa nga ha ka kam ïathuhkhana.

¹² Hynrei, ïa u Tukhikos nga la phah sha Ephesos.

¹³ Kato ka jaiñkup ba nga la iehnoh ha Troas bad u Karpos, haba me wan, to wallam, bad ïa kita ki kitab, kham tam ïa kita ki kot snieh.

¹⁴ U Aleksander, uta u nongtrei tama, u la leh sniew shibun ïa nga; U Trai un ai ha u katba kum ki jingleh jong u;

¹⁵ na u me ruh men kiar, namar u la ïeng ïaleh pyrshah shibun ïa ki ktien jong ngi.

¹⁶ Ha kata ka jingïasaid-da nyngkong jong nga, ym don mano mano ba la ïarap ïa nga; hynrei, baroh ki la iehnoh ïa nga: wat ai ba yn ñiew ïa kata ha ki.

¹⁷ Hynrei, U Trai u la ïeng hajan jong nga, bad u la ai bor ha nga; khang ba da nga yn ïoh pyndep biang ïa kata ka jingïalap, bad ba ki Jentil baroh kin ïohsngew: te la pyllait ïa nga na ka shyntur u sing.

¹⁸ Bad U Trai un pyllait ïa nga na ka jingleh basniew baroh, bad un ri pynim ïa nga sha kata ka hima jong u kaba ha bneng: ha uba to long ka burom ha la ka rta: Amen.

U la wai noh da ki jingkhublei

¹⁹ Ai khublei ïa ka Priska bad u Akwila, bad ïa ka ïing u Onesiphoros.

²⁰ U Erastos u la sah ha Korinth; hynrei, ïa u Trophimos nga la iehnoh ha Miletos, ba u pang.

²¹ To pynkloi noh ban wan shuwa ka tlang. U Ïubulos, bad u Puden, bad u Linos, bad ka Klaudia, bad ki parabangeit baroh, ki ïakhublei ïa me.

²² U Trai un long lem bad ka mynsiem jong me. To long ka jingaiei lem bad phi: Amen.