2 SAMUEL 9 - KA BAIBL

Ka jinglehsbun u Dabid ïa u Mephibosheth

¹ Bad u Dabid u la ong, “Dang don ne em uno uno ïa uba la pynsah na ka ïing u Saul, ba ngan ïoh leh isynei ïa u na ka bynta u Jonathan?”

² Te la don u shakri uwei uba na ka ïing u Saul uba ka kyrteng “u Siba”, bad haba ki la khot ïa u sha u Dabid, u syiem u la kylli ïa u, “Ma me u Siba?” U ruh u la ïathuh, “U shakri jong me long uta keiñ.”

³ Bad u syiem u la kylli, “Don ne em uno uno uba dang sah na ka ïing u Saul, ba ngan ïoh leh ïa ka jingisynei U Blei ïa u?” Te u Siba u la ïathuh ha u syiem, “Dang sah sa uwei u khun u jong u Jonathan, u ba-dkoh ki kjat.”

⁴ Bad u syiem u la kylli ïa u, “U hangno?” U Siba te u la ïathuh ha u syiem, “Ha khmih, u ha ka ïing u Makhir u khun u Ammiel, ha Lo-debar.”

⁵ Ynda kumta, u Dabid syiem u la phah, bad u la wallam ïa u na ka ïing u Makhir u khun u Ammiel, na Lo-debar.

⁶ Te haba u Mephibosheth, u khun u Jonathan, u khun u Saul, u la wan ha u Dabid, u la dem ngon, bad u la nguh de. Bad u Dabid u la ong, “Mephibosheth.” U ruh u la ïathuh, “Ha khmih u shakri jong me!”

⁷ Bad u Dabid u la ong ha u, “Wat sheptieng: naba ngan leh isynei keiñ ïa me shisha na ka bynta u Jonathan u kpa jong me, bad ngan ai noh pat ha me ïa ka khyndew baroh ka jong u Saul u kpa jong me; bad men ïoh bam kpu ha ka miej jong nga ha la ka sngi.”

⁸ U ruh u la nguh, bad u la ong, “U shakri jong me u long aïu, haba me khmih ïa nga uba kum u ksew u baïap?”

⁹ Ynda kumta, u syiem u la khot ïa u Siba, u shakri u Saul, bad u la ong ha u, “Ïa kita kiei kiei baroh kiba la dei ki jong u Saul bad ki jong ka ïing jong u baroh nga la aiti noh ha u khun u kynrad jong me.

¹⁰ Ma me te, bad ki khun shynrang jong me, bad ki shakri jong me, phin rep ïa kata ka khyndew na ka bynta jong u; bad men wallam shapoh ïa ka jingmih, khnang ba u khun u kynrad jong me un ïoh kpu ba un bam: hynrei, u Mephibosheth u khun u kynrad jong me un bam kpu ha la ka sngi ha ka miej jong nga.” U Siba te u la don khatsan ngut ki khun shynrang, bad arphew ngut ki shakri.

¹¹ Ynda kumta, u Siba u la ong ha u syiem, “Katba kum kita kiei kiei baroh ba u syiem kynrad jong nga u la hukum ïa la u shakri, kumta u shakri jong me un leh keiñ.” “U Mephibosheth te”, u la ong u syiem, “un ïoh bam jingbam ha ka miej jong nga, kumjuh kum uwei na ki khun u syiem.”

¹² U Mephibosheth te u la don u khun uba dang khynnah, uba ka kyrteng jong u, “u Mikah”. Bad baroh kat kiba shong ha ïing u Siba ki la long ki shakri ïa u Mephibosheth.

¹³ Kumta, u Mephibosheth u la shong duh ha Jerusalem: naba u la bam jingbam ha la ka sngi ha ka miej u syiem: te u ba-dkoh na ki kjat jong u baroh ar.