2 TIMOTHI 2 - KA BAIBL

U shipai babha U Jisu Khrist

¹ Ma me, namar kata, ko khun jong nga, to pynkhlaiñ ïa lade ha ka jingaiei kaba ha U Khrist Jisu.

² Bad kita kiei kiei ruh ïa kiba me la ïohsngew na nga hapdeng bun ki sakhi, ïa kita keiñ, to men aiti ha ki briew ïa kiba lah ban shaniah, kiba lah ban hikai ïa kiwei ruh.

³ Ma me, namar kata, to shah shitom bad nga, kum u shipai babha U Jisu Khrist.

⁴ Ym don uba pynsuh sat ïa lade da kiei kiei ki jong kane ka jingim haba u leit ïaleh thma; khnang ba un ïoh pynsngewbha ïa uta uba la thung shipai ïa u.

⁵ Bad lada uno uno u ïaleh ruh ha ki jingïaleh thong, yn ym pynphong pansngiat ïa u, lymda un ïaleh katba dei ka rukom.

⁶ Ka dei ïa u nongsumar bri uba trei minot ban ïoh nyngkong ma u na kita ki soh.

⁷ To pyrkhat ïa kiba nga ong; naba U Trai un ai ha me ka jingshemphang ha kiei kiei baroh.

⁸ To ïaikynmaw ïa U Jisu Khrist ïa uba la pynmih pat na ki baïap, uba na u symbai u Dabid, katba kum kata ka gospel jong nga:

⁹ ha kaba nga shah shitom haduh ki jingkhum, kum u nongleh bymman; hynrei, ïa ka ktien ka jong U Blei ym shym la khum keiñ.

¹⁰ Namar kata, nga ïaishah ïa kiei kiei baroh na ka bynta kiba la jied, ba ma ki ruh kin ïoh ïa ka jingpynim kaba ha U Khrist Jisu, lem bad ka burom bymjukut.

¹¹ Kane ka ktien kaba shisha: “Namar lada ngi la ïap lem bad u, ngin ïoh im ruh lem bad u;

¹² lada ngi ïaishah, ngin ïasynshar ruh lem bad u; lada ngin len ïa u, u ruh un len ïa ngi:

¹³ lada ngi ki bymneh, u ïaisah ma u, uba ïaineh;” naba u, um lah ban len ïa lade.

U nongtrei ba la pdiang hun

¹⁴ To pynkynmaw ïa ki shaphang kine kiei kiei ruh, da kaba hukum jur ïa ki ha khmat U Trai ban ym ïa-pyneh shaphang ki ktien, ïa ka ban ym myntoi ei ei ruh em, hynrei, tang ïa ka ban pynbakla ïa kiba ïohsngew.

¹⁵ To pyrshang smat ban aiti ïa lade ba la pdiang hun da U Blei, kum u nongtrei u bymdonkam ban lehrain, uba ïasam beit ïa ka ktien ka jingshisha.

¹⁶ Hynrei, na kita ki ktien bieit bathala to kiar noh; namar kin ïanang kham ïaid sha ka jingbymriewblei.

¹⁷ Bad kata ka ktien jong ki, kan bam kum kaba bampong: na kiba long ki jong u Hemenaïos bad u Philetos;

¹⁸ ki briew kiba la bakla noh shaphang ka jingshisha, ki da ong, ba kata ka jingmihpat ka la long lypa; bad ki ïa-pynkyllon khram ïa ka jingngeit jong kiwei.

¹⁹ Hynrei, kata ka nongrim baskhem jong U Blei ka ïaineh, kaba don kane ka shab: “U Trai u ithuh ïa kita kiba long ki jong u”: bad, “To uwei pa uwei baroh uba khot kyrteng ïa ka kyrteng U Khrist, un kyndiah noh na ka jingbymhok.”

²⁰ Te ha ka ïing kaba khraw, ki don ym tang ki pliang ksiar bad rupa, hynrei, ki pliang dieng bad khyndew ruh; te don kiba donburom, bad kiba khlem burom ruh.

²¹ Namar kata, lada u briew u pynkhuid ïa lade na kine, un long ka pliang ba-donburom, ba la pynkyntang khuid, bad ba bit ïa ka kam u Kynrad, haba la pynkhreh ïa u ïa ka jingleh babha baroh.

²² Hynrei, to phet ïap noh na ki jingkwah brai ka jinglong samla; bad to beh brai ïa ka hok, ïa ka jingngeit, ïa ka jingieit, ïa ka jingsuk, lem bad kita kiba khot kyrpad ïa U Trai na ka dohnud bakhuid.

²³ Hynrei, ïa kita ki jingïasaid babieit bad bapathar to kyntait noh, haba tip ba ki ïa-pynmih ki jingïania.

²⁴ Te kam dei keiñ ïa u shakri U Trai ban ïania; hynrei, ban long uba jemnud ïa ki briew baroh, uba nang hikai, uba shah jem,

²⁵ ha ka jingjemnud uba sneng ïa kita kiba ïaleh pyrshah; ba lehse U Blei un ai ha ki ka jingkylla-ka-bamut ïa ka ban ithuh ïa ka jingshisha;

²⁶ bad ba kin pyllait ïa lade na ka jingriam u Soitan, haba la pynngat ïa ki da u shakri U Trai sha ka mon U Blei.